ރާއްޖެއިން ޑީޕޯޓުކޮށްފައިވާ ބަޔަކު ރާއްޖެ އަށް އެތެރެކުރި މައްސަލައެއްގައި އިމިގްރޭޝަންގެ ދެ އޮފިސަރަކު ވަޒީފާ އިން ވަކިކޮށްފިއެވެ.

މި މައްސަލައާ ގުޅުންހުރި ސިޓީތަކެއް މީގެކުރިން ސޯޝަލް މީޑިއާގައި ދައުރުވެފައެވެ. އޭރު ދައުރުވީ އެ މައްސަލާގައި ޝާމިލުވާ ފަރާތްތަކަށް ފިޔަވަޅު އަޅައި ދިނުމަށެވެ.

ސިވިލް ސާވިސް ކޮމިޝަން (ސީއެސްސީ)ގެ ރައީސަށް އިމިގްރޭޝަނުން ފޮނުވާފައިވާ އެ ސިޓީގައި ބުނެފައި ވަނީ ރާއްޖެއިން ޑީޕޯޓުކޮށް ބޯޑާ ކޮންޓްރޯލް ސިސްޓަމްގެ ސްކްރީން ލިސްޓަށް އަރުވާފައިވާ ބަންގްލަދޭޝްގެ ދެ މީހަކު ރާއްޖެ އަށް އެތެރެ ކޮށްފައިވާ ކަމަށެވެ. އެކަން ކޮށްފައި ވަނީ ޗީފް އިމިގްރޭޝަން އޮފިސަރު އަހުމަދު ގާސިމް ގަސްދުގައި ކަމަށް ވެސް ބުނެފައިވެއެވެ.

އޭރު އިމިގްރޭޝަންގެ އެއާޕޯޓު ޑިވިޝަން ހިންގުމާއި ހަވާލުވެ ހުންނެވި ޗީފް ޕްރިންސިޕަލް އިމިގްރޭޝަން އޮފިސަރު މޫސާ ރަމީޒާ ހަމައަށް އަހްމަދު ގާސިމްގެ މައްސަލަ ގެނައުމުން ހިއުމަން ރިސޯސް ސެކްޝަން އަދި އެޗްއާރްއެމްޑީ ކޮމެޓީއަށް އެ މައްސަލަ ހުށަހަޅާފައި ނުވާ ކަމަށެވެ. އެ މައްސަލަ ހުށަހަޅާފައި ވަނީ އަހްމަދު ގާސިމަކީ މޫސާ ރަމީޒުގެ ގާތް މީހަކަށް ވާތީ ކަމަށް އިމިގްރޭޝަނުން ސިވިލް ސާވިސް ކޮމިޝަނަށް ފޮނުވާފައިވާ ސިޓީގައި ބުނެފައިވެއެވެ.

އެހެންކަމުން އެއީ މޫސާ ރަމީޒުގެ މަގާމުގެ އިހްތިޔާރު ގަސްދުގައި ނާޖާއިޒު ގޮތެއްގައި ތިމާގެ ނުވަތަ ހައްގު ނޫން ފަރާތެއްގެ ފައިދާއަށް ނުވަތަ މަސްހަލަތަށް ބޭނުން ކުރުމުން ކަމަށް ވެސް އިމިގްރޭޝަންގެ ސިޓީގައި ބުނެފައިވެއެވެ.

އެ މައްސަލައާ ގުޅިގެން މޫސާ ރަމީޒުގެ ބަޔާން ނެގުމަށް ވެލާނާ ކޮންފަރެންސް ރޫމަށް ހާޒިރު ކުރުމަށް އެންގިފައިވާ ކަމަށާއި ނަމަވެސް އެ ކޮމެޓީ އަށް ހާޒިރުވާން އުޒުރުވެރިވާ ކަމަށް މޫސާ ރަމީޒު އަންގާފައިވާ ކަމަށް ބުނެފައިވާ ކަމަށް އިމިގްރޭޝަން އިން ބުނެއެވެ. އަދި ދެވަނަ ފަހަރަށް ކޮމެޓީއަށް ޖަވާބުދާރީވުމަށް ހާޒިރުވާން އެންގުމުން ވެސް ހާޒިރުވެފައި ނުވާ ކަމަށް ބުންޏެވެ.

އެ މައްސަލައިގެ އިތުރުން މޫސާ ރަމީޒުގެ މަސައްކަތް ފުވައްމުލަކު ސިޓީ އަށް ބަދަލު ކޮށްފައިވާ ކަމަށް 2021ވަނަ އަހަރުގެ އޮގަސްޓު މަހުގައާ މިދިޔަ އަހަރުގެ އޮގަސްޓު މަހުވެސް އަންގާފައިވާއިރު އެކަމަށް އިއުތިރާޒު ކުރާކަން ވެސް ނާންގާ ދެ ފަހަރު މަތިންވެސް ފުރައިގެން ގޮސްފައި ނުވާތީ އެއީ ސިވިލް ސާވިސްގެ ގަވާއިދާ ހިލާފު އަމަލެއް ކަމަށް އިމިގްރޭޝަނުގެ ސިޓީގައި ބުނެފައިވެއެވެ.

އެހެންކަމުން އޭނާގެ މައްސަލަ ބަލައި ފިޔަވަޅު އަޅަން ސީއެސްސީ އަށް ވަނީ ފޮނުވައިފައެވެ.

އެކަމާއި ގުޅިގެން "ހަތާވީސް" އިން ކުރި ސުވާލަކަށް ޖަވާބު ދެއްވަމުން އިމިގްރޭޝަންގެ ކޮންޓްރޯލާ ހަނަފީ މީގެކުރިން ވިދާޅުވީ އެފަދަ މައްސަލައެއް ކަމާބެހޭ އިދާރާތަކަށް ފޮނުވާފައިވާ ކަމަށެވެ.

ބައެއް މީޑިއާތަކުން ހަނަފީއާ ހަވާލާދީ ބުނީ އެ ދެ މުވައްޒަފުން މިހާރު ވަޒީފާ އިން ވަކި ކޮށްފައިވާ ކަމަށެވެ. ނުފޫޒު ބޭނުން ކޮށްގެން އެއްވެސް ކަމެއް ހިނގާނެ ޖާގައެއް ނުދޭނެ ކަމަށް ހަނަފީ ވިދާޅުވެފައިވެއެވެ.