އެމްޑީޕީގެ ތެރެއިން ވަކި ފެކްޝަނެއްގެ ގޮތުގައި ރައީސް ނަޝީދު އުފެއްދެވި "ފިކުރެއްގެ ދިރުން"އިން ސިޔާސީ ޕާޓީއެއް އުފައްދަން އުޅޭކަން މިއަދު އިއުލާންކޮށްފިއެވެ.

މިކަން އިއުލާންކުރީ އެމްޑީޕީން ވަކިވި މަޖިލިސް، މެމްބަރުންނާ އެކު ފިކުރެއްގެ ދިރުމުން ބޮޑުފެންވަޅުގޭގައި މިއަދު ހަވީރު ބޭއްވި ޕްރެސް ކޮންފަރެންސްގައެވެ.

ފިކުރެއްގެ ދިރުމުން އާ ސިޔާސީ ޕާޓީއެއް ހަދާނެކަން އިއުލާން ކުރެއްވީ މަޖިލީހުގެ ނައިބު ރައީސް އީވާއެވެ.

އެ ޕްރެސް ކޮންފަރެންސްގައި ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވީ އަންނަ ހަފްތާގެ ތެރޭގައި ސިޔާސީ ޕާޓީ ހެދުމުގެ އިދާރީ ކަންކަން ފުރިހަމަކޮށް، ޕާޓީ ހެދުމަށްޓަކާ 3،000 މެމްބަރުން ހަމަކުރުމުގެ މަސައްކަތް ފަށާނެ ކަމަށެވެ.

"ފެށޭ ހަފްތާ ތެރޭގައި އިދާރީ މަސައްކަތް ނިންމުމަށްފަހު، ސިޔާސީ ޕާޓީ ރަޖިސްޓްރީކުރުމަށް އެދޭ ފޯމު ހުށަހަޅައި އަދި އޭގެ ފަހުން ހޯދަންޖެހޭ 3،000 ފޯމު ހޯދުމުގެ މަސައްކަތް ކުރިއަށް ގެންގޮސް، އަޅުގަނޑުމެންގެ ސިޔާސީ ޕާޓީގެ ރަޖިސްޓްރީގެ މަސައްކަތް ކުރިއަށް ގެންދާނަން،" އިލްޔާސް ލަބީބު ވިދާޅުވިއެވެ.

ނޫސްވެރިންގެ ބައްދަލުވުމުގައި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވީ އެމްޑީޕީ އުފެއްދި މަގުސަދުތަކާ ހިލާފަށް އެ ޕާޓީން މަސައްކަތް ކުރަމުންދާ ކަމަށެވެ. އަދި އެ ޕާޓީން ވައްކަމާއި ފަސާދަ ހިނގަމުންދާ ކަމަށާއި ރައީސް ނަޝީދު އެއްފަރާތްކޮށް، ވެރިކަން ކުރަމުންދާ ކަމަށް އިންތި ވިދާޅުވިއެވެ.