ކުނި މެނޭޖު ކުރުމުގެ މަސައްކަތް ކުރަމުން އަންނަ ވޭސްޓް މެނޭޖުމަންޓް ކޯޕަރޭޝަން (ވެމްކޯ) ލިބެންޖެހޭ ކުނި ފީ އަންނަ މަހުން ފެށިގެން ކަރަންޓު ބިލުގައި ހިމެނުމަށް ނިންމައިފިއެވެ.

އެންވަޔަރަމަންޓް މިނިސްޓްރީން މިއަދު ނެރެފައިވާ ބަޔާނެއްގައި ބުނީ މާލެ ސަރަހައްދުގައި ކުނި މެނޭޖްކުރުމަށް ދިމާވެފައިވާ މައްސަލަ އަށް ހައްލު ހޯދުމަށްޓަކައި އެ މިނިސްޓްރީން ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން މާލޭގައި ކުނި މެނޭޖްކުރުމުގެ ހިދުމަތް ފޯރުކޮށްދިނުމުގައި ހަރަކާތްތެރިވާ ވެމްކޯ އަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ އެ ކޯޕަރޭޝަނުން ފޯރުކޮށްދޭ ހިދުމަތްތަކަށް ކަނޑައަޅާފައިވާ ފީ ހިދުމަތް ލިބިގަންނަ ބައެއް ފަރާތްތަކުން ގަވާއިދުން ނުދައްކާ މައްސަލަ ކަމަށް އެ މިނިސްޓްރީން ބުންޏެވެ.

އެކަމުގެ ސަބަބުން އެކުންފުނީގެ ކޭޝްފްލޯ ދަތިވެ ހިދުމަތް ފޯރުކޮށްދިނުމަށް ބޭނުންކުރަމުންދާ ބައެއް އާލާތްތައް ކަމަށްވާ ކުނި އުފުލާ އުޅަނދުތަކާއި ކުނި ޕްރޮސެސް ކުރުމަށް ބޭނުންކުރާ އާލަތްތައް އެކަށީގެންވާ ގޮތެއްގައި މަރާމާތު ނުކުރެވި ބޭނުން ނުކުރެވޭ ހާލަތަށް އަންނަ ކަމަށް އެންވަޔަރަމަންޓް މިނިސްޓްރީން ބުނެއެވެ. އެ މިނިސްޓްރީން ބުނީ އެކަން ހައްލުކުރަން ކުރަންޖެހޭ ހަރަދު އިތުރުވެ، މިކަމުގެ ސަބަބުން ގަވާއިދުން ކުނި ކަލެކްޓްކޮށް މެނޭޖްކުރުމަށް ބޮޑެތި ގޮންޖެހުންތައް ކުރިމަތިވާ ކަމަށެވެ.
މާލެ ސަރަޙައްދުގައި ކުނި ފީދައްކަން ޖެހޭ ޖުމްލަ 53,690 ގެބިސީ ހުރެއެވެ. ނަމަވެސް ވެމްކޯގެ ހިދުމަތަށް ރަޖިސްޓްރީ ކޮށްގެން ބަރާބަރަށް ފީ ދައްކަމުން އަންނަނީ ގާތްގަނޑަކަށް 20,000 ގެބިސީއިންނެވެ. އެންވަޔަރަމަންޓް މިނިސްޓްރީން ބުނީ އެކަމުގެ ސަބަބުން ދެމެހެއްޓެނިވި ގޮތެއްގައި އެ ހިދުމަތްދިނުމަށާއި، އަދި ކުނި މެނޭޖްކުރުމަށް ގެނެވޭ ބޮޑެތި ބަދަލުތަކުގެ ހަރަދު ބެލެހެއްޓޭނީ ހިދުމަތް ހޯދާ ހުރިހާ ފަރާތަކުންވެސް ވެމްކޯއަށް ފީ ދައްކައިގެން ކަމަށެވެ. އަދި، އެންމެ ފަސޭހައިން، ހަރަދުކުޑަކޮށް އެ ފީ ލިބިގަނެވޭނެ ގޮތަކީ އާއްމު ބޭނުންތަކުގެ އެހެން ހިދުމަތެއްގެ ބިލުގައި ހިމަނާއިގެން ފީ ނަގައިގެން ކަމަށެވެ.
އެފަދަ ގޮތަކަށް ކުނި ފީ ނެގި ދާނެ ކަމަށް ކުނި މެނޭޖު ކުރުމުގެ ގާނޫނުގައި ކަނޑައަޅާފައިވެއެވެ. ކުނި މެނޭޖްކުރުމުގެ ހިދުމަތަކީ އާންމު ބޭނުންތަކުގެ ހިދުމަތްތަކުގެ ތެރޭގައި ހިމެނޭ ހިދުމަތެއްގެ ގޮތުގައި ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނުގައި ވަނީ ކަނޑައަޅާފައެވެ.
"އެހެންކަމުން ވެމްކޯއިން މާލެ ސަރަހައްދުގައި ދެމުންދާ ހިދުމަތްތަކަށް ކަނޑައަޅަފައިވާ ފީ ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ބިލުގައި ހިމަނައިގެން ނެގުމަށް ވަނީ މިހާރު ނިންމާފައެވެ،" އެންވަޔަރަމަންޓް މިނިސްޓްރީން ބުންޏެވެ.
ވެމްކޯ އިން މާލެ ސަރަހައްދުގައި ދެމުންގެންދާ ކުނި މެނޭޖްކުރުމުގެ ހިދުމަތްތަކަށް ކަނޑައަޅާފައިވާ ފީ ސްޓެލްކޯގެ ބިލުގައި ހިމަނައިގެން އަންނަ މަހުގެ އެއްވަނަ ދުވަހުން ފެށިގެން ނެގުމަށް ވެމްކޯއަށް ހުއްދަ ދީފައިވާ ކަމަށް ވެސް އެންވަޔަރަމަންޓު މިނިސްޓްރީގެ ބަޔާނުގައިވެއެވެ. އެބަދަލާ ގުޅިގެން ސީދާ ވެމްކޯއިން މާލޭގައި ހިދުމަތް ދެމުންގެންދާ ތަންތަނުން (ގޭ ބިސީތަކާއި ވިޔަފާރިތަކާއި، ކޯލް އެންޑް ޕިކަޕް ސާރވިސް) މިހާރުވެސް ނަގާފީއަށް އެއްވެސް ބަދަލެއް ނާންނާނެ ކަމަށްވެސް އެ މިނިސްޓްރީން ބުނެއެވެ.
އެގޮތަށް ފީ ނަގަން ފެށުމުން ވެމްކޯގެ ހިދުމަތަށް ރަޖިސްޓްރީ ނުކުރި ނަމަވެސް މާލޭ ސަރަހައްދުގެ ހުރިހާ ގޭބިސީތަކުން ވެމްކޯއިން ގަވާއިދުން ކުނި ނަގަމުންގެންދާނެ ކަމަށާއި އެކަމަކު ގެތަށް ސާފުކޮށްފައި އުކާލާ ބޮޑެތި ކުނި ނުވަތަ ބަލްކީ ވޭސްޓް އެބައިގެ ތެރޭގައި ނުހިމެނޭނެ ކަމަށް އެންވަޔަރަމަންޓް މިނިސްޓްރީން ބުނެއެވެ.