ޕްލާސްޓިކްގެ އުފެއްދުންތަކުން ރާއްޖޭގެ ކަނޑުތަކާއި ފަޅުތަކާއި ފަރުތަކަށް ލިބޭ ކޮންމެ ތަޣައްޔަރުކަމަކީ، ރާއްޖޭގެ އިގްތިސޯދީ އެންމެހައި ހަރަކާތްތަކަށް ލިބޭ ބޮޑު ގެއްލުމެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ދުނިޔޭގެ ތިމާވެށީގެ ދުވަހާ ގުޅިގެން ރައީސް ފޮނުއްވި ހިތާބުގައި މިއަދު ވިދާޅުވީ މުޅި ދުނިޔެއަށް ވެސް އަދި ދިވެހި ރާއްޖެއަށް ވެސް ތިމާވެށީގެ ގޮތުން ކުރިމަތިވެފައިވާ އެންމެ ބޮޑު ނުރައްކަލަކީ، ޕްލާސްޓިކްގެ އުފެއްދުންތަކުން ތިމާވެށްޓަށް ލިބޭ ތަޣައްޔަރުކަން ކަމަށެވެ. ރާއްޖޭގެ ފަތުރުވެރިކަމާއި، މަސްވެރިކަމަކީވެސް، ކަނޑުފަޅުގެ ދިރުންތަކުގެ މައްޗަށް ބިނާވެފައިވާ އިގްތިސޯދީ ހަރަކާތްތައް ކަމަށްވާއިރު، ޕްލާސްޓިކްގެ ސަބަބުން ދިވެހިންގެ މާހައުލީ ނިޒާމު ތަޣައްޔަރުވިޔަ ނުދިނުމަށް ޚާއްޞަ ސަމާލުކަމެއް ދޭންޖެހޭ ކަމަށް އެމަނިކުފާނު ވިދާޅުވިއެވެ.

"ތިމާވެށީގެ ރައްކާތެރިކަމަށްޓަކައި މިއަދު އަޅުގަނޑުމެން އަމަލީ މަސައްކަތްތަކެއް ނުކޮށްފި ނަމަ، މާދަމާގެ ޖީލަށް އިރު ފެނުން ތޮޅިލާއިރު ވަގުތު ފާއިތުވެ، މި ބިމަކީ އިންސާނީ ދަރިފަސްކޮޅު ވަޒަންވެރިވެ އުޅުމަށް ނުރައްކާތެރި ތަނަކަށްވުމަކީ އެކަށީގެންވާ ކަމެކެވެ. މިހާރު އޮތް ނުރައްކާތެރި ހާލަތުން ދުނިޔޭގެ ތިމާވެށި ހިމާޔަތްކުރެވޭނީ، އެއީ އަޅުގަނޑުމެންގެ ދިރިއުޅުމުގެ ކޮންމެ ކަމެއްގައި ލާމެހިފައިވާ ކަމަކަށް ހަދައިގެންނެވެ. ތިމާވެށި ހިމާޔަތްކުރުމަކީ އަޅުގަނޑުމެންގެ ދިރިއުޅުމުގެ އާދައެއް ކަމުގައި ހެދުން، އަދުގެ ހާލަތު މިވަނީ އަޅުގަނޑުމެންގެ މައްޗަށް ލާޒިމުކޮށްފައެވެ" ރައީސް ސޯލިހުގެ ހިތާބުގައިވެއެވެ.

[caption id="attachment_52586" align="alignnone" width="1280"] ތިމާވެށީގެ ދުވަހުގެ ހަރަކާތްތަކުގައި ބައިވެރިވުމަށް ރައީސް އުކުޅަހަށް ވަޑައިގެން -- ފޮޓޯ / ރައީސް އޮފީސް[/caption]

ރައީސްގެ ހިތާބުގައި މޫދަށް އެރި، ހިތް އުފާކޮށްލަން ގޮސް އުޅޭ ގޮނޑުދޮށްތައް، ޕްލާސްޓިކްގެ އުފެއްދުންތަކުން ތަޣައްޔަރުވިޔަ ނުދިނުމަކީ އެންމެންގެ އަޒުމަކަށް ހަދަންޖެހޭ ކަމަށެވެ. ރައީސް ވިދާޅުވީ ކާނާގެ ރައްކާތެރިކަމާ ގުޅިފައިވާ މަސްކަނޑުތަކާއި ފަޅުތަކާއި ފަރުތައް، ޕްލާސްޓިކުން ތަޣައްޔަރުވިޔަ ނުދިނުމަށް މަސައްކަތް ކުރުމަކީ ކޮންމެ މީހެއްގެ ވެސް ޒިންމާއެއް ކަމަށެވެ.

"ނަމަވެސް މިކަންކަން ކުރެވޭނީ، އަޅުގަނޑުމެންގެ ދިރިއުޅުމުގެ އެންމެހައި އާދަތައް، ތިމާވެށްޓާ ރަޙުމަތްތެރި ގޮތްތަކަށް ބަދަލުކޮށްގެންނެވެ. އަޅުގަނޑުމެންގެ ތެރެއިން އެންމެ ތުއްތު ކުއްޖާއިން ފެށިގެން އެންމެ ދޮށީ އުމުރުގެ މީހާއަކީވެސް، ޕްލާސްޓިކަށް ނޫނެކޭ ބުނާ މީހެއްކަމަށް ވެގެންނެވެ. ވަކިން ހާއްސަކޮށް، އެއް ފަހަރު ބޭނުންކޮށްފައި އުކައިލާ ޒާތުގެ ޕްލާސްޓިކް ބޭނުންކުރުން ހުއްޓައިލައިގެންނެވެ" ރައީސް ސޯލިހު ވިދާޅުވިއެވެ.

ރައީސް ސޯލިހުގެ ހިތާބުގައި އެމަނިކުފާނު ވިދާޅުވީ އިންސާނުން ކުޅަ އަމަލުތަކެއްގެ ސަބަބުން ދުނިޔޭގެ ތިމާވެށި ހަލާކުވަމުން ދިއުމަކީ، އިންސާނުންގެ ދިރިތިބުމަށް ކުރިމަތިވާ ނުރައްކާތަކެއް ކަމަށެވެ.