ހަ ރަށެއްގެ އިސްމެޖިސްޓްރޭޓުގެ މަގާމަށް ކުރިމަތިލުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ހުޅުވާލައިފިއެވެ.

ޖޭއެސްސީ އިން ވަނީ ނ. އަތޮޅާއި ގއ. އަތޮޅާއި މ. އަތޮޅާއި ވ. އަތޮޅުގެ އިތުރުން ބ. އަތޮޅުގެ އަދި ށ. އަތޮޅުގެ އިސްމެޖިސްޓްރޭޓުގެ މަގާމަށް ކުރިމަތިލުމުގެ ފުރުސަތު ހުޅުވާލައިފައެވެ.

ޖޭއެސްސީން ބުނީ އެ މަގާމުގެ އަސާސީ މުސާރައިގެ ގޮތުގައި 23,150 ރުފިޔާ ލިބިގެން ދާނެ ކަމަށެވެ. އަދި މެޑިކަލް އެލަވަންސާއި ފޯނު އެލަވަންސް ވެސް ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތިން ލިބިގެން ދާނެ ކަމަށް ޖޭއެސްސީ އިން ބުނެއެވެ.

އެ މަގާމަށް ކުރިމަތިލެވޭނީ ކުރިމަތިލާން ހުޅުވާލި އަތޮޅުގެ އެއްވެސް ރަށެއްގެ މެޖިސްޓްރޭޓުގެ މަގާމު ނުވަތަ މެޖިސްޓްރޭޓްކަމުގެ މަގާމު އަދާކުރަމުން ގެންދާ ފަރާތަކަށް ކަމަށް ޖޭއެސްސީ އިން ބުނެއެވެ.

ޖޭއެސްސީ އިން ބުނީ އެ މަގާމަށް ކުރިމަތިލާން ޝައުގުވެރިވާ ފަރާތްތަކުން މިމަހުގެ 21ވަނަ ދުވަހުގެ 12:00ގެ ކުރިން ހުށަހަޅަން ވާނެ ކަމަށެވެ.