ރާއްޖޭގައި ޔޫނިއަންތައް ރަޖިސްޓްރީކޮށް ހިންގުމުގެ ހައްގު ގާނޫނީ ގޮތުން ކަށަވަރުކޮށްދިނުމަށްޓަކާ ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިންޑަސްޓްރިއަލް ރިލޭޝަންސް ބިލާއި އޮކިއުޕޭޝަނަލް ސޭފްޓީ އެންޑް ހެލްތު ބިލް އަވަހަށް އެޖެންޑާ ކޮށްދިނުމަށް އެމްޑީޕީގެ ޗެއާޕާސަން ފައްޔާޒު އިސްމާއިލް މަޖިލީހުގެ ރައީސް މުހައްމަދު ނަޝީދަށް ގޮވާލައިފިއެވެ.

ފައްޔާޒު ކުރެއްވި ޓްވީޓަކީ ވިދާޅުވީ އެ ދެބިލަކީ މަސައްކަތްތެރިންގެ ހައްގުތައް ހިމާޔަތްކުރުމަށް އިގްތިސޯދަށް މުހިއްމު ދެ ބިލެއް ކަމަށެވެ.

https://twitter.com/faya_i/status/1663399654443081728

"ގަރާރުތަކޭ އެއްފަދައިން މުހިއްމު" ނަޝީދު ޓެގް ކުރައްވާ ކުރެއްވި ޓްވީޓެއްގައި ފައްޔާޒު ވިދާޅުވިއެވެ. އެ ދެ ބިލު ފާސްކުރުމަށް މަސައްކަތެރިންނާ ހައްގުތަކުގައި ވަކާލާތުކުރާ މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިންވެސް ވަނީ ގޮވާލާފައެވެ.
އިންޑަސްޓްރިއަލް ރިލޭޝަންސް ބިލް
އެ ބިލު ހުށަހެޅުއްވީ ސަރުކާރުގެ ފަރާތުން މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) އެވެ. އެ ބިލް ހުށަހަޅާފައި ވަނީ ގާނޫނު އަސާސީން ކަށަވަރުކޮށްދީފައިވާ މަސައްކަތްތެރިންގެ ޖަމިއްޔާތައް އުފެއްދުމާއި އެ ޖަމުއިއްތާތަކުން ހިންގާ ހަރަކާތްތަކުގައި ބައިވެރިވުމާ ނުވުމުގެ ހައްގު ކުރިއެރުވުމެވެ.
ބިލުގައި ބުނެފައި ވަނީ އެ ގާނޫނު ވުޖޫދުވެގެން ދިޔުމާއެކު މަސައްކަތްތެރިންނާ ވަޒީފާދޭ ފަރާތްތަކާ ދެމެދު އުފެދޭ ދެބަސްވުންތަކާއި މައްސަލަތައް މަޝްވަރާގެ އުސޫލުން ހައްލު ކުރުމުގެ ހަރުދަނާ ނިޒާމެއް ގާއިމް ކުރުމެވެ.

އޮކިއުޕޭޝަނަލް ސޭފްޓީ އެންޑް ހެލްތު ބިލް
"އޮކިއުޕޭޝަނަލް ސޭފްޓީ އެންޑް ހެލްތު ބިލް" ނުވަތަ "މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމާ ބެހޭ" ބިލަކީ މަސައްކަތުގެ މާހައުލުގައި ދިމާވެދާނެ ނުރައްކާތާކައި ގެއްލުންތަކުން ރައްކާތެރިކަން ފޯރުކޮށްދޭން ބޭނުންވާ ގާނޫނީ އޮނިގަނޑު އެކުލަވާލުމާ ގުޅޭ ބިލެކެވެ. އެ ބިލު ހުށަހެޅުމުގެ މަގުސަދަކީ މަސައްކަތުގެ މާހައުލުގައި ދިމާވެދާނެ ނުރައްކާތަކާއި ގެއްލުންތަކުން ރައްކާތެރިކަން ފޯރުކޮށްދިނުމާ ގުޅޭ މައިގަނޑު އުސޫލުތައް ކަނޑައެޅުން ފަދަ ކަންކަމެވެ.