މިދިޔަ އަހަރު ސަރުކާރުގެ މައި ވިޔަފާރި ކުންފުނި އެސްޓީއޯ އަށް ރިކޯޑު އަދަދަކަށް އާމްދަނީ ލިބިއްޖެއެވެ.
އެކުންފުނީގެ އަހަރީ އާއްމު ރިޕޯޓުގައިވާ ގޮތުން 2021ވަނަ އަހަރަށްވުރެ މިދިޔަ އަހަރު ލިބުނު އާމްދަނީ ވަނީ 79 ޕަސެންޓު މައްޗަށް އަރައިފައެވެ. 2021ވަނަ އަހަރު 10.2 ބިލިއަން ރުފިޔާ ލިބުނުއިރު މިދިޔަ އަހަރު އާމްދަނީގެ ގޮތުގައި 18.2 ބިލިއަން ރުފިޔާ ވަނީ ލިބިފައެވެ.
މީގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު އުފުލުމާއެކު، ފާއިތުވި އަހަރު އެ ކުންފުނިން ވިއްކި ތެލުގެ އަދަދުވެސް އޭގެ ކުރީ އަހަރާއި އަޅާބަލާއިރު 27 ޕަސެންޓު އިތުރުވެފައިވުން ކަމަށް އެސްޓީއޯ އިން ބުނެއެވެ. އެއީ އިތުރު މާކެޓް ޝެއާ ލިބި ވިއްކުނު ވޮލިއުމްވެސް އިރުވެގެން ކަމަށް އެސްޓީއޯ އިން ބުނެއެވެ.
ހަމަމިއާއެކު، ކުންފުނީގެ އެހެނިހެން ވިޔަފާރިތައްވެސް ކުރިއަރާ، އާމްދަނީ އިތުރުވެފައިވާ ކަމަށް އެސްޓީއޯ އިން ބުންޏެވެ.
ފާއިތުވި އަހަރު ޖުމްލަ ފައިދާގެ ގޮތުގައި އެސްޓީއޯއަށް ދެ ބިލިއަން ރުފިޔާ ވަނީ ލިބިފައެވެ. 2021 ވަނަ އަހަރު ޖުމްލަ ފައިދާގެ ގޮތުގައި ލިބިފައިވަނީ 1.5 ބިލިއަން ރުފިޔާއެވެ. މިއީ 41 ޕަސެންޓުގެ ކުރިއެރުމެކެވެ.
އެ ކުންފުނިން ވަނީ 2022 ވަނަ އަހަރު އޮޕަރޭޓިން ޕްރޮފިޓްގެ ގޮތުގައި ފުރަތަމަ ފަހަރަށް، އެއް ބިލިއަން ރުފިޔާ، ހާސިލްކޮށްފައެވެ. 2021 ވަނަ އަހަރު އޮޕަރޭޓިން ޕްރޮފިޓްގެ ގޮތުގައި ލިބިފައި ވަނީ 643 މިލިއަން ރުފިޔާއެވެ.
މިއާއެކު، ޓެކްސްއަށް ކެނޑުމަށްފަހު 2022 ވަނަ އަހަރަށް ސާފު ފައިދާގެ ގޮތުގައި 728 މިލިއަން ރުފިޔާ ރެކޯޑްކުރެވިފައިވެއެވެ. 2021 ވަނަ އަހަރު ސާފު ފައިދާގެ ގޮތުގައި ލިބިފައިވަނީ 487 މިލިއަން ރުފިޔާއެވެ. މިއީ 50 ޕަސެންޓުގެ ކުރިއެރުމެކެވެ. އަދި މީގެ މައިގަނޑު ސަބަބަކީވެސް ހަމަ ކުންފުނިން ކުރަމުން އަންނަ ވިޔަފާރިތައް ހަރުދަނާކުރެވި، ޖުމްލަ ފައިދާ އިތުރުކުރެވިފައިވުމެވެ. ކުންފުނީގެ ފައިދާ ރަނގަޅު ކުރެވުމާއި އެސްޓީއޯ ގްރޫޕްގެ ގިނަ ކުންފުނިތަކުން ފައިދާ އިތުރުވުމާއިއެކު އެސްޓީއޯ ގްރޫޕްގެ ފައިދާ ވެސް ވަނީ އިތުރުވެ، 1 ބިލިއަނަށް އަރާފައެވެ.