ވޭސްޓް މެނޭޖުމަންޓް ކޯޕަރޭޝަން (ވެމްކޯ)ގެ ކުނި ބިލާ އެކު، ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ ބިލު އަންނަ މަހުން، ފެށިގެން ދައްކަންޖެހޭ ގޮތަށް ހަމަޖައްސައިފިއެވެ. މިގޮތަށް އަމަލު ކުރާނީ ހަމައެކަނި މާލެ ސަރަހައްދުގައި ދިރިއުޅޭ ގޭބީސީތަކުންނެވެ.

މި ނިންމުމާ އެކު، ކޮންމެ މަހަކު ކުނި ބިލު ދެއްކުން ލާޒިމުވެެގެންދިޔައީއެވެ. ކޮންމެ މަހެއްގެ ކަރަންޓް ބިލު ދައްކާއިރު، ކުނި ބިލު ދައްކަންޖެހޭނެއެވެ. ވަކި ވަކިން ދެ ބިލު ނުދެއްކޭނެއެވެ. ދައްކަން ޖެހޭނީ ދެ ބިލުގެ ޖުމްލަ އަދަދު އެއްކޮށެވެ.

ކަރަންޓް ބިލުގައި ކުނި ބިލު ހިމަނަންޖެހޭ ގޮތަށް ހަމަޖައްސައި، އެކަމުގެ އެއްބަސްވުމުގައި މިއަދު ވަނީ ސޮއިކޮށްފައެވެ. ސްޓެލްކޯގައި ބޭއްވި ރަސްމިއްޔާތެއްގައި އެކަމުގެ އެއްބަސްވުމުގައި ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރު އަހުމަދު ޝަރީފެވެ. ވެމްކޯގެ ފަރާތުން ސޮއި ކުރެއްވީ ޔޫސުފް ސިރާޖެވެ.

[caption id="attachment_52114" align="alignnone" width="2560"] ސްޓެލްކޯގެ އެމްޑީ އަހުމަދު ޝަރީފު: ވެމްކޯ ކުނި ބިލާއި އާއި ކަރަންޓު ބިލު ވަކިވަކިން ދެން ދައްކާކަށް ނުޖެހޭނެ. ދައްކަން ޖެހޭނީ ކަރަންޓުބިލާ އެކު-- ހަތާވީސް ފޮޓޯ[/caption]

އެ ރަސްމިއްޔާތުގައި ޝަރީފު ވިދާޅުވީ ކުނި ބިލާއި ކަރަންޓު ބިލު އެއްކޮށްލުމުގެ މަޝްވަރާތައް ކުރިއަށްދާތާ ވަރަށް ދުވަސް ވެއްޖެ ކަމަށާއި އެކަމުގައި އެއްބަސްވުމަކަށް އާދެވި މިއަދު ސޮއި ކުރެވިގެން ދިއުމަކީ ތާރީހީ ކަމެއް ކަމަށެވެ. އޭނާ ވިދާޅުވީ އަންނަ ޖޫން މަހުން ފެށިގެން ކަރަންޓް ބިލު ދައްކަން ޖެހޭނީ ކުނި ބިލާ އެކުގައި ކަމަށާއި ކަރަންޓް ބިލުގައި ވެމްކޯގެ ބިލުގެ ތަފްސީލު ހިމެނިފައިވާނެ ކަމަށެވެ.

"ގާނޫނުން މިކަން ކުރުމަށް ތަންދޭތީ، އެއްބަސްވުމުގައި މި ސޮއި ކުރީ. އިރާދަ ކުރެއްވިއްޔާ ދެން އެންމެ އަވަހަށް ބިލެއް ދާނީ ޖޫން މަހު،" ސްޓެލްކޯގެ އެމްޑީ ވިދާޅުވިއެވެ.

އެ ރަސްމިއްޔާތުގައި ވާހަކަ ދައްކަވަމުން ވެމްކޯގެ އެމްޑީ ސިރާޖު ވިދާޅުވީ ކުނި ބިލު މީގެ ކުރިން ނުދައްކަނީ ބިލު ދައްކާނެ ފަސޭހަ ގޮތެއް ނެތުމުން ކަމަށާއި ސްޓެލްކޯއާ އެކު ވެފައިވާ އެއްބަސްވުމުގެ ދަށުން، އެކަން ފަސޭހަވެގެންދިޔައީ ކަމަށެވެ.

ވެމްކޯ ބިލާއި ސްޓެލްކޯގެ ބިލް އެއްކޮށްލުމުން ގޭބިސީތަކުގެ މައުލޫމާތު އަޕްޑޭޓްކުރަން ވެމްކޯއިން ވަނީ އިލްތިމާސްކޮށްފައެވެ. ގޭބީސީތަކުގެ ކަރަންޓު މީޓަރުތަކުގެ ތެރޭގައި ލިފްޓު ނުވަތަ މެއިންޓަނަންސް މީޓަރެއް ހުންނަ ނަމަ، އެ މީޓަރުތަކުން ކުނި ބިލު އުނިކުރަންޖެހޭނެތީއެވެ.

މީގެ ކުރިން ކުނީގެ ބިލު ނުދައްކާ މައްސަލަ މާލެ ސަރަހައްދުގައި އޮތީ ބޮޑުވެފައެވެ. މިއާ އެކު، ކުނި ބިލު ދެއްކުން ލާޒިމުވެ، ވެމްކޯއަށް ލިބޭ އާމްދަނީ އިތުރުވެގެންދާނެއެވެ.