ނ. މަނަދޫގައި މަރާލާފައި އޮތް ނައީމާގެ މޫސާގެ މަރުގެ ތަހުގީގު ކުރިޔަށްދާ ގޮތް ކޮމިޝަނަރު އޮފް ޕޮލިސް މުހައްމަދު ހަމީދު ބައްލަވާލައްވައިފިއެވެ.

ނ. އަތޮޅަށް ކުރައްވާ ހާއްސަ ދަތުރުފުޅެއްގެ ތެރެއިން ސީޕީ ހަމީދު ވަނީ މަނަދޫއަށް ވަޑައިގެން، އެރަށު ކައުންސިލާއި އެރަށުގެ ކަމުވޮށިގެންވާ ބައެއް ފަރާތްތަކާ ބައްދަލު ކުރައްވާފައި ކަމަށް ފުލުހުން ބުންޏެވެ.

މީގެ އިތުރުން އެރަށު ޕޮލިސް ސްޓޭޝަންގައި މަސައްކަތްކުރައްވާ ފުލުހުންނާއި އާންމު މުވައްޒަފުންނާ ބައްދަލުުރައްވާފައިވާ ކަމަށަ ފުލުހުން ބުންޏެވެ.

މަނަދޫ އަށް ވަޑައިގެން ސީޕީ ވަނީ ނ. މަނަދޫ / އަންނާރުމާގެ، ނައީމާ މޫސާގެ މަރުގެ މައްސަލަައިގެ ތަހުގީގު ކުރިއަށްދާ ގޮތް ކައިރިން ބައްލަވާލައްވާފައިވެއެވެ.

އަދި ނައީމާ މޫސާގެ އާއިލާއާ ބައްދަލުކުރައްވައި، ތަހުގީގާ ގުޅޭ މަޢުލޫމާތު ހިއްސާކުރައްވާފައިވާ ކަމަށް ފުލުހުން ބުންޏެވެ.

ފުލުހުން މީގެކުރިން ބުނީ ނައީމާގެ މަރުގައި ތުހުމަތު ކުރެވޭ ކަންތައްތަކެއް ހުރިކަން ފާހަގަ ކުރެވޭތީ މަރުގެ ތަހުގީގު ކުރިއަށް ގެންދަނީ ހޮމިސައިޑް އިންވެސްޓިގޭޝަނެއްގެ ގޮތުގައި ކަމަށެވެ.

ފުލުހުންގެ ސީރިއަސް އެންޑް އޯގަނައިޒް ކްރައިމް ޑިޕާޓްމަންޓްގެ ހާއްސަ ތަހުގީގު ޓީމަކާއި ފޮރެންސިކް ތަހުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް މަނަދޫގައި ހަރަކާތްތެރިވަމުންދާތާ ދުވަސްތަކެއް ވަނީ ވެފައެވެ.

ނައީމާ މަރުވެފައި އޮއްވާ ފެނުނު ތަނުން އޭނާ ނޫން އެހެން މީހެއްގެ ޑީއެންއޭ އެތަނުން ފެނިފައި ވާތީ ގިނަ އަދަދެއްގެ މީހުންގެ ޑީއެންއޭ ވަނީ ޓެސްޓު ކޮށްފައެވެ. މި މައްސަލާގައި މިހާތަނަަށް އެއްވެސް މީހަކު ހައްޔަރު ކޮށްފައެެއް ނުވެއެވެ.