ހުޅުމާލެ ދެވަނަ ފިޔަވަހީގައި އިމާރާތް ކޮށްފައިވާ ވިނަރެސް ފްލެޓުތައް ލިބުނު ފަރާތްތަކުގެ ތެރެއިން ޕޮއިންޓުގެ ގޮތުން އެއްވަރުވި މީހުންގެ މެދުގައި ގުރުއަތު ނެގުމަށް ނިންމާފައިވާ ކަމަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ނިންމައިފިއެވެ.

އެޗްޑީސީ އިން މިއަދު ޕްލޭނިން އެންޑް ހައުސިން މިނިސްޓްރީން މުރާޖައުކޮށްފައިވާ ލިސްޓްގައި އެ މިނިސްޓްރީގެ މިންގަނޑުތަކާއި އެއްގޮތަށް ޕޮއިންޓް ދެވިފައިވާއިރު ޕޮއިންޓްގެ ގޮތުން އެއްވަރުވެފައިވާ ފަރާތްތަކުގެ ތަރުތީބު ކަނޑައެޅުމަށް ހަމަޖެހިފައިވަނީ އެ ފަރާތްތަކުގެ މެދުގައި ގުރުއަތު ލައިގެން ކަމަށެވެ. އެގޮތުން، ގުރުނެގުން 29 މާރިޗް 2023 ވަނަ ދުވަހު އެޗްޑީސީގައި ކުރިއަށް ގެންދެވޭނެ ކަމަށް އެ މިނިސްޓްރީން ބުނެއެވެ.
އެޗްޑީސީން ބުނީ އެ ލިސްޓުގައި ހިމެނޭ ފަރާތްތަކުގެ ތެރެއިން މައި-އެޕްލިކަންޓް އަދި ކޯ-އެޕްލިކަންޓް ގޮތުގައި އެއް ފޯމަށްވުރެ ގިނަ ފޯމުގައި ނަން ހިމަނާފައިވާ ފަރާތްތަކާއި އަދި ދެމަފިރިން ވަކިން ފޯމު ހުށަހަޅާފައި ފަރާތްތަކުން އެއް އެޕްލިކޭޝަން ދޫކޮށްލުމަށް އީމެއިލްކޮށް އަދި އެޕްލިކޭޝަން ދޫކޮށްލުމަށް އެއްބަސްވެވޭ ފޯމުގައި ސޮއިކޮށްފައިވާ ފަރާތްތައް އެ ލިސްޓުން އުނިކުރެވިފައިވާ ކަމަށެވެ.
އެކޯޕަރޭޝަނުން ބުނީ ދާއިމީ ލިސްޓް ޝާއިއުކުރުމަށްފަހު އެޕްލިކޭޝަން ދޫކޮށްލުމަށް އެދި އެ ކޯޕަރޭޝަނަށް ހުށަހަޅާފައިވާ ފަރާތަކަށް ދެވަނަ ފަހަރަށް އެޕްލިކޭޝަނާއިގެން ކުރިއަށް ދިއުމުގެ ފުރުސަތު ނުދެވޭނޭ ކަމަށެވެ. އެ މަރުހަލާ ފުރިހަމަވުމުން ބުކިން ފީ ނެގުމާއި 'ވިނަރެސް' އެޕާޓްމަންޓް އިހްތިޔާރު ކުރުން އެ ކޯޕަރޭޝަނުން ކުރިއަށް ގެންދާނީ ގުރުނެގުމަށްފަހު ލިސްޓް ތަރުތީބުކޮށް ޝާއިއުކުރެވޭ ލިސްޓާއި އެއްގޮތަށް ކަމަށެވެ.
ލިސްޓު ތަރުތީބު ކުރުމަށް ނެގޭ ގުރުއަތުލުން އެ ކޯޕަރޭޝަނުގެ ރަސްމީ "ފޭސްބުކް ޕޭޖް" އިން ލައިވް ކުރާނެއެވެ. އަދި ގުރުނެގުން ކުރިއަށްދާ ގޮތް އޮބްސަރވް ކުރުމަށް، ދެ ކެޓެގެރީއިން ވެސް މަދުވެގެން ފަސް ފަރާތަށް ދައުވަތު އެރުވޭނެ ކަމަށެވެ. އަދި، އެކަމާ ގުޅޭގޮތުން އެ ފަރާތްތަކަށް ފޯނުގެ ޒަރީއާއިން ގުޅާނީ ހަމައެކަނި އެ ކޯޕަރޭޝަނުގެ ހޮޓްލައިން ނަންބަރު 3353535 މެދުވެރިކޮށް ކަމަށް ވެސް އެޗްޑީސީން ބުނެއެވެ.
އެ ނަންބަރުގެ އިތުރުން އެ ކޯޕަރޭޝަނުން އެއްވެސް މޯބައިލް ފޯނު ނަންބަރަކުން ވިނަރެސް ހައުސިންގް މަޝްރޫއު އާއި ގުޅޭގޮތުން އެއްވެސް ފަރާތަކަށް ނުގުޅާނެ ކަމަށް އެޗްޑީސީން ބުނެއެވެ. އަދި އެކަމާ ގުޅޭގޮތުން އެސް.އެމް.އެސް ނުވަތަ އެއްވެސް ލިންކެން ވެސް ނުފޮނުވާނެ ކަމަށް އެޗްޑީސީން ބުނެއެވެ.