އެސްޓީއޯގެ ޑިރެކްޓަރުންގެ ބޯޑުގައި ޕަބްލިކް ހިއްސާދާރުން ތަމްސީލް ކުރުމަށް، ބޯޑަށް ކުރިމަތިލުމުގެ ފުރުސަތު އެކުންފުނިން މިއަދު ހުޅުވާލައިފިއެވެ.
އެސްޓީއޯގެ ޑިރެކްޓަރުންގެ ބޯޑަށް ކުރިމަތިލާ ފަރާތްތަކުގައި ހުންނަންވާ ޝަރުތުތައް، އެ ކުންފުނިން މިއަދު ކުރި އިއުލާނުގައި ބަޔާން ކޮށްފައިވާއިރު އެކުންފުނީގެ ބޯޑަށް ކުރިމަތިލާން ބޭނުންވާ ހިއްސާދާރުން، ކުންފުނީގެ ޑިރެކްޓަރުންގެ ބޯޑަށް ކުރިމަތިލުމަށް އެދި ހުށަހަޅާ ފޯމް އަދި ފޯމާއެކު ހުށަހަޅަންޖެހޭ ޑޮކިއުމަންޓްތައް ފުރިހަމަކުރުމަށްފަހު [email protected] އަށް އީމެއިލް ކުރުމަށް ނުވަތަ އެ އެސްޓީއޯގެ ވެބްސައިޓްގައި ގާއިމްކުރެވިފައިވާ ޕްލެޓްފޯމް މެދުވެރިކޮށް ހުށަހެޅުމަށް ވަނީ އެދިފައެވެ.
އެސްޓީއޯ އިން ބުނީ މިމަހުގެ 24ވަނަ ދުވަހުގެ ހެނދުނު 10:00 ގެ ކުރިން ފޯމު ހުށަހަޅަން ވާނެ ކަމަށެވެ. އެސްޓީއޯގެ އިއުލާނުގައި އެ މަގާމަށް އަންހެން ބޭފުޅުން ކުރިމަތިލުމަށް ބާރު އަޅާފައިވެއެވެ.
އެ އިއުލާނާއެކު، ޑިރެކްޓަރުންގެ ބޯޑުގައި ސަރުކާރު ތަމްސީލު ކުރާ ޑިރެކްޓަރުން ނޮމިނޭޓު ކޮށްދެއްވުމަށް އެދި ޕީސީބީއަށް ވެސް މިއަދު ނޯޓިސް ހުށަހަޅާފައިވާ ކަމަށް އެސްޓީއޯއިން ބުނެއެވެ.