މާލެ ސަރަހައްދުގައި ހިމެނޭ އެންމެ ބޮޑު ރަށް، ހުޅުމާލެ އިން ބީލަމުގެ އުސޫލުން ދިރިއުޅުމަށް ޖުމްލަ 15 ބިމެއް ބިޑަށް ހުޅުވާލައިފިއެވެ.

އާބަންކޯ އިން ކޮށްފައިވާ އިއުލާނެއްގައި މިއަދު ބުނީ އެ ބިންތައް އެކުންފުނީގެ "ބިޑް ޕޯޓަލް" މެދުވެރިކޮށް ގަތުމުގެ ފުރުސަތު ހުޅުވާލާފައިވާ ކަމަށެވެ. މި ބިންތަކުގެ ތެރެއިން ބީޗް ފްރަންޓުން ވިއްކަނީ ފަސް ބިމެކެވެ. އެއީ 1،270.15 – 1،803.28 އަކަފޫޓާއި ދެމެދުގެ ބިންތަކެކެވެ.

ބީޗްސައިޑުން 10 ބިމެއް ވިއްކުމަށް ނިންމާފައިވާއިރު އެ ބިންތަކަކީ 1،644.83 – 2،338.67 އަކަފޫޓާއި ދެމެދުގެ ބިންތަކެކެވެ.

އާބަންކޯ އިން ބުނީ އެ ބީލަމުގައި ބައިވެރިވެވޭނީ 18 އަހަރު ފުރިފައިވާ ދިވެހި ރައްޔިތުންނަށް ކަމަށެވެ. އަދި ދިވެހިރާއްޖޭގައި ރަޖިސްޓްރީ ކޮށްފައިވާ 100 ޕަސެންޓު ދިވެހިންގެ ހިއްސާ އޮންނަ ކުންފުންޏަކަށް އެ ބީލަމުގައި ބައިވެރިވެވޭނެއެވެ.
ބީލަމުގެ އުސޫލުން ބިން ވިއްކުމަށް ހަމަޖެހިފައިވާ މަރުހަލާތައް:

މަރުހަލާ 1: ޝައުގުވެރިވެލަށްވާ ބިމަށް އެކްސްޕްރެޝަން އޮޕް އިންޓްރެސްޓް (އީ.އޯ.އައި) ހުށަހެޅުން
މަރުހަލާ 2: އީ.އޯ.އައި ހުށަހަޅާފައިވާ ބިމަށް ބިޑްކުރުން

އާބަންކޯ އިން ބުނީ އެ ބިންތަކަށް ޝައުގުވެރިވާ ފަރާތްތަކުން، ބީލަމުގެ އުސޫލުން ބިންގަތުމަށް ކުރިމަތިލުމަށް ހަަމަޖެހިފައި ވަނީ އޮންލައިން ޕޯޓަލް https://bids.urbanco.mv/ މެދުވެރިކޮށް ކަމަށެވެ.
އެހެންކަމުން، ބިން ގަތުމަށް އެދޭ ފަރާތްތަކުން، އެ ޕޯޓަލްގައި ރަޖިސްޓްރީކޮށް އާބަންކޯ އިން ކޮށްފައިވާ އިއުލާނާއެކު ޝާއިއުކޮށްފައިވާ މައުލޫމާތު ކަރުދާހާއި އެއްގޮތަށް ބީލަން ހުށަހެޅުމަށް އެކުންފުނިން ވަނީ އެދިފައެވެ.