ރާއްޖޭގައި އޮޓޯ ރިކްޝާ ނުވަތަ ދިވެހިންގެ މެދުގައި މަޝްހޫރު ނަމުން ނަމަ "ކުރޮޅި" ރަޖިސްޓްރީ ކުރެވޭ ގޮތަށް އެއްގަމު އުޅަނދު ދުއްވުމުގެ ލައިސަންސް ދޫކުރުމުގެ ގަވާއިދަށް އިސްލާހު ގެނެސްފައިވާ ކަމަށް ބުނެވޭ ވާހަކަތައް ދޮގުކޮށްފިއެވެ.

ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު "ހަތާވީސް" އަށް މިރޭ ވިދާޅުވީ އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދުގައި ބަޔާންކޮށްފައި ވަނީ ލައިސަންސްގެ ކެޓަގަރީތަކެއް ކަމަށެވެ. އެ ކެޓަގަރީ ތަކުގައި B3 ، B4 ، C3 އަދި C4 އުޅަނދު ބަޔާންކޮށްފައި ވުމާއި އަދި އެ އުޅަނދުތަކުގެ ކެޓަގަރީތައް ރަޖިސްޓްރޭޝަން ގަވާއިދުގައި ބަޔާންކޮށްފައި ނެތުމުގެ ސަބަބުން ރަށްރަށުގައި ބޭނުންކުރާ 3 ފުރޮޅުލީ މީހުން އުފުލާ "ބަގީ" ތަކާއި ރަށު ޕިކަޕް ރަޖިސްޓަރީ ކުރުމުގައި ދަތިތަކެއް ކުރިމަތިވަމުން ދިޔަ ކަމަށް އޭނާ ވިދާޅުވިއެވެ.

ލައިސަންސް އިން ގަވާއިދުގައި B3 ކެޓަގަރީގައި ހިމެނޭނީ، މީހުން އުފުލުމަށް ބޭނުންކުރާ، އިށީނުމުގެ ޖާގަ ތިން މީހުންނަށް ވުރެ އިތުރުނުވާ، ފަސިންޖަރުން އުފުލާ، 3 ފުރޮޅުލީ އުޅަނދުތައް ކަމަށާއި އެގޮތުން އެ އުޅަނދުތަކަކީ މިހާރުވެސް މީހުން އުފުލާ "ބަގީ" ގެ ގޮތުގައި ފަސިންޖަރުން އުފުލުމަށް ރާއްޖޭގެ ރިޒޯޓުތަކުގައާއި ބައެއް ރަށްރަށުގައި ބޭނުންކުރާ އުޅަނދުތަކެއް ކަމަށް އަލީ ވިދާޅުވިއެވެ.

"މި ގަވާއިދަށް މި ގެނެ ވުނު އިސްލާހުގެ މައިގަނޑު ބޭނުމަކީ ލައިސަންސް ކެޓަގަރީގައި މިދެންނެވި 3 ފުރޮޅުލީ އުޅަނދުފަހަރަށް ލައިސަންސް ދެމުންގެންދާއިރު މި އުޅަނދުތަކަކީ ކޮބައިކަން ރަޖިސްޓްރޭޝަން ގަވާއިދުން ބަޔާންކޮށް އެ ކެޓަގަރީތައް ރަޖިސްޓަރީތަކުން ފެންނާނެގޮތަށް ކެޓަގަރައިޒު ކުރުން،" އަލީ ސޯލިހް ވިދާޅުވިއެވެ.

އޭނާ ވިދާޅުވީ އެކަން އެގޮތަށް ކަނޑައެޅުމުގެ ކުރިން ލައިސަންސް ގަވާއިދާއި ރަޖިސްޓްރޭޝަން ގަވާއިދާއި ފުށުއެރުންތައް ހުރުމާއި އަދި 3 ފުރޮޅުލީ މީހުން އުފުލާ "ބަގީ" އުޅަނދު ރަޖިސްޓަރީ ކުރުމުގައި ބޮޑެތި ފުށުއެރުންތަކެއް ރަޖިސްޓްރޭޝަން ސިސްޓަމުގައި ފާހަގަކުރެވިފައިވާ ކަމަށެވެ.

"ހަމައެހެންމެ ގަވާއިދުން 3 ފުރޮޅުލީ "ބަގީ" ތަކަށް ވަކި ކެޓަގަރީއެއް ނެތި އޮތް އޮތުމުގެ ސަބަބުން ރިޒޯޓުތަކުގައާއި ރަށްރަށުގައި މިހާރުވެސް ބޭނުންކުރަމުންދާ މިފަދަ އުޅަނދުތައް ވަނީ ރަޖިސްޓަރީ ނުކުރެވިއެވެ. މިގެނެވުނު ބަދަލާއެކު މިކަމަށް ހައްލެއް ގެނެވިގެން ދާނެ،" އަލީ އިތުރަށް ވިދާޅުވިއެވެ.

ސިޓީ ކައުންސިލްތަކާއި ރަށު ކައުންސިލްތަކުން ގަރާޖުގެ ގޮތުގައި ޕާމިޓު ދޫކުރަމުންދާނީ ހަތަރު ފުރޮޅު ލީ އުޅަނދު ފަހަރަށެވެ. އަދި މިހާރު ޓްރާންސްޕޯޓު މިނިސްޓްރީން އުޅަނދުތައް ރަޖިސްޓަރީ ކުރާއިރު އެ އުޅަނދުގެ ފޮޓޯ ބަލައި އެ އުޅަނދަކީ ކޮންކަހަލަ އުޅަނދެއްކަން ޔަގީން ކުރަމުންދެއެވެ.

"އެހެންކަމުން "އޮޓޯ ރިކްޝޯ" އަދި "އޮޓޯ" ގެ ގޮތުގައި ބެލެވޭ އުޅަނދުފަހަރު ރަޖިސްޓަރީ ކުރުމުގެ ފުރުސަތު ނެތްވާހަކަ ދެންނެވީމެވެ،" އަލީ ވިދާޅުވިއެވެ.

އޭނާ ވިދާޅުވީ އެފަދަ އެއްވެސް އުޅަނދެއް ރާއްޖޭގެ ރަށެއްގައި އޮޕަރޭޓް ކުރުމަށް ހުއްދަ ދީފައި ނުވާނެ ކަމަށެވެ.