ކުރިޔަށް އޮތް ރިޔާސީ އިންތިހާބުގައި މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ)ގެ ލީޑަރު އަދި މީދޫ ދާއިރާގެ މެންބަރު އަހްމަދު ސިޔާމް މުހައްމަދު ވާދަ ކުރައްވަން ނިންމަވާފައިވީ ނަމަވެސް އެ ނިންމުން ބަދަލުކުރައްވާ ރިޔާސީ އިންތިހާބުގައި ވާދަ ނުކުރައްވަން ނިންމަވައިފިއެވެ.

އެމްޑީއޭގެ ނައިބު ލީޑަރު އަލީ މައުރޫފް މިރޭ "ހަތާވީސް" އަށް ވިދާޅުވީ މިއަދު ބޭއްވި އެޕާޓީގެ ގައުމީ ކައުންސިލަށް ޕާޓީގެ ލީޑަރު، ސިޔާމް ބަޔާނެއް ހުށަހެޅުއްވި ކަމަށެވެ. އަދި މިވަގުތު ރާއްޖޭގެ ސިޔާސީ މަސްރަހާއި އިގްތިސޯދީ ހާލަތު ހުރި ގޮތުން ގައުމީ މަސްލަހަތަށް އިސްކަން ދިނުމަށް ފަހު ރިޔާސީ އިންތިހާބުގައި ވާދަ ނުކުރައްވަން ނިންމަވާފައިވާ ކަމަށެވެ.

ރިޔާސީ އިންތިހާބުގައި ވާދަ ކުރުމުގެ ޝައުގުވެރިކަން މިހާރު ސިޔާމްގެ ނެތީތޯ ސުވާލު ކުރުމުން މައުރޫފު ވިދާޅުވީ ރިޔާސީ އިންތިހާބުގައި ވާދަ ކުރުމުގެ ޝައުގުވެރިކަން ސިޔާމްގެ އަދިވެސް އެބަހުންނެވި ކަމަށެވެ. ނަމަވެސް މިވަގުތު ގައުމަށް އެންމެ މަސްލަހަތު ރަނގަޅު ގޮތަކީ އެއީ ނޫން ކަމަށް ސިޔާމް ދެކިވަޑައިގަންނަވާ ކަމަށެވެ.

މައުރޫފް ވިދާޅުވީ ސިޔާމްގެ އެ ހުށަހެޅުމާއި ގުޅިގެން ގައުމީ ކައުންސިލުން އިތުރު ގޮތެއް ނިންމާފައިވާ ކަމަށެވެ. އެއީ ރިޔާސީ އިންތިހާބުގައި ކޯލިޝަނެއް ހަދައިގެން ކުރިޔަށް ދިއުމެވެ. މައުރޫފް ވިދާޅުވީ އެކަމަށްޓަކައި ފަސް މެންބަރުންގެ ކޮމެޓީއެއް އެކުލަވާލާފައިވާ ކަމަށެވެ.

"މިވަގުތު އަޅުގަނޑުމެންނަށް ހުށަހެޅުމެއް ލިބިފައި އޮތީ އެމްޑީޕީގެ ރިޔާސީ ކެންޑިޑޭޓު އަދި ރައީސް އިބްރާހީމް މުހައްމަދު ސޯލިހުގެ. އެއީ ރަސްމީކޮށް ލިބިފައި އޮތް ހުށަހެޅުމެއް. އެހެންނަމަވެސް އެހެން ބައެއް ސިޔާސީ ޕާޓީތަކުންނާއި ޕާޓީތަކުގެ ވެރިން އަޅުގަނޑުމެންގެ ލީޑަރަށް ގުޅުއްވަމުން އެބަ ގެންދަވާ،" މައުރޫފް ވިދާޅުވިއެވެ.

ސިޔާމް ރިޔާސީ އިންތިހާބުގައި ވާދަ ނުކުރައްވާނެކަން އިއުލާން ކުރެއްވިއިރު އަދާލަތު ޕާޓީ އިން މިއަދު ވަނީ ރައީސް ސޯލިހަށް ކުރިޔަށް އޮތް ރިޔާސީ އިންތިހާބުގައި ތާއީދު ކުރުމަށް ވެސް ނިންމައިފައެވެ. އިލެކްޝަންސް ކޮމިޝަނުން ވަނީ ސެޕްޓެމްބަރު މަހުގެ 9ވަނަ ދުވަހު އިންތިހާބު ބާއްވާނެކަން އިއުލާން ކޮށްފައެވެ.