ގަލޮޅު އުތުރު ދާއިރާގެ މެމްބަރު އީވާ ހުށަހެޅުއްވި ގަރާރެއްގެ ބަހުސް ހޫނުވެ، މަޖިލީހުގައި އަޑުގަދަ ކުރެއްވި ކަމަށް ވިދާޅުވެ، ދާންދޫ ދާއިރާގެ މެމްބަރު ޔައުގޫބުގެ ނަން މަޖިލީހުގައި އިއްވައި، އޭނާ މަޖިލީހުގެ ތަޅުމުން ނެރެފިއެވެ.

މަޖިލީހުގައި ބަހުސް ހޫނުވީ ދައުލަތުން ދަރަނި އަނބުރާ ދެއްކުމާ ގުޅޭ ގޮތުން ރައްޔިތުންގެ މަޖިލީހުގެ ހުށަހެޅުންތަކުގައި ބަޔާންކޮށްފައިވާ ކަންކަން ކުރުމަށް ގޮވާލައި އީވާ ހުށަހެޅުއްވި ގަރާރަކާ ގުޅޭ ގޮތުންނެވެ.

އެ ގަރާރު ހުށަހެޅުއްވުމާ އެކު، މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވަނީ އެ ގަރާރަށް ދެކޮޅު ހައްދަވާފައެވެ. އޭނާ ވިދާޅުވީ އެއީ ރާއްޖެ ބަނގޫޓުކޮށްލުމަށް ހުށަހެޅި ގަރާރެއް ކަމަށެވެ.

"މިއީ ދިވެހިރާއްޖޭގެ ބަނގުރޫޓޫކޮށްލަން އިދިކޮޅު ފަރާތްތަކުން ރާވަމުން ގެންދިޔަ ރޭވުމުގައި، މިދިޔަ އަހަރު 4 އަހަރު ރޭވުމުގެ ތެރެއިން، އަނެއްކާވެސް އާ ބޮޅެއް،" މާލިއްޔަތު ކޮމެޓީގެ މެމްބަރުކަން ވެސް ކުރައްވާ ޝަރީފު ވިދާޅުވިއެވެ.

މަވޯޓާގެ ވާހަކައަށްފަހު، ދެން ވާހަކަ ދެއްކެވީ ހުޅުދޫ ދާއިރާގެ މެމްބަރު އިލްޔާސް ލަބީބެވެ. އޭނާ ދެއްކެވި ވާހަކަތަކަށް ޔައުގޫބު ގެންދެވީ އިންކާރުކޮށް، މަޖިލީހުގައި ވާހަކަ ދައްކަވަމުންނެވެ. އެއާ ގުޅިގެން، ރިޔާސަތުން ވަނީ ޔައުގޫބަށް ނަސޭހަތްތެރިވެފައެވެ. ޔައުގޫގު އަޑުގަދަ ކުރެއްވުން ހުއްޓަވާ ނުދެއްލުވުމުން، ރިޔާސަތުން ވަނީ އޭނާގެ ނަން އިއްވައި، މަޖިލީހުގެ ތަޅުމުން ނެރެފައެވެ.

މަޖިލީހުގައި ނަން އިއްވުމުން، އެ މެމްބަރަކަށް ދެން އެ ދުވަހެއްގެ ޖަލްސާއެއްގައި ބައިވެރިނުވެވޭނެއެވެ.