ބައިގަރުނަކަށް ވުރެ ދިގު މުއްދަތަކަށް ދިވެހި ދައުލަތަށް ހިދުމަތް ކުރައްވައިގެން، މއ. ބޮޑުގަލުމާފަތްގޭ ޞޯބިރާ ވަޙީދު، ރައީސުލްޖުމްހޫރިއްޔާގެ ޝަރަފުގެ ބެޖާއި އައްޑަނަ ހޯއްދަވައިފިއެވެ.

ސޯބިރާއަށް ރަފުގެ ބެޖާއި އައްޑަނަ އަރުވާފައި ވަނީ ދިވެހި ދައުލަތަށް ޚިދުމަތްކުރުމުގެ އިނާމު ދިނުމަށް ދަރުބާރުގޭގައި މިރޭ ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.

ސޯބިރާ ވަނީ 50 އަހަރާއި އަށް މަސް ވަންދެން ދައުލަތަށް ހިދުމަތް ކުރައްވާފައެވެ. އޭނާ އެންމެ ފުރަތަމަ ދިވެހި ދައުލަތުގެ ހިދުމަތާ ގުޅިވަޑައިގެންނެވީ 1964 ގައެވެ. ހިދުމަތުގައި ސޯބިރާ ވަނީ އިދާރީ ކަންކަމާއި ފައިސާއާ ބެހޭ ކަންކަން ބަލަހައްޓަވާފައެވެ.

"ފައިސާއާ ބެހޭ ކަންކަން ބެލެހެއްޓެވިއިރު ދުވަހަކު ވެސް ފައިސާގެ މައްސަލައެއް ޖެހިފައި ނުވާކަން ފާހަގަކޮށްލަންޖެހޭ. ތެދުތެދަށް ދަންނަވާނަމަ، ދަންނަވަންޖެހޭނީ ކޮންމެ ވަޒީފާއެއް ވެސް ސާބިރާ އަދާކުރައްވާފައި ވަނީ ނަޒާހަތްތެރިކަމާއި ތެދުވެރިކަމާއެކުގައި ކަމަށް،" ޖަލްސާ ހުށަހަޅުއްވަމުން ރައީސް އޮފީހުގެ ކޯޕަރޭޓް ސަރވިސްގެ ސެކްރެޓަރީ ޙުސައިން ޢާމިރު ވިދާޅުވިއެވެ.

ސޯބިރާ އެންމެ ގިނަ ދުވަހު ހިދުމަތް ކުރެއްވީ ފެނާ ބެހޭ އިދާރާގައެވެ، އެ އިދާރާގައި 23 އަހަރު ހިދުމަތް ކުރައްވާފައިވެއެވެ. ހިދުމަތުން ސާބިރާ ވަކިވެވަޑައިގެންނެވީ 2016 ވަނަ އަހަރުއެވެ.

ސާބިރާއަށް އިނާމް ދެއްވުމަށްފަހު ރައީސް ސާލިހު ވިދާޅުވީ ސާބިރާއަކީ "ޚިދުމަތުގައި ދެމިތިއްބެވި އަންހެން ބޭފުޅުންނަށް ވަރަށް ރީތި މިސާލެއް" ކަމަށެވެ.

"މިހާ ދިގު މުއްދަތެއްގައި އަންހެން ބޭފުޅަކު ދައުލަތުގެ ޚިދުމަތުގައި ދެމިހުންނެވިކަން އެއީ، އަޅުގަނޑު ވަރަށް ޚާއްޞަ ގޮތެއްގައި ފާހަގަކުރާ ކަމެއް. އަދި އެއީ މިއަދު ޚިދުމަތުގައި ދެމިތިއްބެވި އަންހެން ބޭފުޅުންނަށް އޭނާ ދެއްކެވި ވަރަށް ރީތި މިސާލެއް،" ރައީސް ވިދާޅުވިއެވެ.

މީގެ އިތުރުން 49 އަހަރު ދައުލަތަށް ހިދުމަތް ކުރެއްވުމުން ހ. ހިރުވައި، އިސްމާއިލް ރަޝީދަށް ވެސް ރައީސުލްޖުމްހޫރިއްޔާ މިރޭ ވަނި އިނާމު ދެއްވާފައެވެ. އޭނާ ސަރުކާރުގައި ހިދުމަތް ކުރައްވަން ފެއްޓެވީ 1957 ގައެވެ. އަތޮޅުވެރިކަން ވެސް ކުރެއްވި އިސްމާއިލް ވަހީދު އެންމެ ގިނަ ދުވަހު ހިދުމަތް ކުރެއްވީ އަތޮޅުތަކާ ބެހޭ ވުޒާރާގައެވެ. އޭނާ ސަރުކާރުން ވަކިވެވަޑައިގެންނެވީ 2008 ވަނަ އަހަރުއެވެ.

[caption id="attachment_47825" align="alignnone" width="1024"] ދައުލަތުގެ އިސް މަޤާމުތަކެއް ފުރުއްވި، ހެންވޭރު އިރުވައި އިސްމާޢީލް ރަޝީދަށް ޝަރަފުގެ ބެޖު ހަވާލު ކުރައްވަނީ-- ފޮޓޯ/ ރައީސް އޮފީސް[/caption]

ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވި ބޭފުޅުންގެ ޚިދުމަތުގެ އަގު ވަޒަން ކުރައްވައި 86 ބޭފުޅަކަށް ރައީސް ސާލިހު މިރޭ ވަނީ އިނާމު އަރުވާފައެވެ.

މިއީ، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތްކުރައްވައިފައިވާ ބޭފުޅުންގެ ތެރެއިން މަޤާމުގެ މަސްއޫލިއްޔަތު އަދާކުރެއްވުމުގައި ޤާބިލުކަމާއި، އިޚްލާޞްތެރިކަމާއެކު ކުރައްވައިފައިވާ ޚިދުމަތްތަކަށާއި، އެބޭފުޅަކު ވަޒީފާ އަދާކުރެއްވި މުއައްސަސާގެ ކުރިއެރުމަށް ކުރައްވައިފައިވާ ޚިދުމަތްތަކުގެ އަގު ވަޒަންކުރެއްވުމުގެ ގޮތުން ޤައުމީ ފެންވަރުގައި، ދިވެހި ދައުލަތުން ރައީސުލްޖުމްހޫރިއްޔާ 2021 ވަނަ އަހަރު ދެއްވަން ފެށްޓެވި ޝަރަފުވެރި އިނާމެކެވެ.