މެދު އަދި މަތީ ފަންތީގެ ގެދޮރުވެރިކަމަށް ޙާއްޞަކޮށްގެން އަމިއްލަ ފަރާތްތަކުން ހުޅުމާލޭގައި 5000 ވުރެ ގިނަ ހައުސިން ޔުނިޓް ތަރައްގީކުރަމުން ގެންދާ ކަަމށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފިއެވެ.

މާލޭ ސަރަހައްދުގައި އެކި ފަންތިތަކުގެ ބޯހިޔާވަހިކަން ޤާއިމު ކުރުމަށް އެޗްޑީސީގެ ފަރާތުން ކުރިއަށް ގެންދާ މަސައްކަތުގެ ދަށުން، އަމިއްލަ ފަރާތްތަކަށް ދޫކޮށްގެން އިމާރާތް ކުރާ މިކްސްޑް ރެޒިޑެންޝަލްގެ 22 ޕްރޮޖެކްޓެއް ހުޅުމާލޭގައި ކުރިއަށް އެބަގެންދެއެވެ. އެ ޕްރޮޖެކްޓަކުގައި ހިމެނެނީ 5198 ހައުސިން ޔުނިޓް ކަމަށް އެޗްޑީސީން ބުންޏެވެ.

"މި ދެ އަހަރު ވެސް ގިނަ މިކްސްޑް ރެޒިޑެންޝަލް މަޝްރޫޢުތަކެއް ސޮއި ކުރެވި މަސައްކަތްތައް ވަނީ ފެށިފައެވެ. މިމަޝްރޫޢޫތައް ވެގެން ދާނީ މިގޮތަށް އިމާރާތް ކުރެވޭ އާއްމުނަށް އެއްމެ ކުޑަ އަގުގައި ހުޅުވާލެވިގެންދާނެ ފަހަރެއް ކަމުގައި މި ކޯޕަރޭޝަނުން ޤަބޫލުކުރަމެވެ،" އެޗްޑީސީން މިއަދު މީޑިއާތަކަށް ފޮނުވި ލިޔުމެއްގައިވެއެވެ.

އެޗްޑީސީން ބުނީ އެފަދަ އެ ޕާޓްމަންޓުތައް ދޭން ކަނޑައަޅާ އެންމެ ކުޑަ އަގުގައި ދޭކަން ކަށަވަރުކުރުމަށްޓަކައި ގިނަ މަސައްކަތްތަކެއް ކޮށްފައިވާނެ ކަމަށެވެ. މިގޮތުން އާއްމުކޮށް ބޯހިޔާވަހިކަމުގެ ޕްރޮޖެކްޓެއް އަމިއްލަ ފަރާތްތަކަށް ދިނުމުގައި ގެންގުޅޭ އުޞޫލަށް ބަދަލުތަކެއް ވަނީ ގެނެވިފައިވާނެ ކަމަށާއި މިގޮތުން ކޮންމެ ޕްރޮޖެކްޓަކުންވެސް 60% ޔުނިޓް ވިއްކުމަށް ކަނޑައެޅޭ އެންމެ ކުޑަ އަގަށް އިމަރާތްކުރާ ކުންފުނިން އުނި އިތުރު ނުގެނައުމަށް އެންގިފައިވާނެ ކަމަށް އެޗްޑީސީން ބުންޏެވެ.

"...އެޑް އޮންގެ ގޮތުގައި އެއްވެސް އިތުރު ފައިސާއެއް ނަގާނަމަ ޔުނިޓް ގަންނަ އާއްމު ފަރާތުގެ އެއްވެސް އިޢުތިރާޒެއް ނެތް ކަމުގެ ފޯމެއްގައި ސޮއިކުރުމަށް ވަނީ ކަނޑައަޅާފައެވެ. މިގޮތަށް މިކަން ކުރުމުން ބައެއް ހާލަތްތަކުގައި އިތުރަށް އެޑްއޮންގެ ގޮތުގައި ނެގޭ ފައިސާ ނެގުން ހުއްޓުމަކަށް އައިސް އަތްފޯރާފަށުގައި ރަނގަޅު ފެންވަރުގެ ބޯހިޔާވަހަކަމުގެ ފުރުޞަތު އާންމު ރައްޔިތުންނަށް ލިބިގެންދާނެ ކަމުގައިވެސް މިކޯޕަރޭޝަނުން ޤަބޫލުކުރަމެވެ،" އެޗްޑީސީން ބުންޏެވެ.

[caption id="attachment_47815" align="alignnone" width="1600"] ރެއިންބޯއިން ހުޅުމާލޭގައި އިމާރާތް ކުރާ "ރެއިންކޮރަން"ގެ އިމާރާތް-- ފޮޓޯ/ އެޗްޑީސީ[/caption]

އެ ކޯޕަރޭޝަނުް ބުނީ މިކްސްޑް ރެޒިޑެންޝަލް ތަރައްގީ ކުރުމުގެ މަޝްރޫޢުތަކުގެ ތެރޭގައި އާރް.ސީ.ސީއާ ހަވާލުކޮށްގެން ހިންގޭ މަޝްރޫޢުގެ ދަށުން ޖުމްލަ 116 ޔުނިޓް ތަރައްޤީ ކުރެވިގެން ދާނެ ކަމަށާއި މިހާރު އެ މަސައްކަތުގެ 50 ޕަސަންޓް ވަނީ ނިމިފައިވާ ކަމަށެވެ. އަދި ސާސެ ގްލަޓްއާއި ހަވާލު ކުރެވިގެން ތަރައްޤީ ކުރާ މިކްސް ރެޒިޑެންޝަލް ޕްރޮޖެކްޓްގެ ދަށުން 129 ޔުނިޓުގެ މަސައްކަތްތައް ވެސް ކުރެވެމުންދާ ކަމަށެވެ. އަދި ބުނީ އެސް.ޖޭ ކޮންސްޓްރަކްޝަން އާ ހަވާލު ކުރެވުނު 105 ޔުނިޓް، ފެޑޯ އާއި ހަވާލު ކުރެވުނު 53 ޔުނިޓް އަދި ރެއިންބޯ މެގަ ޑިވެލޮޕާސް އާ ހަވާލުކުރެވިގެން ތަރައްޤީ ކުރާ 162 ޔުނިޓް ތަރައްގީކުރެވެމުންދާ ކަމަށެވެ. މިގޮތުން ރެއިންބޯ މެގަ ޑިވެލޮޕާސް އާ ހަވާލުކޮށްގެން ތަރައްޤީ ކުރެވިގެންދާ މަޝްރޫޢުގެ 58 ޕަސަންޓް މަސައްކަތް ނިމިފައިވާ ކަމަށް އެޗްޑީސީން ބުންޏެވެ.

"ހުޅުމާލެ އަކީ ހުރިހާ ފަންތިތަކެއްގެ ބޯހިޔާ ވަހިކަން ވެސް ހިމެނޭ ގޮތަށް ތަރައްޤީ ކުރެވިގެންދާ ރަށަކަށް ހެދުމަށް އެޗް.ޑީ.ސީން ކުރަމުންދާ މަސައްކަތްތަކުގެ ތެރެއިން ބޮޑު ޕަސަންޓޭޖެއް މިހާރު ދަނީ ތާވަލާއި އެއްގޮތަށް ކުރެވެމުންނެވެ. އަދި ކުރިން ފަށާފައި އެކި ސަބަބުތަކާއި ހެދި ލަސްވެފައިވާ 4 މަޝްރޫޢުތަކުގެ މައްސަލަތައް ދެނެގަނެ، ހައްލު ހޯދައި ކޮންޓްރެކަޓަރުންނާއި ގުޅިގެން ގިނަ މަސައްކަތްތަކެއް ވަނީ ކުރެވިފައެވެ،" އެޗްޑީސީން ބުންޏެވެ.

އެ ކޯޕަރޭޝަނުން ބުނީ އެންސިސް އާ ހަވާލުކޮށްގެން ތަރައްޤީ ކުރެވުނު 94 ޔުނިޓުގެ މަސައްކަތް މަޑު ޖެހިފައިވަނިކޮށް، ޕަރޮޖެކްޓް އަލުން ފަށާ މިހާރު އާއްމުންނަށް ފުލެޓަށް ބަދަލުވުމަށް ފުރުޞަތު ހުޅުވާލެވިފަައިވާ ކަމަށެވެ. އަދި އެން.ޕީ.އެޗް އާ ހަވާލު ކޮށްގެން ތަރައްޤީ ކުރާ 129 ޔުނިޓްގެ މަސައްކަތުގެ 98 ޕަސަންޓް ނިންމާފައިވާ ކަމަށް އެޗްޑީސީން ބުންޏެވެ.