ހުއްޓިގެން މިހުރެވެނީ ދ. ރިނބުދޫގެ މަގެއްގެ މަތީގައެވެ. ބަލަހައްޓައިގެން މި ހުރެވެނީ ކުރިމަތިން ފެންނަ ފާރާ ދިމާލަށެވެ. އެ ފާރުގައި ކުރަހާފައި ހުރި ރީތީ މަންޒަރަށެވެ. ފާރާ ގާތަށް ޖެހިލީމާ ހީވަނީ ކުރެހުމުގެ ތެރެއަށް އަހަރެން ގެނބޭހެންނެވެ. އެހާ ވެސް ގިނަ އިރު ބަލަހައްޓައިގެން ހުރެވެއެވެ. އެންމެ ކުރެހުމެއް ނޫނެވެ. އެތައް ކުރެހުންތަކެކެވެ. އެހެން ދިމާލަކަށް މަޑުން މަޑުން ހިނގައިގަތުމުން އެކި ކުލަކުލައިގެ ކުރެހުމުން ޖަރީކޮށްފައިވާ ފާރުތައް ފެނެއެވެ. ގުދުރަތީ ވެށީގެ ރީތިކަން އެބަ ދައްކުވައިދެއެވެ. ރިނބުދޫ އެ ރަށަކަށް ހާއްސަވެފައިވާ ތިލޭރުކަމުގެ ފަންނު ދައްކުވައިދޭ ކުރެހުންތައް ވެސް ރަށުގެ އެކި ދިމަދިމާލުގައި އެބަހުއްޓެވެ.

އޭގެ ތެރެއިން ފޯކްލޯ ވާހަކައެއް ބުނެދޭ ކުރެހުމެއް ކުރަހާފައި ހުރީ ރިނބުދޫ ކުރީގެ މަދަރުސާގެ ފާރުގައެވެ. "ކޮމިކްސް ސްޓައިލަށް" ކުރަހާފައި ހުރީ ދޯންޏެއް ކަނޑުގައި ދަތުރުކުރާ މަންޒަރެވެ. އެއީ ރިނބުދޫއަށް ޒިޔާރަތްކުރި "ރޮދު އައްޔުގެ ވާހަކަ" އެވެ.

https://twitter.com/hathavees/status/1625750898432692225?s=20&t=7iFz_oM-uOkm6YY2vMgaHA

ރޮދުއައްޔުއަކީ ކަނޑު ދަތުރުކޮށް އުޅުނު މީހެއް ކަމަށް އެ މީހުން ބުނެއެވެ. ރިނބުދޫއަށް ދިޔަ ރޮދު އައްޔު ބޮޑުމާލޫދޫ ރޭއެއްގައި ދޯނިގައި ނައްޓާލަން އުޅުމުން ރަށު މީހުން އޭނާ ގާތު އެދުނީ މަޑުކުރަންށެވެ. އެއީ ވިއްސާރަ ރެއަކަށްވެސް ވާތީވެއެވެ. ވިއްސާރަ ވިލާތައް އޮތީ ބޯމަތިކޮށްފައެވެ. މާލޫދޫ ފައްޓާފައި، ފަތިހު ކައިގެން ފުރަން މަޑުކުރަން އެދުނެވެ. ނަމަވެސް "ނަގާ ވިލާގައި ދަތެއް ނުހުންނާނެޔޭ" ކިޔާފާއި ރޮދު އައްޔު ދިޔައީއެވެ. އެ ދިޔަގޮތަށް އޭނާ ގެއްލުނީއެވެ. އެފަހުން ރިނބުދޫ ކައިރި ކަނޑުތެރެއިން ފެންނަ އަލިގުޅައަކަށް ރޮދުއައްޔަގެ ނަމުން ނަން ވަނީ ދީފައެވެ.

[caption id="attachment_47697" align="alignnone" width="1920"] ރިނބުދޫގެ ކުރީގެ މަދަރުސާގެ ފާރުގައި ކުރަހާފައިވާ ފޯކްލޯ ވާހަކައެއް، ކުރެހުމަކަށް ގެނެސްފައި-- ހަތާވީސް ފޮޓޯ/ ޙުސައިން ޙަސަން[/caption]

"މި ފާރުގައި ކުރެހިފައި ފެންނަނީ ފުރައިގެން ދިޔަ ތަން. އޭރުގައި ދަތުރުކުރަނީ ރިޔަލުގައި އެ ބުނާ އެއްޗަކާއި ދިމާވެގެން ދޯނި ފުނޑުފުނޑުވެގެން ދިޔަ ވާހަކަ. ބޯވާތަކާއި އެއްޗެއްސަކީ ކަނޑުގެ ބިޔަތަކަށްވެފައި މަޑި އެއްޗެއްސަކީ ކަނޑުގެ ބޮޑު އެއްޗެއްސަށް ވީމާ އެއީ އޭނާއާ ކަނޑުތެރެއިން ދިމާވި އެއްޗެހި ބަލާފައި ކުރަހާފައި އެހެރީ،" ރަށުގެ ތާރިހީ ކަންކަން ބަލަމުންދާ މޫސާ އަބްދުﷲ (އާމިރު) "ހަތާވީސް"އަށް ކިޔައިދިނެވެ. އާމިރު ބުނީ އެ ބުނާ އަލިގުޅައެއް އޭނާއަށްވެސް ފެނުނު ކަމަށެވެ.

"އަލިފާންގުޅަ ރަށާކައިރިއަށް އަންނަ ވަރަކަށް އަލިފާން ގުޅަ ބޮޑުވޭ، ގާތްގަނޑަކަށް ރަށުގެ ފަޅާ ހަމަޔަށް އައި ކަމަށް ބެލެވެނީ. އައިއިރު މީހެއްގެ އިސްކޮޅު ވަރަށް އަލިފާން ގުޅަ ފެންނަން ހުރި. އެހާ ހިސާބަށް އައިސް މަޑުޖެހިފައި ދާން ފެށީ. ރަށުގެ ފަޅާ ހަމަޔަށް އައިކަމަށް ވަނީ،" އެ ރަށުން ފެންނަ އަލިގުޅައިގެ ވާހަކަ ތަފްސީލުކޮށްދެމުން އާމިރު ބުންޏެވެ.

[caption id="attachment_47681" align="alignnone" width="1920"] ރިނބުދޫއަށް ޒިޔާރަތް ކުރި "ރޮނދުއައްޔު"ގެ ވާހަކަ ކުރެހުމަކަށް ގެނެސްފައި: އޭނާ މަރުވީ އެކަނި ދަތުރުކުރަމުންދަނިކޮށް ވިއްސާރައިގައި ޖެހި ކަނޑުވެގެން-- ހަތާވިސް ފޮޓޯ/ ޙުސައިން ޙަސަން[/caption]
ކައުންސިލްގެ އިސްނެގުމެއް
ސުނާމީގެ ރާޅާއެކު ރަށުގެ އާސާރީީ އަދި ދުވަސްވީ ގިނަ ތަކެއްޗަށް ވަނީ ގެއްލުން ލިބިފައެވެ. އެހެންވެ އާސާރީ ތަކެތި ފެންނާކަށް ނުވަތަ މަސައްކަތްތެރިކަން ދައްކާލެވެނޭ ގޮތެއް ދެއްކުމަށް ކައުންސިލުން ދިޔައީ އެކި ގައުމުތަކުގެ ކަންކަން ހިނގާ ގޮތާއި އެ ގައުމުތަކުގައި ސަގާފަތް ދިރުވަން ކުރާ ކަންކަން ދިރާސާ ކުރަމުންނެވެ.

"އަދި އޭގެ އިތުރުން އެކްސްޕާޓުންނާ ވާހަކަ ދައްކާ ހިޔާލާއި މަޝްވަރާ ހޯދައިގެން ދެން އޭރުގައި ހިތަށް އެރީ ރަށުގެ ވާހަކަތައް ބުނެދޭން މިއުރަލް ތަކެއް ހަދަން. ކުރީ ޒަމާނުގައި ކުޅެމުން އައި ކުޅިވަރުތައް ބޮޑުމާލީގެ ކުޅިވަރުތައް، ރިނބުދޫ އެކަމަށް ހާއްސަވެފައި އޮންނަ ކަންތައް ތިލޭރުކަމުގެ ކަންތައްތައް ދައްކުވައިދޭ،" ރަށުގެ ފާރުތަކުގެ ކުރެހުންތައް ފެށިގެން އައިގޮތް ރިނބުދޫ ކައުންސިލްގެ ކުރީގެ ރައީސް ހާތިމް އިބްރާހިމް (ހާތި) ހިއްސާކުރިއެވެ.

[caption id="attachment_47679" align="aligncenter" width="1024"] ރިނބުދޫ ކައުންސިލްގެ ކުރީގެ ރައީސް ހާތިމް "ހަތާވީސް"އާ ވާހަކަ ދައްކަނީ[/caption]

މިއުރިއަލްތައް ހެދުމުގެ މަސައްކަތް ފެށުނީ މޯލްޑިވިއަން އާޓިސްޓު ކޮމިއުނިޓީއާ އެކުއެވެ. "އޭގެ ތެރޭގައި ގެނެވުނީ ރަށާ ބެހޭ ގޮތުން ހުރި ފޯކްލޯ ވާހަކަތަކާއި އޭރުވެސް މިހާރުވެސް ކުރެވޭ ކަންތައްތައް ކުރެހުމުގެ ސިފާގައި،" ރޮދު އައްޔަގެ ވާހަކަ ކުރެހުމެއްގައި ސިފާގައި ގެނެވުނު ގޮށް އޭނާ ކިޔައިދިނެވެ.

އެ މިއުރިއަލްތައް ރަށު ރައްޔިތުންގެ އިތުރުން މުޅި ރާއްޖެއިން ވެސް ބަލައިގަތެވެ. މިއުރިއަލްތައް ވެގެން ދިޔައީ ކައިރި ރިސޯޓުތަކުން އެ ރަށަށްދާ ފަތުރުވެރިންނަށް ވެސް ވަރަށް ބޮޑަށް ކަމުދާ އެއްޗެއްގެ ގޮތުގައެވެ.

"ފަތުރުވެރިންގެ ފަރާތުން މިއަށް ސަޕޯޓް ލިބުނު. އެމީހުންނަށް ކަމުދާ ކަމަށް ދިޔަ. ވާހަކަތައް ކިޔައިދޭއިރުގައި މަންޒަރާ އެކުގައި ކިޔައިދިނީމާ ވަރަށް ކަމުދާ ކަމަކަށް ދިޔައީ. ކޮންމެވެސް ކަހަލަ ހަގީގަތެއް އެކުލެވޭ ބައިވަރު ވާހަކަ އެބަހުރި. އެ ވަގުތު ބޭނުންވީ ސަގާފީ މަގުގައި ކުރެހުންތައް ގެންނަން އެ ކުރެހުންތައް މިހިރީ ގެނެވިފައި،" ދާރުލްއާސާރުގެ މިހާރުގެ އިސް ވެރިޔާ، ހާތިމް ވިދާޅުވިއެވެ.

[caption id="attachment_47701" align="alignnone" width="1024"] 19 ފެބްރުއަރީ 2020: ރިނބުދޫ ސަގާފީ މަގު ހުޅުވައި ދެއްވުމަށްފަހު، އެ މަގުގެ ފާރުތަކުގައި ހުރި ކުރެހުންތައް ރައީސް ސާލިހު ބައްލަވާލެއްވުން-- ފޮޓޯ/ ރައީސް އޮފީސް[/caption]

އެކަމަށް ހެރިޓޭޖް މިނިސްޓްރީން ހިތްވަރު ދިން ކަމަށާއި އިތުރަށް ބޭނުންވާ ކަންތައްތައް ބަލައި ކުރިއަރުވަން މަސައްކަތްތަކެއް ކުރި ކަމަށް ކުރީގެ ކައުންސިލްގެ ރައީސް ވިދާޅުވިއެވެ.

ނިންމާލަމުން ހާތިމް ދިން މެސެޖަކީ ކޮންމެ ރަށެއްގައި ވެސް އެ ރަށެއްގެ ފޯކްލޯ ވާހަތައް ވިއްކާއިގެން އާމްދަނީ ލިބުމުގެ ފުރުސަތު އެބައިތް ކަމަށެވެ.

"ފޯކްލޯ ވާހަކަ އެބަހުރި. އެ ވިޔަފާރީން އާމްދަނީ ލިބޭ ގޮތަށް ބަދަލުކޮށްލަން ރަށަރަށުން ވިސްނަން މުހިއްމު ކަމެއް،" ހާތިމް ބުންޏެވެ.

ރިނބުދޫ ފާރުތަކުގައި ކުރަހާފައިވާ ކުރެހުންތަކަކީ މޯލްޑިވްސް އާޓްސް ކޮމިއުނިޓީގެ ހުނަރުވެރިންގެ މަސައްކަތެވެ.