އިސް ރަށްވެހިން އެއް ތަނަކުން ބައްދަލުވެ، އުފާވެރިކަމާ އެކު ވަގުތު ހޭދަކޮށްލައި އުޅެވޭފަދަ މާޙައުލެއް ޤާއިމުކޮށްދިނުމަށް އިސް ރަށްވެހިންގެ އިޖްތިމާޢީ މަރުކަޒުތަކެއް ރާއްޖޭގެ އެކި ކަންކޮޅުތަކުގައި ގާއިމު ކުރުމަށް ނިންމައިފިއެވެ.

މިގޮތަށް ނިންމެވިކަން އިއުލާން ކުރެއްވީ މިރޭ ބޭއްވި "ދިވެހި ދައުލަތަށް ޚިދުމަތްކުރުމުގެ އިނާމު" ދިނުމަށް ދަރުބާރުގޭގައި ބޭއްވި ހަފްލާގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހެވެ.

ރައީސް ސާލިހު ވިދާޅުވީ "ނާދީތަމައްދުން"ގެ ނަމުގައި ނާދީ ހުރި ބިމުގައި، އަދި ފަހުން ރައްޔިތުންގެ މަޖިލީހުގެ އިދާރާ ވެސް ހިންގި އިމާރާތުގައި، އެފަދަ މަރުކަޒެއް ހިންގި ކަމަށެވެ. އެތަނުގައި އެފަދަ މަރުކަޒެއް ހަމަ އެ ނަމުގައި ހުޅުވުމަށް މަސައްކަތް ކުރަމުންދާ ކަމަށް ރައީސް ސާލިހު ވިދާޅުވިއެވެ.

[caption id="attachment_47819" align="alignnone" width="1280"] ދިވެހި ދައުލަތަށް ޚިދުމަތްކުރުމުގެ އިނާމު ދިނުމުގެ ރަސްމިއްޔާތުގެ ތެރެއިން-- ފޮޓޯ/ ރައީސް އޮފީސް[/caption]

އެފަދަ މަރުކަޒުތަކެއް ރާއްޖޭގެ އެކި ކަންކޮޅުތަކުގައި އިމާރާތް ކުރައްވާނެ ކަމަށާއި އިސް ރަށްވެހިން އެއް ތަނަކުން ބައްދަލުވެ، އުފާވެރިކަމާއެކު ވަގުތު ހޭދަކޮށްލައި އުޅެވޭ ފަދަ މާޙައުލެއް ޤާއިމުކޮށްދިނުމަކީ ވަރަށް މުހިންމު ކަމެއް ކަމުގައި ރައީސް ވިދާޅުވިއެވެ.

"އެއް ކަމަކީ، އިސް ރަށްވެހިންނަށް ދޭންޖެހޭ ޙައްޤު ޤަދަރާއި އިޙުތިރާމު ހޯދައިދިނުމަށް މަގުފަހިކުރުމާއި، އެކަންކަމަށް ބާރުއެޅުން. އަނެއް ކަމަކީ، އިސް ރަށްވެހިންނަށް ބޭނުންވާ އިޖުތިމާޢީ އެހީތެރިކަން ފޯރުކޮށްދިނުން. އަނެއް ކަމަކީ، މުޖުތަމަޢުގައި އިސްރަށްވެހިންގެ ޙިއްސާ މިހާރަށް ވުރެ ވީހާވެސް ބޮޑަކަށް އިތުރުކޮށްދިނުން. އަދި ދުޅަހެޔޮ ދޮށީ ޢުމުރަކަށް ތައްޔާރުވުމަށް ކުރަންޖެހޭ އެންމެހާ މަސައްކަތްތައް ރާވައި ހިންގުން،" ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ އުންމީދަކީ، ދިވެހި ދައުލަތަށް ގިނަ ދުވަހު ޚިދުމަތް ކުރައްވާފައިވާ ތަޖުރިބާކާރު ބޭފުޅުން، އެ ބޭފުޅުންގެ މަސައްކަތުގެ ދާއިރާގެ ތަޖުރިބާތައް، މިހާރު ވަޒީފާގައި ތިއްބެވި ޚިދުމަތްތެރިންނާ ޙިއްޞާ ކުރައްވަމުން ގެންދެވުން ކަމަށެވެ. އަދި ވިދާޅުވީ މި ސަރުކާރުން ހުޅުވަން ޤަޞްދުކުރާ އިސް ރަށްވެހިންގެ އިޖްތިމާޢީ މަރުކަޒުތަކުގައި އެބޭފުޅުންނަށް އުފާވެރި ވަގުތުތަކެއް ހޭދަކުރުމުގެ ފުރުޞަތު ލިބިގެންދާނެ ކަމަށް އުންމީދުކުރައްވާ ކަމަށެވެ.