ފިލްމެއް ބަލާލަންވެގެން ނެޓްފްލިކްސް ހާވާލަމުން ދަނިކޮށް ފެނުނީ މިދިޔަ އަހަރު ފަހުކޮޅު ނެރުނު ހިންދީ ފިލްމެކެވެ. ފިލްމުވެސް ބަލައިފީމެވެ. އެހެން ހުއްޓާ ޓިކްޓޮކުން ފެނުނީ ވީޑިއޯއެކެވެ. ހަމަ އެ ފިލްމުން ފެނުނު މަންޒަރާ ދާދި އެއްގޮތަކަށް ކުޅެފައިވާ މަންޒަރެކެވެ. ބެލި ހިންދީ ފިލްމަކީ 2022 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހު ނެރުނު "ސާކަސް" ނަމަކަށް ކިޔާ ފިލްމެވެ. ފިލްމުގައި ކިޔައިދެނީ އެއް މާބަނޑު ދެ ޕެއާއެއްގެ ވާހަކައެވެ. އޭގެ ތެރެއިން އެއް ޕެއާ ދިިރުއޅެނީ ބެންގަލޫރްގައެވެ. އަނެއް ދެ ޕެއާ ދިރިއުލެނީ އޫޓީގައެވެ. ބެންގަލޫރުގައި ދިރިއުޅޭ ދެބެއިން ބިމެއް ގަންނަންވެގެން އޫޓީއަށް ދެއެވެ. ރޭލުން ފައިބައިގެން ރޯއި (ރަންވީރު) ޖޯއި (ވަރުން ޝަރުމާ) ހޮޓަލަށް ދާންވެގެން ޓެކްސީއެއް ކައިރީ ގޮސް ހުއްޓެއެވެ. ޓެކްސީ ޑްރައިވަރުގެ ރޯލުން ފެންނަނީ ގޯލްމާލުން މަޝްހޫރުވި ވިރަޖޭޝް ހިރްޖީއެވެ.

ޓެކްސީ ޑްރައިވަރުގެ އަތުގައި ހުރި ޓެޓޫ ފެނިފައި ކޮންމެވެސް ގޯހެއް އުޅޭކަމަށް ރަންވީރަށް ހީވިހެވެ. ސެންޗަރީ ނަމަކަށް ކިޔާ ހޮޓަލަށް އެމީހުން ގެންގޮސްދޭށޭ ޖޯއި ޑްރައިވަރު ގާތުގައި ބުނެއެވެ. ޓެޓޫ ފެނުމުން ހާސްވެފައި ހުރި ރޯއިއަށް ބުނެވެނީ "ދާން ޖެހޭ ތަނެއް ބުނަން ޖެހޭ ހެއްޔޭ" މިހެނެވެ. އެއަށް ފަހު ރޯއި ހިފަހައްޓައިގެން ހުރި ބްރިފް ކޭސް ދޭށޭ ބުނެ ޓެކްސީ ޑްރައިވަރު އަތް ދިއްކޮށްލުމުން " މި ފޮށި އަހަރުން އަތުގައި ބަހައްޓާނީ" ރޯއި ބުނެއެވެ. "އެހާ ބޮޑަށް ހާސްވަނީ ތި ފޮށީގައި މިލިއަނެއްހާ ރުފިޔާ ހުރިހާމަ ހެން ހީވަނީ" ޓެކްސީ ޑްރައިވަރު، ރޯއިއާ ދިމާލަށް ބުނެއެވެ. އެއަށް ފަހު ރޯއީ، ޖޯއި ގާތު ބުނަނީ "އަހަންނަށް ހީވަނީ މީ މީހުންނަކީ ގޭންގުގެ ބައެއް ހެން" އެވެ. ކާރަށް އެރުމަށް ފަހު ރޯއި ޓެކްސީ ޑްރައިވަރު ގާތުގައި ބުނަނީ ސެންޗުއަރީ ހޮޓަލަށް ދިޔަޔަސް އެ މީހުން އެތަނުގައި މަޑުނުކުރާނެ ކަމަށެވެ.

ދެން ކިޔައީ މިދެނީ 1978 ވަނަ އަހަރު ނެރުނު ދިވެހި ފިލްމު "ނިބޫ" ގެ މަންޒަރެކެވެ. އެ މަންޒަރުގައި ފެންނަނީ ރިކޯ އާއި ޔޫސޭ މާލޭ ބަނދަރުމަތީގައި ހުއްޓިލައިގެން ތިބޭ މަންޒަރެވެ. ރީކޯ ހުރީ ބްރީފްކޭސް އެއް ހިފަހައްޓައިގެންނެވެ. ޓެކްސީ ޑްރައިވަރިގެ ރޯލުން ފެންނަ ކުރީގެ ފިލްމި ތަރި ހަމީދު ރީކޯ ގާތަށް ޖެހިލާފައި ފޮށީ ދޭށެ ބުނެއެވެ. "ކަލޭ ކައިރި ބުނަން ޖެހޭތައް ދާންވާ ތަނެއް" ރީކޯ ޑްރައިވަރާ ދިމަށް ބުނެއެވެ. ރީކޯ މާލެއަށް ގެނައި ބްރިފް ކޭހުގައި ހުރީ ވިޔަފާރިކުރަންވެގެން ގެނައި ފައިސާއެވެ. ކާރަށް އެރުމަށް ފަހު ރީކޯ ބުނަނީ ހޮޓަލަށް ދިޔަޔަސް އެތަނުގައި މަޑުނުކުރާނެ ކަމަށެވެ.

ޓިކްޓޮކްގައި "އައްޕަން ޓީވީ" ނަމަކަށް ކިޔާ ހެއްވާ މަޖާ ދިވެހި ވީޑިއޯތައް ޝެއާކުރާ ބަޔަކު އަޕްލޯޑްކޮށްފައިވާ ދެ ފިލްމުގެ މަންޒަރުތައް ޔޫސޭއަށް ފޮނުވާލުމުން ޔޫސޭ ދިން ޖަވާބަކީ މިއެވެ.

" ހައިރާންވެފައި މިހިރީ. ތިއޮތީ ސީދާ ކޮޕީ ކޮށްފައި" ނިބޫ ފިލްމުގެ ޑައިރެކްޓްކަރު ޔޫސޭ ބުންޏެވެ. ނިބޫ އަކީ އެއްވެސް ފިލްމެއްގެ ކޮޕީއެއްތޯ ސުވާލުކުރުމުން ޔޫސޭ އެކަމަށް އިންކާރު ކުރެއެވެ. "އޭގައި ނޯއްނާނެ ސްކްރިޕްޓެއްވެސް" ޔޫސޭ ބުންޏެވެ. ދިވެހި ފިލްމުގައިވެސް ފެންނަން އެއް މާބަނޑު ދެ ޕެއާއެކެވެ.

ސާކަސް ފިލްމަކީ 1982 ވަނަ އަހަރު ނެރުނު "އަންގޫރު" ފިލްމުގެ ރިމޭކްއެކެވެ. އަންގާރު ފިލްމަކީ 1968 ވަނަ އަހަރު ނެރުނު "ދޫ ދޫނި ޗާރް" ގެ ކޮޕީއެކެވެ. އަދި މި ފިލްމަކީ 1963 ވަނަ އަހަރު ނެރުނު ބެންގާލީ ފިމްލު "ބްރަންތި ބިލަސް" ރިމޭކްއެކެވެ. އެ ފިލްމު ހަދާފައިވަނީ ވިލިއަން ޝެކްސްޕިއާ ލިޔެފައިވާ "ދި ކޮމިޑީ އޮފް އިރާސް" ވާހަކަ ފޮތުގެ މައްޗަށެވެ.