މިދިޔަ ހަފްތާގައި ތުރުކީއަށާާއި ސީރިޔާ އަށް ބިންހެލުމުގައި އެންމެ އަޖާއިބުކުރުވަނިވި އެއް ކަމަކަށްވީ ވިހެއުމަށްފަހު ފޫޅުވެސް ނުކަނޑައި އޮތް ތުއްތު އަންހެން ކުއްޖަކު ސަލާމަތުން ފެނުމެވެ. ބިންހެލުމުގައި މީހުން ސަލާމަތްކުރަން އުޅުނު ވައިޓް ހެލްމްޓް ގްރޫޕަށް ބުނީ އެ ތުއްތު ކުއްޖާގެ އާއިލާގެ އެންމެން މަރުވެފައިވާ ކަމަށެވެ. ތުއްތު ކުއްޖާ މިހާރު ބަލަހައްޓަމުން ގެންދަނީ އުތުރު ސީރިޔާގައި ހުންނަ ހޮސްޕިޓަލެއްގައެވެ. ހޮސްޕިޓަލަށް ގެންދެވުނުއިރު ތުއްތު ކުއްޖާގެ ހާލަތު ވަރަށް ގޯހެވެ. ނަމަވެސް މިހާރު ހާލު ރަނގަޅު ކަމަށް ޑޮކްޓަރުން ބުނެއެވެ. އަދި އެ ކުއްޖާއަށް ވަނީ "އަޔާ"ގެ ނަމުން ނަން ދީފައެވެ.

އެޑްޕޮޓްކުރަން އެތައް ހުށަހެޅުމެއް

ސޯޝަލް މީޑިއާގައި އެތައް ހާސް ބަޔަކު ވަނީ އަޔާ އެޑޮޕްޓް ކުރާން ބޭނުންވާކަމުގެ ޝައުގުވެރިކަން ފާޅުކޮށްފައެވެ.

އޭނާ އެޑޮޕްޓްކޮށް ރަނގަޅު ދިރިއުޅުމެއް ދޭން ބޭނުން،" ސޯޝަލް މީޑީއާގައި މީހަކު ލިޔެފައިވެއެވެ. ކުވައިތުގެ ޓީވީގެ ޕްރެޒެންޓަރަކު ބުނީ އޭނާ ހުރީ އަޔާ ކުއްޖާ ބަލަހައްޓައި އެޑޮޕްޓް ކުރަން ތައްޔާރަށް ކަމަށެވެ.

ހޮސްޕިޓަލްގެ މެނޭޖަރު ޑރ ހާލިދު އައްތިޔާ ވިދާޅުވި ގޮތުގައި އަޔާ އެޑޮޕްޓް ކުރަން ބޭނުންވާ އެތައް ބަޔަކު ދުނިޔޭގެ އެކި ކަންކޮޅުތަކުން އޭނާއަށް ގުޅާފައިވާ ކަމަށެވެ.

ޑރ. އާތިޔާ ވިދާޅުވީ މިވަގުތު، އެއްވެސް މީހަކަށް އަޔާ އެޑޮޕްޓް ކުރުމުގެ ފުރުސަތެއް ނުދޭނެ ކަމަށެވެ. "އަޔާގެ އާއިލާގެ މީހަކު އަންނަންދެން އަހަރެން އޭނާއާ މެދު ކަންތައް ކުރަނީ އަހަރެންގެ އަމިއްލަ ދަރިއެއްހެން" ޑރ ވިދާޅުވިއެވެ. އަޔާއަށް ކިރެދެމުން ދަނީ އައްތިޔާގެ އަންހެނުންނެވެ.

ކިޑްނެޕް ކުރުމުގެ ބިރާއެކު އަޔާ ރައްކާތެރި ތަނަކަށް

ރިޕޯޓްތައް ބުނާ ގޮތުން ވަގަށް ނެގުމާއި އެޑޮޕްޓް ކުރުމުން އަޔާ ރައްކާތެރި ކުރުމަށް ހޮސްޕިޓަލުން އެހެން ތަނަކަށް ބަދަލުކޮށްފައިވަ ކަމަށެވެ. އަޔާއަށް ފަރުވާދެމުން ދަނީ ސިރިޔާގެ އިދިކޮޅުގެ ފަރާތްތަކުގެ ބާރުގެ ދަށުގައި ވާ ސަރަހައްދެއްގެ ހޮސްޕިޓަލުގައެވެ.
ހޯމަ ދުވަހު އެ ހޮސްޕިޓަލުގައި ހަމެނުޖެހުމެއް ވަނީ ހިންގާފައެވެ. ހަތިޔާރު އެޅި ދެ މީހުންނާ ފިރިހެން ނަރުހަކު ވަނީ ހޮސްޕިޓަލުގެ މެނޭޖަރުގެ ގައިގައި ތަޅައިގަނެފައެވެ. އަދި އެ ހަމަނުޖެހުން ހިނގީ އެ މީހުން، އަޔާ ނަގަން އުޅުމުން ކަމަށް ޝޯޝަލް މީޑިއާގައި ވާހަކަތަކެއް ދެކެވުނެވެ. ނަމަވެސް ހެލްތް ޑައިރެކްޓްރޭޓްގެ ވެރިޔާ ޑރ އަހްމަދު ހައްޖު ހަސަން ވަނީ އެއީ އަޔާ ވަގަށް ނަގަން ކުރި ކަމެއް ކަމަށް ބުނެ ސޯޝަލް މީޑިއާގައި ދެކެވޭ ވާހަކަތައް ދޮގުކޮށްފައެވެ.

"ވަގަށް ނެގި ކަމުގެ ތުހުމަތަކީ އޮޅުވާލުމެއް. މިއީ މުޅިން އެތެރޭގެ ހޮސްޕިޓަލާ ގުޅުން ހުރި މައްސަލައެއް ކަމަށާއި އެ ކުއްޖާއާ އެއްވެސް ގުޅުމެއް ނެތް" އޭނާ ވިދާޅުވިއެވެ.