ސްޓެލްކޯގައި ގިނަ ދުވަހު ހިދުމަތް ކޮށްފައިވާ މުވައްޒަފުންގެ ތެރެއިން ހަތަރު މުވައްޒަފަކަށް ހައްޖާއި އުމްރާވުމުގެ ފުރުސަތު ދީފިއެވެ.

ރޭ ސްޓެލްކޯ އިން ވަނީ ބައިނަލްއަގުވާމީ އަންހެނުންގެ ދުވަހާއި އަދި ރަމަޟާން މަހަށް ތައްޔާރުވުމުގެ ގޮތުން ކުޑަގިރީގައި ހާއްސަ ހަފްލާއެއް ބާއްވައިފައެވެ. އެ ހަފްލާގައި ހައްޖާއި އުމްރާވުމަށް ހަތަރު މުވައްޒަފަކަށް ވަނީ ފުރުސަތު ދީފައެވެ.

އެ ފުރުސަތު ދީފައި ވަނީ ކުންފުންޏަށް 15 އަހަރު ހިދުމަތް ކޮށްދީފައިވާ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ. އަދި އުމްރާގެ އަޅުކަމުގެ ފުރުސަތު ދެނީ ކުންފުންޏަށް 5 އަހަރު ހިދުމަތް ކޮށްދީފައިވާ މުވައްޒަފުންގެ ތެރެއިން އެކަމަށް ކުރިމަތިލާ މުވައްޒަފުންނަށެވެ. އެ ފުރުސަތު ހުޅުވާލީ އަންހެން އަދި ފިރިހެން މުވައްޒަފުންނަށް ވަކިންނެވެ.

އެކުންފުނިން ބުނީ އެކަމަށް އިޖާބަދީ ހައްޖުގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ ފިރިހެން 96 މުވައްޒަފުން އަދި އަންހެން 22 މުވައްޒަފުން ކަމަށެވެ. އަދި އުމުރާގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ ފިރިހެން 262 މުވައްޒަފުން އަދި އަންހެން 56 މުވައްޒަފުން ކަމަށެވެ.

އެ މުވައްޒަފުންގެ މެދުގައި ގުރުއަތުލައިގެން ހައްޖުގެ އަޅުކަން އަދާކުރުމަށް ފިރިހެން މުވައްޒަފުންގެ ތެރެއިން ހޮވިފައި ވަނީ ޓްރާންސްމިޝަން، އެންޑް ޑިސްޓްރިބިއުޝަން ޑިޕާޓްމަންޓް ޝަރީފު އަދި ފައިނޭންސް އެންޑް އެކައުންޓްސް ޑިޕާޓްމަންޓް ޙަދީޖާ ތައުފީގާއެވެ.

އުމްރާގެ އަޅުކަން އަދާކުރުމަށް ހޮވިފައިވާ ފިރިހެން މުވައްޒަފަކީ، ސާވިސް ސެންޓަރުގެ ޝާހުލް ހަމީދު، އަދި ޕްރޮކިއުމަންޓް ޑިޕާޓްމަންޓްގެ ފާތިމަތު ރިޒްނާއެވެ.