ރައްޔިތުންގެ މަޖިލީހުގެ މިއަދުގެ ޖަލްސާއިން ކެލާ ދާއިރާގެ މެމްބަރު އިބްރާހިމް ޝަރީފުގެ ނަން އިއްވައި، މަޖިލީހުގެ ޖަލްސާއިން ނެރެފިއެވެ.

އޭނާ މަޖިލީހުގެ ޖަލްސާއިން ނެރުނީ ރިޔާސަތާ ދެކޮޅަށް ތަޅުމުގައި އަޑުގަދަކުރުމުން، ރިޔާސަތުން އެންގި ގޮތަށް އަމަލު ނުކުރި ކަމަށް ބުނެއެވެ. ކެލާ ޝަރީފު މަޖިލީހުގެ ޖަލްސާއިން ނެރުނު ވަގުތު ރިޔާސަތުގައި އިންނެވީ ވިލުފުށީ ދާއިރާގެ މެމްބަރު ހަސަން އަފީފެވެ.

ރިޔާސަތާ ދެކޮޅަށް ޝަރީފު އަޑުގަދަ ކުރައްވަން ފެއްޓެވީ މަޖިލީހުގެ ރައީސް އަދި ނައިބު ރައީސް ވެސް ވަކި ސަބަބެއް ބަޔާންނުކުރައްވައި، ހަސަން އަފީފާ މަޖިލީހުގެ މިއަދުގެ ޖަލްސާގެ ރިޔާސަތު ހަވާލުކުރެއްވުމުންނެވެ.

"އިއްޒަތްތެރި ރައީސް، އަޅުގަނޑުމެން ގަވާއިދު ބުނާ ގޮތުން ރައީސަކަށް [ހަސަން އަފީފު] ތިތާކު ނީންދެވޭނެ، މިގަޑިއަކު. އެއީ ގަވާއިދު އެބަ ބުނޭ، ސަބަބު ބަޔާންކޮށް ރައީސް ނުވަތަ ނައިބު ރައީސް އެންގުމަށްފަހުގައޭ އެހެން ބޭފުޅަކާ [ރިޔާސަތު] ހަވާލު ކުރެވޭނީ. އެހެންވީމަ މިއީ ނިޒާމީ ނުކުތާއެއް،" ކެލާ ދާއިރާގެ މެމްބަރު ވިދާޅުވިއެވެ.

"ނިޒާމީ މައްސަލައެއް ކަމަށް ބަލައެއް ނުގަނެވޭނެ. އަބަދުވެސް މިކަން ކުރަމުން މި އަންނަނީ،" ޝަރީފުގެ ވާހަކައަށް ރައްދު ދެއްވުމުން، ރިޔާސަތުގައި އިންނެވި ހަސަން އަފީފު ވިދާޅުވިއެވެ.

ޝަފީރު އަޑުގަދަ ކުރައްވަން ފެއްޓެވުމުން، އޭނާއަށް ތިން ފަހަރު ނަސޭހަތްތެރިވުމަށްފަހު، މަޖިލީހުން ނުކުތުމަށް ރިޔާސަތުން އެންގެވިއެވެ.

ޝަރީފު މަޖިލީހުން ނުކުންނެވުމުން ޖަލްސާ ވަނީ އަލުން ފަށާފައެވެ.

މިއަދުގެ ޖަލްސާގައި ދާންދޫ ދާއިރާގެ މެމްބަރު ޔައުގޫބުގެ ނަން ވެސް އިއްވައި، މަޖިލީހުގެ ތަޅުމުން ވަނީ ނެރެފައެވެ.

މެމްބަރެއްގެ ނަން އިއްވައި، މަޖިލީހުން ނެރެފިނަމަ، ދެން އޭނާއަކަށް އެ ދުވަހެއްގެ ޖަކްސާއެއްގައި ބައިވެރިއެއް ނުވެވޭނެއެވެ.