މާލެ ސަރަހައްދުގައި ދިރިއުޅޭ ރައްޔިތުން ޕިކްނިކް ދިއުމަށް މާލެ ކައިރީގައި ތަރައްގީ ކޮށްފައިވާ "ކުޑަގިރި ޕިކްނިކް އައިލެންޑް" އަށް ބުކިން ހެދުމަކާއި ނުލާ ދެވޭ ގޮތް ހަދައިފިއެވެ.

ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ބުނީ އެގޮތަށް ނިންމީ ގިނަ ބަޔަކަށް އެރަށަށް ދެވޭނެ ގޮތް ހެދުމަށް ކަމަށެވެ. ކުރިން އޮންނަނީ ބުކިން ހަދައިގެން ނޫނީ، އެރަށަށް ދަތުރު ނުކުރެވޭ ގޮތަށެވެ. ނަމަވެސް އެ އުސޫލު ބަދަލު ކުރުމުން ގިނަ ބަޔަކަށް މިހާރު ދެވޭނެ ކަމަށް އެޗްޑީސީ އިން ބުނެއެވެ.

ކުރިއާލާ ބުކިން ހެދުމަކާއި ނުލާ ކުޑަގިރި އަށް ދެވޭނެ ގޮތް ހެދި ނަމަވެސް، އެރަށުން ލިބޭ އެހެނިހެން ހިދުމަތްތައް ހޯދުމަށް ބުކިން ހައްދަން ޖެހޭނެ ކަމަށް އެޗްޑީސީ އިން ބުނެއެވެ.

ކުޑަގިރި ހުޅުވާލީ މިމަހުގެ 11ވަނަ ދުވަހުއެވެ. އެރަށް ހުޅުވައި ދެއްވީ ރައީސް އިބްރާހީމް މުހައްމަދު ސޯލިހެވެ. ކުޑަގިރި ހުޅުވާލި ދުވަހު އެކަނިވެސް 600އަށްވުރެ ގިނަ މީހުން އެރަށަށް ދަތުރު ދިޔައެވެ.

ކުޑަގިރިއަކީ 8 ހެކްޓަރުގެ ބިމެކެވެ. މާލެއިން ފުރައިގެން، ލޯންޗެއްގައި 15 މިނެޓުން ދެވޭ ކުޑަގިރިއަކީ މާލެ ސަރަހައްދުގެ ރައްޔިތުން ދަތުރުގޮސް، އާއިލާއާ އެކު އުފާވެރި ވަގުތުކޮޅެއް ހޭދަކޮށްލުމަށްޓަކާ ސަރުކާރުން ތަރައްގީ ކުރި ރަށެކެވެ.