މުއްދަތު ހަމަވެފައިވާ ލައިސަންސް ބޭނުން ކުރެވޭ މުއްދަތު ޓްރާންސްޕޯޓު މިނިސްޓްރީން އަނެއްކާވެސް އިތުރުކޮށްފިއެވެ.

އެ މިނިސްޓްރީން ވަނީ މުއްދަތު ހަމަވެފައިވާ ލައިސަންސް ބޭނުންކޮށްގެން އެއްގަމު އުޅަނދު ދުއްވޭނެ ކަމަށް ކުރިން އެ މިނިސްޓްރީން އާއްމު ކޮށްފައިވާ އިއުލާނުގައި ކަނޑައެޅި މުއްދަތު މިމަހުގެ ނިޔަލަށް އިތުރު ކޮށްފައެވެ.

މީގެކުރިން އެ މުއްދަތު އޮތީ މިދިޔަ މަހުގެ ނިޔަލަށެވެ. ނަމަވެސް އެ މިނިސްޓްރީން މިއަދު ކޮށްފައިވާ އިއުލާނެއްގައި ބުނީ މުއްދަތު ހަމަވެފައިވާ ލައިސަންސް ބޭނުންކުރުމުގެ މުއްދަތު މިމަހުގެ ނިޔަލަށް އިތުރު ކޮށްފައިވާ ކަމަށެވެ.

އެ މިނިސްޓްރީން އެގޮތަށް ނިންމާފައި މިވަނީ ލައިސަންސް ޑިޖިޓަލް ކުރުމުގެ މަސައްކަތް ކުރުމުގެ ގޮތުންނެވެ. އަލަށް ލައިސަންސް ދޫކުރާއިރު ދެން ދޫކުރާނީ ޑިޖިޓަލް ލައިސަންސް ކަމަށްވެސް އެ މިނިސްޓްރީން ބުނެއެވެ.

ޑިޖިޓަލް ލައިސެންސް ތައާރަފު ކުރުމުގެ ގޮތުން ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވީ، އެ ހިދުމަތަކީ ޓްރާންސްޕޯޓު މިނިސްޓްރީގެ ހިދުމަތްތައް އޮންލައިން ކުރުމުގެ ފުރަތަމަ ފިޔަވަޅު ކަމަށާއި މީގެފަހުން ދެން އެއްވެސް ވަރަކަށް ލައިސަންސް ޕްރިންޓު ނުކުރާނެ ކަމަށެވެ.