ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ބައި އިލެކްޝަންގައި އެމްޑީޕީން ނުކުންނާނެ ކެންޑިޑޭޓަކު ހޮވުމަށް މިއަދު ބޭއްވި ޕްރައިމަރީ އިބްރާހިމް ޝާޒް ކާމިޔާބު ކުރައްވައިފިއެވެ.

ޕްރައިމަރީގެ ވަގުތީ ނަތީޖާއިން ދައްކާ ގޮތުން ކ. ގުރައިދޫއަށް އުފަން، ޝާޒް، ޕްރައިމަރީ ކާމިޔާބު ކުރެއްވީ 311 ވޯޓު ހޯއްދަވައިގެންނެވެ. އެއީ ވޯޓުލީ މީހުންގެ 53 ޕަސެންޓް ވޯޓެވެ. އޭނާއާ އެންމެ ކައިރިން ވާދަ ކުރެއްވީ ކ. މާފުށި، މާފަރިވާގެ، ސަލްމާން ރަޝީދެވެ. ސަލްމާންއަށް ލިބިވަޑައިގެންނެވީ 190 ވޯޓެވެ. އެއީ ވޯޓުލީ މީހުންގެ 32.6 ޕަސެންޓް ވޯޓެވެ. ޕްރައިމަރީގައި ހަތަރު ކެންޑިޑޭޓުން ވާދަ ކުރެއްވިއެވެ.

ވާދަކުރި ކެންޑިޑޭޓުންނަށް ލިބުނު ވޯޓު:

1- މުޙައްމަދު މުސްތަފާ – ވިވިޑް / ކ. މާފުށި، 66 ވޯޓު
2- ސަލްމާން ރަޝީދު – މާފަރިވާގެ / ކ. މާފުށި، 190 ވޯޓު
3- އިބްރާހިމް ޝާޒް – ފައިވްރޯޒް / ކ ގުރައިދޫ، 311 ވޯޓު
4- އަބްދުﷲ ސައީދު – ވެލި / ކ. ގުރައިދޫ، 15 ވޯޓް

ގުރައިދޫ ދާއިރާގައި ހިމެނެނީ ތިން ރަށެވެ. އެއީ ކ. ގުރައިދޫ، ކ. ގުޅި، އަދި ކ. މާފުށްޓެވެ.

އެމްޑީޕީ ޕްރައިމަރީގެ ވޯޓާސް ލިސްޓުން ދައްކާ ގޮތުން، އެ ދާއިރާގައި ވޯޓުލުމުގެ ހައްގު ލިބިގެންވާ މީހުންގެ އަދަދު 800 އަށްވުރެ، ގިނައެވެ. ޕްރައިމަރީގައި ވޯޓުލާފައި ވަނީ ޖުމްލަ 590 މީހުންނެވެ.

އަންނަ މަހުގެ 15 ވަނަ ދުވަހު އިލެކްޝަންސް ކޮމިޝަނުން ބާއްވާ ގުރައިދޫ ދާއިރާގެ މަޖިލިސް ބައި އިލެކްޝަންގައި ވޯޓުލުމުގެ ހައްގު 3،000 ވުރެ ގިނަ މީހުންނަށް ލިބިގެންވެއެވެ.

ގުރައިދޫ ދާއިރާގެ ބައި އިލެކްޝަން ބާއްވަން އިއުލާން ކުރީ އެ ދާއިރާގެ މެމްބަރު އިބްރާހިމް ރިޒާ އަވަހާރަވުމާ ގުޅިގެންނެވެ. ރިޒާ އަވަހާރަވީ މިދިޔަ މަހުގެ 23 ވަނަ ދުވަހު މެލޭޝިއާގައެވެ. އަވަހާރަވީ ކެންސަރަށް ފަރުވާ ހޯއްދަވަމުން ގެންދަވަނިކޮށެވެ.