މަސްވެރިންނަށް ލުއި ގޮތްތައް ހޯދައިދިނުމާއެކު އެ މީހުންނަށް ލިބޭ އާމްދަނީ އިތުރުކުރުމަށް މިފްކޯ އިން ކުރަމުން ގެންދާ މަސައްކަތުގެ ދަށުން މިފްކޯ އިން ގަނެފައިވާ އައު ބޯޓު "ޖަޒީރާ 3" ރާއްޖެ ގެނެސްފިއެވެ.

ރާއްޖެ އައުމަށް މިދިޔަ މަހުގެ 18ވަނަ ދުވަހު ކޮރެއާ އިން ފުރި މި ބޯޓުގެ އިތުރުން، އިތުރު ތިން ބޯޓެއް ގެނައުމަށް މިފްކޯ އިން ވަނީ ނިންމައިފައެވެ.

“މި ގެންނަ ބޯޓުން 120 ޓަނު ދުވާލަކަށް ނެގޭނެ. އަދި ދުވާލަކަށް 20 ޓަނު ސްޓޯކުރެވޭނެ ބޯޓެއް” މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ “ހަތާވީސް” އާ ވާހަކަ ދައްކަމުން ވިދާޅުވިއެވެ.

https://twitter.com/mifcomv/status/1643876231086219265?s=20

އިސްމާއިލް ވިދާޅުވީ ޖަޕާނުން ގަތް އެ ބޯޓު ރާއްޖެއަށް އާދެވެނީ އަންނަ މަހުގެ ފުރަތަމަ ހަފަތްގާއި ކަމަށެވެ. އެ ބޯޓަށް ބޭނުންވާ މުވައްޒަފުން ހޯދުމަށް ވަރަށް އަވަހަށް އިއުލާން ކުރާނެ ކަމަށް އިސްމާއިލް ވިދާޅުވިއެވެ. މިހާރުވެސް މިފްކޯގެ ފްލީޓުގައި ދެ ބޯޓެއް އެބައޮތެވެ. އެއީ ޖަޒީރާ 102 އާއި މަހާ ކަލަމިންޖާއެވެ. މަހާ ކަލަމިންޖާ އަކީ 90 ޓަނާ ހަމައަށް މަސް ރައްކާ ކުރެވޭ ބޯޓެކެވެ.

މިފްކޯ އެމްޑީ ވިދާޅުވި ގޮތުގައި އާ ބޯޓު ހޯދި މައިގަނޑު ސަބަބަކީ މިފްކޯއިން ދެކުނުގައި ހިންގި އޮޕަރޭޝަންތައް މިހާރަށްވުރެ ހަރުދަނާ ކުރުމުގެ ގޮތުން ކަމަށެވެ. އެ ކުންފުނިން ދެކުނުގެ އޮޕަރޭޝަންތަކުގައި އާއްމުކޮށް ގެންގުޅެނީ ކުދި ބޯޓުތަކެވެ. އެކަމަކު އެ ބޯޓުތަކުގައި އެހާ ވަރުގެ ކެޕޭސިޓީ އެ ނުހުރެއެވެ.

“ކުދި ބޯޓު ފަހަރަށް ބަލާ ކަމަށްވަންޏާ އެއް ދޯނީގެ މަސްވެސް ނޭޅޭ. ދޯންޏަކުން އެބަ ގެނޭ 70 ޓަނު 50 ޓަނު” އިސްމާއިލް ވިދާޅުވިއެވެ.

އެއަށް ފަހު އެ މަސް ފްރީޒް ކޮށްފައި އައްޑޫ ނުވަތަ ކޫއްޑޫގައި ސްޓޯ ކުރަން ގެންދެއެވެ. ބައެއް ފަހަރު ކަނޑުމަތީގައި ތިން ދުވަސްވެސް ނަގައެވެ.

އިސްމާއިލް ވިދާޅުވި ގޮތުގައި އަލަށް ގެންނަ ބޯޓާއެކު މަސްވެރިންނަށް މަސް ކިރުމުގެ އިންތިޒާމުތައް ރަނގަޅު ކުރެވިގެންދާނެ ކަމަށެވެ. އަދި ތާޒާ މަސް ލިބުމުގެ ފުރުސަތު ފަހިވެގެންދާނެ ކަމަށެވެ.

“އަޅުގަނޑުމެންގެ ކޮލިޓީއަށްވެސް ލުއިތަކެއް ލިބި ތާޒާމަސް ލިބުމުގެ ފުރުސަތު އަނެއްކާވެސް އިތުރުވެގެންދާނެ. ބޭނުންވަނީ މިފްކޯގެ ވަސީލަތްތައް އިތުރުކޮށް އާމްދަނީ އިތުރުކުރެވޭނެ ގޮތެއް ހޯދުން” އިސްމާއިލް ވިދާޅުވިއެވެ.