އަމީނީމަގުގެ ތާރު އެޅުމުގެ މަސައްކަތް ކުރުމަށް އޭބީސީ ލޭޔަރު އެޅުމުގެ މަސައްކަތް މިއަދު ފެށިއިރު އެ މަސައްކަތް އަވަސް ކުރުމުގެ ގޮތުން މިހާރު ހަވާލު ކޮށްފައިވާ އެމްޓީސީސީގެ އަމާޒަކީ އަންނަ ބުދަ ދުވަހުގެ ނިޔަލަށް ސްޓެލްކޯއާ ހަމައަށް ތާރު އަޅާ ނިންމާލުން ކަމަށް އެކުންފުނިން ބުނެފިއެވެ.

އެމްޓީސީސީގެ ސީއީއޯ އާދަމް އާޒިމް މިއަދު "ހަތާވީސް" އަށް ވިދާޅުވީ އެ ކުންފުންޏާއި އަމީނީމަގުގެ މަސައްކަތުގެ ތާރު އެޅުމަށް ހަވާލުކުރީ މިދިޔަ ބުރާސްފަތި ދުވަހު ކަމަށެވެ. އަދި ހަމަ އެވަގުތު މަސައްކަތްތައް ފެށުނު ކަމަށާއި އެގޮތުން ހުކުރު ދުވަހު މަސައްކަތް ފެށުމަށްޓަކައި މޮބިލައިޒް ވެވުނު ކަމަށެވެ. އަދި މިހާރު އޭބީސީ ލޭޔަރުގެ މަސައްކަތް ފެށިއްޖެ ކަމަށް އާޒިމް ވިދާޅުވިއެވެ.

https://twitter.com/rdcmaldives/status/1624644142726000642?s=20&t=4a3UAEvoZvP-tK2_yiMKnQ

"އަޅުގަނޑުމެން މި އަމާޒު ކުރަނީ އިރާދަކުރެއްވިއްޔާ އަންނަ ބުދަ ދުވަހާ ހަމައަށް ތާރު އަޅާ ނިންމަން. އެއީ ސްޓެލްކޯ ކޮށްޓާއި ހަމައަށް. އިރާދަކުރެވިއްޔާ އެ އަމާޒަށް މި މަސައްކަތް ކުރަނީ،" އާޒިމް ވިދާޅުވިއެވެ.

އާޒިމް ވިދާޅުވީ އެ ކުންފުނިން އެ މަސައްކަތް ކުރަމުން ގެންދަނީ 24 ގަޑިއިރު ކަމަށެވެ.

"އަބަދުވެސް އަޅުގަނޑުމެންނަކީ ރައްޔިތުންނާއި ގުޅުން ހުންނަ މިފަދަ މުހިއްމު މަސައްކަތްތަކުގައި ގިނަ ވަގުތު މަސައްކަތުގައި ހޭދަ ކޮށްގެން އެކަމުން ރައްޔިތުންނަށް އުފާވެރިކަން ގެނެސްދޭން މަސައްކަތް ކުރާ ކުންފުންޏެއް،" އާޒިމް ފާހަގަކުރެއްވިއެވެ.

(އާރްޑީސީ)ގެ ތާރު މެޝިން ބަހައްޓާނެ ޖާގައެއް ލިބިފައި ނުވާތީ، އަމީނީމަގުގެ ތާރު އެޅުމުގެ މަސައްކަތް ހަވާލު ކޮށްފައި ވަނީ އެމްޓީސީސީއާއެވެ. އެ މައްސަލާގައި ބައެއް ފަރާތްތަކުން ހަގީގަތާއި ހިލާފު ބައެއް ވާހަކަތައް ވެސް މީޑިއާގައި ފަތުރާފައިވެއެވެ.

އާރްޑީސީ އިން ބުނީ އެ ކުންފުންޏަށް ނުވެގެން، އެއްވެސް މަސައްކަތެއް އެއްވެސް ބަޔަކާ ޙަވާލު ކޮށްފައި ނުވާނެ ކަމަށެވެ.

މާލޭގެ އަމީނީމަގުގައި ތާރު އެޅުމަށް ބޭނުންވާ މެޝިނަރީޒް އަދި މެޓީރިއަލްސް މުޅި މަގަށް ބޭނުންވާ ވަރަށް އާރްޑީސީގައި އެބަހުރި ކަމަށާއި ނަމަވެސް އެ ކުންފުނީގެ ތާރު މެޝިން ބަހައްޓާނެ ބިމެއް ހައުސިން މިނިސްޓްރީން އަދި ކަނޑައަޅާފައި ނުވާ ކަމަށެވެ.

އާރްޑީސީގެ ޕީއާރް، އެސިސްޓެންޓް މެނޭޖަރު އަހުމަދު ފައިރޫޒް ވިދާޅުވީ ތާރު މެޝިން ބަހައްޓާނެ ބިމެއް ހައުސިން މިނިސްޓްރީން އެ ކުންފުންޏަށް ހަމަޖައްސާ ނުދެވި ގިނަ ދުވަސްތަކެއް ވެގެން ދިއުމާއި އަދި ރައްޔިތުންގެ ޝަކުވާއަށް ރިއާޔަތް ކުރުމަށް ފަހު މިވަގުތު ނިމިފައިވާ ސެގްމަންޓް ތަކުގައި އާރްޑީސީގެ ތަކެތީގައި ތާރު އެޅުމުގެ މަސައްކަތް އެމްޓީސީސީ އަށް ހަވާލުކޮށް ނިންމުމުގެ މަސައްކަތް ފެށިފައިވާ ކަމަށެވެ.

“މިހެން މިކަން ކުރިއަށް ގެންދިއުމަށް ނިންމީ މިވަގުތަކީ އެމްޓީސީސީ އިން އެއާޕޯޓް ގައި ތާރުގެ މަސައްކަތް ކުރާ ވަގުތަކަށް ވެފައި މަސައްކަތް އަވަހަށް ނިންމުމަށް އެމްޓީސީސީ ލައްވާ ތާރު އެޅުމުގެ ފައިދާ ރައްޔިތުންނާއި އާރްޑީސީ އަށް ވެސް ބޮޑުވާނެ. ނަމަވެސް ބިމުގެ މައްސަލަ ހައްލު ކުރެވުނުހާ އަވަހަކަށް އާރްޑީސީ އިން ބާކީ ހުރި ސެގްމަންޓް ތަކުގައި ތާރު އެޅުމުގެ މަސައްކަތް ކުރިއަށް ގެންދާނެ،” ފައިރޫޒް ވިދާޅުވިއެވެ.

މި މަޝްރޫއުގެ ދަށުން 1.7 ކިލޯ މީޓަރުގެ މަގުގައި ތާރު އެޅުމަށް ވަނީ ހަމަޖެހިފައެވެ. އަދި އެ މަގުގައި ފެން ހިންދާ ނިޒާމު ގާއިމް ކުރުމަށް ވެސް ވަނީ ހަމަޖެހިފައެވެ. އަދި އެ މަގުގައި މަގުބައްތި ޖެހުމަށް ވެސް ވަނީ ހަމަޖެހިފައެވެ. މި މަސައްކަތް އާރްޑީސީ އަށް ހަވާލު ކޮށްފައި ވަނީ 84.4 މިލިއަން ރުފިޔާ އަށެވެ.

މިހާތަނަށް މާލޭގެ ގިނަ މަގުތަކެއް އާއްމުން ގަޔާވާ ހިތްގައިމު ގޮތަކަށް ހަދާފައިވާ އާރްޑީސީން ބުނީ މާލޭގެ މަގުތައް ތަރައްގީ ކުރަނީ އެ މަގުތަކަކީ އާއްމުންނަށް ހިތްފަސޭހަ ވާނެ ގޮތަކަށް ކަމަށެވެ. އެގޮތުން އަމީނީ މަގުގައި ވެސް އެ ސިފަ ފެނިގެން ދާނެ ކަމަށް އެކުންފުނިން ބުންޏެވެ.

މީގެއިތުރުން މި މަޝްރޫއުގެ ސަބަބުން އެކިއެކި މަސައްކަތްތަކަށް މަގު ކޮންނަން ޖެހޭ މިންވަރު މަދުވެ، މަގުގައި ދުއްވާ އުޅަނދުތަކަށާއި ހިނގާ މީހުންނަށް އިތުރު ލުއިތަކެއް ލިބިގެން ދާނެ ކަމަށް އާރްޑީސީ އިން ބުނެއެވެ.