ފިލްމާއި ވެބް ސީރީޒްތައް ގެނެސްދެމުން އަންނަ އޮންލައިން ޕްލެޓްފޯމް، “ބައިސްކޯފް” މެދުވެރިކޮށް ލޯކަލް ޗެނަލްތައް ގެނެސްދިނުން ހުއްޓާލުމަށް ބްރޯޑްކާސްޓިން ކޮމިޝަން އިން އަންގައިފިއެވެ.

މައުލޫމާތު ލިބިފައިވާ ގޮތުގައި ބައިސްކޯފް މެދުވެެރިކޮށް ރާއްޖޭގެ ބައެއް ލޯކަލް ޗެނަލްތައް އަންނަނީ ދައްކަމުންނެވެ. ނަމަވެސް ލޯކަލް ޗެނަލްތައް އެގޮތަށް ދެއްކޭނީ ބްރޯޑްކޮމް އިން ދޭ ރީބްރޯޑްކާސްޓު ކުރުމުގެ ލައިސަންސް އޮންނަ ފަރާތްތަކަށެވެ.

އެނގިފައިވާ ގޮތުގައި ބައިސްކޯފް އިން އެ ހިދުމަތް ދެނީ ރީބްރޯޑްކާސްޓިން ލައިސަންސް ނުނަގައެވެ.

ނަމަވެސް ބްރޯޑްކޮމް އިން ބައިސްކޯފަށް ފޮނުވި ސިޓީގައި އޮތީ ބައިސްކޯފް ޕްލެޓްފޯމް ހުއްޓާލުމަށެވެ. އެހެން އިބާރާތް ކުރެވިފައި އޮތީ އޮޅުމަކުން ކަމަށް ބްރޯޑްކޮމް އިން ބުނެއެވެ.

އަދި މިހާރު ބައިސްކޯފަށް ވަނީ ސިޓީގެ އިބާރާތް ރަނގަޅު ކުރުމަށް ފަހު އަލުން ފޮނުވާފައި ކަމަށްވެސް ބްރޯޑްކޮމް އިން ބުނެއެވެ.