ކޮވިޑް-19 ގެ ވައިރަހަކީ ޗައިނާއިން އުފެދިގެން އައި ވައިރަހެއް ކަމަށްބުނެ ބަހުސް ކުރެވެމުންދާތާ އެތައް ދުވަސްތަކެއް ވެއްޖެއެވެ. އެކަމަކު އަދި މިހާތަނަށް ދެކެވޭ ވާހަކަތަކަށް ބާރުދޭވަރުގެ ހެއްކެއް ހޯދިފައެއް ނުވެއެވެ. އެ ވާހަކަތައް އަނެއްކާވެސް ދެކެވެން ފަށާފައިމިވަނީ އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) ގެ ޑިރެކްޓަރު ކްރިސްޓޮފާ ރޭ މި ފަހުން ދެއްކެވި ވާހަކައަކާއި ގުޅިގެންނެވެ. އެމެރިކާގެ ފޮކްސް ނިއުސް އަށް ދެއްވި އިންޓަވިއުއެއްގައި އެފްބީއައިގެ ޑިރެކްޓަރު ވަނީ ވައިރަސް އުފެދުނީ ޗައިނާގެ ލެބޯޓްރީއެއްގައި ލީކުވެގެން ކަމަށް ބެލެވޭ "ތިއަރީ" އަށް ތާއީދު ކުރައްވާފައެވެ. އެ ލެބަކީ ވޫހާން ސިޓީގައި ހުންނަ ލެބެއް ކަމަށްވެއެވެ.

"އެފްބީއައި އިން މިހާރު ވަރަށް ގިނަ ދުވަސްތަކެއް ވަންދެން އެސެސްކޮށްފައި އޮތީ ޕެންޑެމިކްގެ އަސްލަކީ ވޫހާންގައި ދިމާވި ލެބް ހާދިސާއެއް ކަމަށް،" ރޭ ވިދާޅުވިއެވެ. އޭނާ ވިދާޅުވި ގޮތުގައި އެ އެސެސްމަންޓަކީ ސައިންސްވެރިން ހިމެނޭ ގޮތަށް އެ އެޖެންސީގެ އެނަލިސްޓުން ކުރި ދިރާސާތަކުގެ މައްޗަށް ބިނާކޮށް ހަދާފައިވާ އެސެސްމަންޓެއް ކަމަށެވެ.

https://twitter.com/clashreport/status/1630822173890732032

"މިކަމާ ގުޅުންހުރި އަޅުގަނޑުމެންގެ މަސައްކަތް ކުރިއަށް ދާނެ" ރޭ ވިދާޅުވިއެވެ. އެފްބީއައިގެ ޑިރެކްޓަރު އެހެން ވިދާޅުވެފައިވީ ނަމަވެސް އެމެރިކާގެ ހަތަރު ފެޑެރަލް އެޖެންސީއަކުން ނިންމާފައިވަނީ ބަލި އެންމެ ފުރަތަމަ ފެތުރުނީ ޖަނަވާރުންގެ ފަރާތުން އިންސާނުންނަށް ކަމަށެވެ.

ވައިރަސްލީކުވި ކަމަށް އެފްބީއައިއިން ނިންމީ ކޮން ކަންތައްތަކެއްގެ މައްޗަށް ބިނާކޮށްކަމެއް ރޭ ވިދާޅެއް ނުވެއެވެ.
ޗައިނާގެ ރައްދު ރޭ އަށް
އެފްބީއައިގެ ޑިރެކްޓަރު ކްރިސްޓޯފާ ރޭގެ ވާހަކަތަކަށް ޗައިނާ ފޮރިން މިނިސްޓްރީގެ ތަރުޖަމާނު މާއޯ ނިންގް، ރައްދު ދެއްވައި ވިދާޅުވީ ވައިރަހުގެ އަސްލު ހޯދަން އެފްބީއައިއީގެ ބައިވެރިވުމަކީ "ސިޔާސީ ކުރުން" މަސައްކަތްކުރާ ކަމުގެ ހެއްކެއް ކަމަށެވެ.

އެ ވާހަކަ ދައްކައިގެން އެމެރިކާ އަށް ޗައިނާ ބަދުނާމު ކުރުމުގައި ކާމިޔާބެއް ނުލިބޭނެ ކަމަށް މާއޯ ވިދާޅުވިއެވެ. އަދި އޭގެ ގެއްލުން ވާނީ ހަމަ އެމެރިކާއަށް ކަމަށްވެސް ވިދާޅުވިއެވެ.

"ސައިންސާއި ހަގީގަތަށް އިހުތިރާމް ކުރުމަށް އެމެރިކާއަށް އިލްތިމާސް ކުރަން" ނޫސްވެރިންގެ ބައްދަލުވުމުގައި މާއޯ ވިދާޅުވިއެވެ.
ވައިރަހުގެ މައުލޫމާތު އެނގޭނަމަ، ހާމަކުރޭ
މި ފަހުން ބޭއްވި ނޫސްވެރިންގެ ބައްދަލުވުމުގައި ޑަބްލިއުއެޗްއޯގެ ޑިރެކްޓާ ޖެނެރަލް ޓެޑްރޯސް އަދަނޮމް ގެބްރިޔޭސުސް ވިދާޅުވީ ބަލިމަޑުކަން އުފެދުނު ގޮތުގެ މައުލޫމާތެއް އެއްވެސް ގައުމަކަށް ލިބިފައިވާނަމަ އެ މައުލޫމާތު ޑަބްލިއުއެޗްއޯ އާއި ބައިނަލްއަގުވާމީ ސައިންޓިފިކް ކޮމިއުނިޓީއާ ހިއްސާކުރުމަކީ ކޮންމެހެން ކުރަން ޖެހޭ ކަމެއް ކަމަށެވެ.

https://twitter.com/WHO/status/1631672102729203712

ޓެޑްރޯސް ވިދާޅުވި ގޮތުގައި އޭގެ ބޭނުމަކީ ބަޔަކު ކުށްވެރިކުރުން ނޫން ކަމަށެވެ. ބަލިމަޑުކަން ފެށުނު ގޮތާ މެދު ކުރިއަށް ގެންދިއުމަށާއި ކުރިއަށް އޮތް ތަނުގައި ފެތުރެމުންދާ ބަލިމަޑުކަމާއި ބަލިމަޑުކަމުން ރައްކާތެރިވުމާއި އެކަމަށް ތައްޔާރުވުމުގެ ގޮތުން ކަމަށެވެ.

ބަލިފެތުރެން މެދުވެރިވި ސަބަބު ދެނެގަތުމަށް ޑަބްލިއުއެޗްއޯއިން ކުރަމުން އަންނަ މަސައްކަތްތައް ހުއްޓާލާފައި ނުވާ ކަމަށްވެސް އޭނާ ވިދާޅުވިއެވެ.

"ޑަބްލިއުއެޗްއޯއިން ދަނީ [ޗައިނާ] ޑޭޓާ ހިއްސާކުރުމުގައި ދެފުށް ފެންނަ ގޮތަށް އަމަލުކުރުމަށާއި އެކަމަށް ބޭނުންވާ ތަހުގީގުތައް ހިންގައި ނަތީޖާ ހިއްސާކުރުމަށް ގޮވާލަމުން، އެހެންވީމާ، މީގެ ހަފުތާއެއްހާ ދުވަސްކުރިންވެސް، ޗައިނާގެ މަތީ ފަންތީގެ ވެރިންނަށް، އަޅުގަނޑު އެތައް ފަހަރެއްގެ މަތިން ލިޔުއްވައި، ވާހަކަ ދައްކަވާފައި އެބަހުރި" ޓެޑްރޯސް ވިދާޅުވިއެވެ.

ޓެޑްރޯސް ވިދާޅުވީ ކޮވިޑް ޖެހިގެން މަރުވި އެތައް މިލިއަން މީހުންނާއި ކޮވިޑްގެ ބަލި ޖެހުނު މީހުންގެ ހައްގުގައި ބަލިމަޑުކަން ފެށުނީ ކިހިނެއްކަން ދެނެގަތުމަކީ ކޮންމެހެން ކުރަން ޖެހޭ ކަމެއް ކަމަށެވެ.

ޑަބްލިއުއެޗްއޯގެ ކޮވިޑްގެ ޓެކްނިކަލް ލީޑް މާރިއާ ވެން ކެރްކޯވް ވިދާޅުވީ އެފްބީއައިގެ ވެރިޔާގެ ވާހަކަތަކާ ގުޅޭ އިތުރު މައުލޫމާތު ހޯދުމަށް އެ ޖަމިއްޔާއިން ޖެނީވާގައި ހުންނަ އެމެރިކާގެ މިޝަނަށް ގުޅާފައިވާ ކަމަށެވެ.

ނަމަވެސް މިހާތަނަށް އެމެރިކާގެ ރިޕޯޓްގައިވާ ޑޭޓާތަކަށް ހިއްސާކޮށްފައިނުވާ ކަމަށެވެ.

ސައިންޓިފިކް ދިރާސާތައް ކުރިއަށް ގެންދިއުމަށް އެހީތެރިވުމުގެ ގޮތުން އެ މައުލޫމާތު ހިއްސާކުރުމަކީ ވަރަށް މުހިންމު ކަމެއް ކަމަށް އޭނާ ވިދާޅުވިއެވެ.