ދިވެހި ރައްޔިތުންގެ ޕާޓީ (ޑީއާރްޕީ) ގެ ލީޑަރު އަދި ކާށިދޫ ދާއިރާގެ މެންބަރު ޖާބިރު އެޕާޓީ އިން ވަކިވެ، މުޅިން އަލަށް އުފެއްދުމަށް ނިންމާފައިވާ ސިޔާސީ ޕާޓީ އަށް މެންބަރުން ހޯދުމުގެ މަސައްކަތް ފަށައިފިއެވެ.

ޖާބިރު އަލަށް އުފައްދާ ޕާޓީ އަށް ކިޔުމަށް ނިންމާފައި ނަމަކީ ގްރީން ޕާޓީ އޮފް މޯލްޑިވްސް (ޖީޕީއެމް) އެވެ. އެޕާޓީ އުފެއްދުމުގެ ހުއްދަ ވެސް އިލެކްޝަންސް ކޮމިޝަން (އީސީ) އިން ވަނީ ޖާބިރަށް ދެއްވައިފައެވެ.

އަލަށް އުފައްދާ ޕާޓީ އަށް މެންބަރުން ހޯދުމަށް ޖާބިރު މިއަދު ވަނީ ބާޒާރު މައްޗަށް ވަޑައިގެންފައެވެ. އަދި އޭނާ ވަނީ މަސް މާރުކޭޓަށް ވަޑައިގެން އެވަގުތު އެތަނުގައި ތިބި މީހުންނާއި ވާހަކަދައްކަވާފައެވެ. އެގޮތުން ގްރީން ޕާޓީ އަކީ ރާއްޖޭގެ ރައްޔިތުންނަށް ފައިދާވާނެ ޕާޓީއެއް ކަމަށް އޭނާ ވިދާޅުވިއެވެ. އެޕާޓީ އަކީ ދިވެހި ރައްޔިތުންނަށް ހެވާއި ލާބައަށް އުފައްދާ ޕާޓީއެއް ކަމަށް ޖާބިރު ވިދާޅުވިއެވެ.

https://twitter.com/MaldivianGreen/status/1626199106413826048?s=20

“ހަތާވީސް”އާ ވާހަކަދައްކަވަމުން ޖާބިރު މީގެކުރިން ވިދާޅުވީ ޑީއާރްޕީ އިން ވަކިވާން ޖެހުނީ އެޕާޓީ އައިގެން ކުރިޔަށް ދާނެ އެއްވެސް މަގެއް ނެތުމުން ކަމަށެވެ. މިހާރުވެސް އެޕާޓީގެ ދަރަންޏާއި ގުޅުންހުރި ގިނަ މައްސަލަތަކެއް ކޯޓުގައި ކުރިޔަށްދާ ކަމަށް ޖާބިރު ވިދާޅުވިއެވެ.

“އަޅުގަނޑުގެ މިވަގުތު ހުރިހާ މަސައްކަތެއް ވެސް ހުރީ އާ ޕާޓީއަށް މީހުން ހަމަ ކުރުމުގެ،” މީގެކުރިން ޖާބިރު ވިދާޅުވިއެވެ.

ޖާބިރު ވަނީ މިއަހަރުގެ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވެސް ވާދަ ކުރުމުގެ ވިސްނުން އޭނާ ގެންގުޅުއްވާ ކަމަށް ވިދާޅުވެފައެވެ. ނަމަވެސް އެކަމުގެ މާބޮޑު ތަފްސީލެއް ނުދެއްވައެވެ.