ކުރިއަށް އޮތް ސީޒަނަށް ތައްޔާރުވުމުގެ ގޮތުން ވޭތުވެ ދިޔަ ތިން ސީޒަނުގެ ލީގު ޗެމްޕިއަން މާޒިޔާ ސްޕޯޓްސް ކުލަބުން ފެންވަރު ރަނގަޅު ޓީމެއް އެކުލަވާލުމުގެ މަސައްކަތް ދަނީ ކުރަމުންނެވެ. އެގޮތުން މިދިޔަ ސީޒަނުގައި ވެސް ކުޅުނު ކުޅުންތެރިންގެ އެއްބަސްވުންތައް އިތުރުކުރަމުން އަންނަ އިރު، މޮޅު ކުޅުންތެރިންތަކެއް ވެސް ވަނީ އަލަށް ސޮއިކޮށްފައެވެ.

މީގެ ތެރޭގައި މުޅިންހެން ހިމެނެނީ ގައުމީ ޓީމަށް މިހާރު ވެސް ކުޅެމުން އަންނަ ކުޅުންތެރިންނެވެ. އެއާއެކު މިފަހަރު މާޒިޔާ އެކުލަވާލާ ޓީމަކީ ގައުމީ ޓީމުގެ "ކުލަބް" ޓީމެއް ކަމަށް ބުނެވިދާނެއެވެ.

މާޒިޔާއިން މިފަހަރު ވަނީ ކްލަބް އީގަލްސްގެ ހަސަން ރާއިފް އަހުމަދު (ހަންނަ) އާއި ހުސެއިން ސިފާއު ޔޫސުފް (ކުރޯ)، އަހުމަދު ނޫމާން (ހެލްމެޓް)، ސެންޓޭގެ އިތުރުން ކްލަބް ވެލެންސިއާގެ މުހައްމަދު ފައިސަލް އާއި މިސްރުގެ މިޑްފީލްޑަރު ހަލީލް ޖަމާލް، ކްލަބް ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) އަދި ނިއު ރޭޑިއަންޓަށް ކުޅުނު ފުލްބެކް، ޝަމްވީލް މުހައްމަދު (ބޮންޑާ)ގެ ސޮއި ހޯދައިފަ އެވެ.

އަދި އެހެންމެ ރާއްޖޭގެ މޮޅު ކުޅުންތެރިޔާގެ މަގާމުވެސް ދެފަހަރު ހޯދާފައިވާ އަލީ ފާސިރު (ސެންޓޭ) އާއި ޔޫރަޕާއި އޭޝިއާ ފުޓްބޯޅައިގެ ތަޖުރިބާކާރެއް ކަމަށްވާ، ކޯޗު އިވާން ކޮލޭވްއާއެކު ސޮއިކޮށް މުޅި ޓީމު ވަރުގަދަ ކޮށްފައެވެ.

މާޒިޔާއަށް މި ގެނައި ބަދަލާއެކު އެ ޓީމުން ކުރިއަށް އޮތް ސީޒަނާ ވަރުގަދައަށް ކުރިމަތިލާނެ ކަމަށް ބުނެފައިވާ އިރު، އޭގެން ބޮޑު ފައިދާއެއް ދިވެހި ގައުމީ ޓީމަށް ކުރާނެ ކަމަށް އޮތީ ބެލެވިފައެވެ.

އެގޮތުން ގައުމީ ޓީމުގެ ކުރީގެ އެސިސްޓެންޓް ކޯޗު ސިމާއޯ ކޮސްޓާ ބުނީ މާޒިޔާއިން ކުރަމުން އެގެންދާ މަސައްކަތަކީ މިވަގުތު ދިވެހި ފުޓުބޯޅައަށް ފައިދާ ހުރި ކަމެއް ކަމަށެވެ.

"ދުނިޔޭގެ އެއްވެސް ގައުމީ ޓީމަކަށް މިކަހަލަ ފުރުސަތެއް އޮތްހެން ހިއެއް ނުވޭ، މިއީ ކޮންމެ ގައުމީ ކޯޗެއް ވެސް ދެކެން ބޭނުންވާނެ ހުވަފެނެއް." މާޒިޔާއާ ބެހޭ ގޮތުން ފޭސްބުކްގައި ކޮސްޓާ ބުނެފައިވެއެވެ.

އޭނާ ބުނީ އެއް ކުލަބެއްގައި ގައުމީ ޓީމުގެ ގިނަ ކުޅުންތެރިންތަކެއް ތިބުމަކީ އެކުޅުންތެރިންނަށް އެކީގައި ކުޅެން ލިބޭނެ ފުރުސަތެއް ކަމަށެވެ. އަދި މިހާރު ރާއްޖޭގެ ގައުމީ ޓީމު އޮޕަރޭޓްވާ ގޮތަކީ ތިން މަހުން ދެ ހަފުތާގައި ޕްރެކްޓިސް ކޮށްލުން ކަމަށާއި، އެކަމަކު ކުލަބުގައި ހުރިހާ ކުޅުންތެރިން އެކުގައި ކުޅުމުން އެ ތަފާތު ގައުމީ ޓީމުން ފެންނާނެ ކަމަށެވެ.

"ގައުމީ ކޯޗު މިހާރު ވިސްނަން ޖެހޭނެ އޭނާއަށް ލިބިފައި މިއޮތީ ކިހާވަރެއްގެ ނަސީބެއްކަން. މި ފުރުސަތުގެ ބޭނުން ރަނގަޅަށް ހިފަންޖެހޭ."

ކޮސްޓާގެ ވާހަކަތަކަށް މަޖާޒީ ރައްދެއް ދިނީ ގްރީންސްޓްރީޓުގެ ކޯޗު އަލީ ނިޝްތާރު އެވެ. އޭނާ ބުނީ ވާދަވެރި އެހެން ކުލަބެއްގެ ކޯޗުގެ ހައިސިއްޔަތުން އެކަމާ އެއްބަސްވެވެން ނެތް ކަމަށެވެ. އޭނާ އެހެން ބުނީ ގްރާންގެ މުހިއްމު ކުޅުންތެރިއެއް ކަމަށްވާ ޗޯޓު މާޒިޔާއަށް ދިއުމުން ކުރި ޕޯސްޓެއްގައެވެ. ނިޝްތާރު ބުނީ އެހެން ކުލަބުތަކަށް ގެއްލުންވީ ކަމުގައި ވިޔަސް ގައުމީ ޓީމަށް އޭގެން ފައިދާތަކެއް ކުރާނެ ކަމަށެވެ.

މާޒިޔާއަށް އަލަށް ގުޅުނު ކުޅުންތެރިންނާއެކު ޕްރެކްޓިސް މިއަދު ފެށުމަށް ވަނީ ހަމަޖެހިފައެވެ. މިހާތަނަށް އައު ސީޒަނަށް ތައްޔާރުވުމުގެ ގޮތުން އެހެން ކުލަބުތަކުން މާބޮޑު މަސައްކަތްތަކެއް ކުރާތައް އަދި ފެންނާކަށް ނެތެވެ.