ތ. ހިރިލަންދޫގައި ގެއެއްގެ ތެރެއަށް ވަދެ މާރާމާރީ ހިންގާ އިންޒާރުދިން މައްސަލައަކާއި ގުޅިގެން ބަޔަކު ހައްޔަރުކޮށްފިއެވެ.

ފުލުހުން މިއަދު ބުނީ އެ މައްސަލަ ފުލުހުންނަށް ރިޕޯޓު ކޮށްފައި ވަނީ ރޭގެ 22:00 ހާއިރު ކަމަށެވެ. އެ މާރާމާރީއާ ގުޅިގެން ތޫނު ހަތިޔާރު ބޭނުން ކޮށްގެން މީހަކަށް އިންޒާރުދިން މައްސަލައެއް ވެސް ރޭ 22:15 ހާއިރު ހުށަހަޅާފައިވާ ކަމަށް ފުލުހުން ބުންޏެވެ.

ފުލުހުން ބުނީ މާރާމާރީއާ ގުޅިގެން 49 އަހަރުގެ މީހަކާއި 43 އަހަރުގެ މީހަކަށް އަނިޔާވެސް ވެފައިވާ ކަމަށެވެ. އެ ދެ މީހުންނަށް ހިރިލަންދޫ ސިއްހީ މަރުކަޒުގައި ފަރުވާ ދިނުމަށްފަހު އިތުރު ފަރުވާ އަށް ވޭމަންޑޫ ހޮސްޕިޓަލަށް ގެންގޮސްފައިވާ ކަމަށް ފުލުހުން ބުންޏެވެ.

ފުލުހުން ބުނީ އެ މާރާމާރީއާ ގުޅިގެންނާއި ފުލުހުންގެ އަމުރަށް ނުކިޔަމަންތެރިވެ ރަށުގެ އަމަން އަމާންކަން ނަގާލަން މަސައްކަތްކުރި 36 އަހަރުގެ މީހަކާއި 32 އަހަރުގެ މީހަކު ހައްޔަރު ކޮށްފައިވާ ކަމަށެވެ.