އެކަކު އަނެކަކަށް އިނގިލި ދިއްކުރުމުގެ ބަދަލުގައި އެކަކު އަނެކަކުގެ އަތުގައި ހިފައިގެން އެކުގައި ކުރިޔަށް ދާން ދަސް ކުރަން ޖެހޭ ކަމަށް ފޮރިން މިނިސްޓަރު ޝާހިދު ވިދާޅުވެއްޖެއެވެ.

ސާދަ ސަތޭތަ ސާޅީސް ހަތަރުވަނަ އަހަރުގެ ޝަހީދުންގެ ދުވަސް ފާހަގަކުރުމަށް ބ.ތުޅާދޫގައި ބޭއްވި ޖަލްސާ ޝަރަފުވެރި ކޮށްދެއްވާ ވާހަކަދައްކަވަމުން ޝާހިދު ވިދާޅުވީ ދިވެހިންގެ ގައުމިއްޔަތު ބިނާވެފައި ވަނީ ދިވެހި ފަސްގަނޑަށް ލޭ އޮހުރުވާލި ވަރުގަދަ ބަތަލުންތަކެއްގެ މަތިވެރި ގުރުބާނީތަކެއްގެ މައްޗަށް ކަމަށެވެ. ދިވެހި ރައްޔިތުންގެ ތެރެއިން އެންމެ ރައްޔިތަކުވެސް ރާއްޖެ އަށް އަދަށްވުރެ ފަހި މާދަމާއެއް ގެނައުމަށް ކުރަމުން ގެންދާ އުއްމީދަކަށް ބަދަލެއް ނުގެންނަ ކަމަށް ޝާހިދު ވިދާޅުވިއެވެ.

"އަޅުގަނޑުމެންގެ އަބަދުވެސް އުއްމީދަކީ މިއަދަށްވުރެ ރަނގަޅު މާދަމާއެއް ގެނައުން. ސާބިތުކަން މަތީގައި އަޅުގަނޑުމެން ތިބުން،" ޝާހިދު ވިދާޅުވިއެވެ.

ޝަހީދެއްގެ ހަށިގަނޑުން ބިމަށްޖަހާ ލޭތިއްކަކީ ގައުމިއްޔަތު އުފެދި އާރާސްތުކޮށްދޭނެ ގަހެއް ކަމަށް ވިދާޅުވެ ވާހަކަފުޅުދައްކަވަމުން ޝާހިދު ވިދާޅުވީ އެއީ ދިވެހި ބިމުގައި އުފެދިގެންދާ ގައުމިއްޔަތު އެކުލަވާލެވެމުންދާ މޫގަނޑެއް ކަމަށެވެ.

"އެ މުލުން ފަޅާ އެކިއެކި ގަސްތައް އެކި ދިމާތަކުން އަޅުގަނޑުމެންނަށް މި ރާއްޖޭގައި ފެންނަމުން މި ދަނީ،" ޝާހިދު ވިދާޅުވިއެވެ.

ޝާހިދުގެ ވާހަކަފުޅުގައި ދިވެހި ރައްޔިތަކަށް ވީތީ ފަހުރުވެރިވާން ދަސްކުރަން ޖެހޭ ކަމަށް ވިދާޅުވިއެވެ. އަދި ދިވެހިންގެ ގައުމިއްޔަތު ބިނާވެފައި ވަނީ އެކަތިގަނޑަކަށްވުމުގެ މައްޗަށްކަން ފާހަގަކުރެއްވިއެވެ.

"އަޅުގަނޑުމެން ދަސްކުރަންވީ އަޅުިގގައުމިއްޔަތުގައި ބިނާވެފައިމިވަނީ އެކަތިގަނޑަކަށް ވުމުގެ މައްޗައްކަން އަޅުގަނޑުމެން ދަސްކުރަންވީ އަޅުގަނޑުމެންގެ މަތިވެރި އަބުތާލުން، އެއީ އަލި ރަސްގެފާނު ކަމަށްވިއަސް އަލި ތަކުރުފާނު ކަމަށްވިއަސް އަދި ޝަހީދު ހުސައިން އާދަމް ކަމަށްވިއަސް، އަޅުގަނޑުމެންގެ އަބުތާލުން އެ އެދެއްކެވި މަތިވެރި މަގުން ކުރިއަށްދިއުމުގައި އެކަކު އަނެކަކަށް އިނގިލި ދިއްކުމުރުމުގެ ބަދަލުގައި އެކަކު އަނެކަކަށް އަތުހިފައިގެން އެކަތިގަނޑެއްގެ ގޮތުގައި ކުރިއަށްދިއުމަށް،" ޝާހިދު ވިދާޅުވިއެވެ.

އެމަނިކުފާނު ވިދާޅުވީ ދިވެހި ވަތަށް ހިމާޔަތް ކުރަމުން ގެންދާނީ އެއްވެސް މިންވަރަކަށް ފަހަތަށް ނުޖެހި ކަމަށާއި ދިވެހި ރާއްޖޭ އަބަދުމެ އޮންނާނީ މިނިވަންކަން މަތީގައި ކަމަށެވެ.