ހަމައެކަނި އޮފީހުގެ ގޮނޑީގައި ތިބެގެން މަސައްކަތްތައް ހިންގުމަކީ ދަތި ކަމެއް ކަމަށާއި އެހެންކަމުން އެ މަސައްކަތް ކުރާ ސައިޓަކަށް ގޮސް މަސައްކަތް ކުރިޔަށްދާ ގޮތް ހަމަ ލޮލުން ބަލަން ޖެހޭނެ ކަމަށް ޕްލޭނިން އެންޑް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

ސަރުކާރުގެ ބައެއް އޮފީސްތަކަށް ހުޅުމާލޭގައި ގާއިމް ކޮށްފައިވާ އިމާރާތް މިއަދު ވަނީ ހެނދުނު ވަނީ ހުޅުވައިފައެވެ. ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ހުޅުވައިދެއްވި އެ އިމާރާތަކަށް ދީފައި ވަނީ ނިޝާން އިއްޒުއްދީނުގެ އިއްޒަތުގެ ވެރިޔާ އަލްމަރްހޫމް އުމަރު ޒާހިރުގެ ނަންފުޅެވެ.

އެ ރަސްމިއްޔާތުގައި ވާހަކަދައްކަވަމުން މިނިސްޓަރު އަސްލަމް ވަނީ މަރްހޫމް އުމަރު ޒާހިރަކީ އެމަނިކުފާނުގެ މަސައްކަތުގެ ހަޔާތުގައި ވަރަށް ގިނަ ކަންކަން ދަސް ކޮށްދެއްވި ބޭފުޅެއް ކަމަށް ވިދާޅުވެފައެވެ. 1997ވަނަ އަހަރު ރާއްޖެއިން ބޭރުން ތައުލީމު ހާސިލު ކުރައްވައިގެން ރާއްޖެ ވަޑައިގެން އެންމެ ފުރަތަމަ ވެސް ވަޒީފާ އަށް ނިކުންނެވީ މަރްހޫމް އުމަރު ޒާހިރު މިނިސްޓަރަކަށް ހުންނެވި ކޮންސްޓްރަކްޝަން މިނިސްޓްރީ އަށް ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ މިއަދު އެމަނިކުފާނުގެ ނަން ދެވިފައިވާ އިމާރާތް ހުރިތަން ކަމަށްވާ ހުޅުމާލެ ހިއްކުމުގެ ވާހަކަ ކޮންމެވެސް ވަރަކަށް ދައްކަމުން އަންނަ ކަމަށެވެ. އެގޮތުން ހުޅުމާލެ ހިއްކުމަށް އޭރު ޕްލޭނެއް ހަދާފައި އޮތް ކަމަށް އަސްލަމް ވިދާޅުވިއެވެ.

"ވަރަށް ގިނަ ކަންކަން އަޅުގަނޑަށް ދަސްވި، ރައީސް ފާހަގަކުރެއްވި ފަދައިން އުމަރު ޒާހިރުގެ ފަރާތުން އަޅުގަނޑަށް ދަސްވީ ވެރިންނަށް ކިޔަމަންވުން، އިހުތިރާމު ކުރުން، ދަށުން މަސައްކަތް ކުރާ މުވައްޒަފުންނާއި އެކީގައި އޮންނަން ޖެހޭ މާތް ރީތި ގުޅުމެއް ގެންގުޅުން، ކިބުރުވެރި ނުވުން، އާއްމުންނާއި އެކީގައި އުޅެވޭނެ މީހަކަށްވުން މަސައްކަތްތަށް ފަރުވާތެރިވުން. އަމިއްލަ އަށް މަސައްކަތް ހިނގާ ގޮތް ބެއްލެވުން،" އަސްލަމް ވިދާޅުވިއެވެ.

އަސްލަމް ވިދާޅުވީ ބައެއް ބޭފުޅުންނަށް ވަކި މަގާމުތަކަކަށް ވަޑައިގަތުމުން މަސައްކަތްތައް ކުރިޔަށްދާ ގޮތް ބައްލަވާލެއްވުމަށް ވަޒީރު ވަޑައިގަތުން ގަބޫލު ނުކުރައްވާ ކަމަށެވެ. އެހެންނަމަވެސް އަސްލަމް ވަނީ އޭނާގެ ދަށުން މަސައްކަތް ކުރައްވާ މުވައްޒަފުންނަށް މިއަދު އިލްތިމާސް ކުރައްވާފައެވެ.

"އަޅުގަނޑުގެ މުވައްޒަފުންނަށް ވެސް ދަންވަން ބޭނުން ހަމައެކަނި އޮފީހުގެ ގޮނޑީގައި ތިބެގެން މަސައްކަތްތައް ނުހިންގޭނެއޭ. ބިންމައްޗަށް ފައިބަން ޖެހޭ. މަސައްކަތް ކުރާ ސައިޓަށް ދާންޖެހޭ. އޭރުން އަސްލުގައި ޕްރެކްޓިކަލީ އެ ހުންނަ ކަންތައްތައް ރަނގަޅަށް އެނގޭނީ އަދި މައްސަލަ ހައްލު ކުރަންވެސް އެނގޭނީ،" އަސްލަމް ވިދާޅުވިއެވެ.

އަސްލަމް މިފަދައިން ވިދާޅުވިއިރު އައްޑޫ ސިޓީގައި ކުރިޔަށް ގެންދާ މަގު ހެދުމުގެ މަޝްރޫއުއާ ގުޅިގެން އެ ސިޓީގެ ރައްޔިތުންގެ ޝަކުވާ އާއި ކަންބޮޑުވުންތަކަށް ހައްލެއް ހޯދައި ދިނުމަށްޓަކައި އަސްލަމް ވަނީ އައްޑޫ އަށް ވަޑައިގެންފައެވެ.

އެގޮތުން އެ ދަތުރުފުޅުގައި އެ މަސައްކަތުގެ ކޮންޓެކްޓަރާއި، އިންޖިނިއަރުންނާއި އަދި ހައުސިން މިނިސްޓްރީގެ ޓީމުގެ އިތުރުން ސިޓީ ކައުންސިލާއިއެކު މަޝްވަރާ ބައްދަލުވުމެއް ބޭއްވިއެވެ.