މާލޭގެ ގެއެއްގެ އެޕާޓުމަންޓަކަށް ވަދެ، މީހަކަށް ތޫނު އެއްޗަކުން ބިރު ދައްކާ މާރާމާރީ ހިންގި މައްސަލައެއްގައި މީހަކު ހޯދަން އިއުލާނު ކޮށްފިއެވެ.

ފުލުހުން މިއަދު ބުނީ ފުލުހުންގެ މާލޭގެ ގެއެއްގެ އެޕާޓްމަންޓަކަށް ގްރޫޕެއްގެ ބަޔަކު ވަދެ އެތަނުގައި ދިރިއުޅެމުންދާ މީހަކަށް ތޫނު އެއްޗަކުން ބިރުދައްކައި، ނުރައްކާތެރި ހަތިޔާރު ބޭނުންކޮށްގެން ހަމަލާދީ މާރާމާރީ ހިންގުމަށްފަހު އެއެޕާޓްމަންޓްގައި ހުރި މުދަލަށް ގެއްލުން ދީފައިވާ މައްސަލައާ ގުޅިގެން މީހަކު ހޯދުމުގެ މަސައްކަތް ކުރަމުން އަންނަ ކަމަށެވެ.

އޭނާ ހޯދަނީ ކޯޓު އަމުރެއްގެ ދަށުން ހައްޔަރު ކުރުމަށް ކަމަށްވެސް ބުންޏެވެ.

މި މައްސަލާގައި ހޯދަމުން އަންނަނީ ރ. މަޑުއްވަރީ ދެތަނޑިމާގެ އުމުރުން 34 އަހަރުގެ އިބްރާހީމް ޝަމީން ނަމަކަށް ކިޔާ މީހެކެވެ.

އިބްރާހިމް ޝަމީން އާބެހޭ އެއްވެސް މަޢުލޫމާތެއް ލިބިފައިވާނަމަ ފުލުހުންގެ ސީރިއަސްް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ނުވަތަ ފުލުހުންގެ ހޮޓްލައިން ނަންބަރު 3322111 އަށް ގުޅުއްވައި ހިއްސާކުރުމަށް ފުލުހުން ވަނީ އެދިފައެވެ.