ލޭންޑިން ކްރާފްޓެއް ބަންޑުން ޖަހާލާ އޭގެއިން ދަތުރު މީހުންގެ ތެރެއިން ދެ މީހަކު ގެއްލިގެން ހޯދަމުން އަންނައިރު އަދިވެސް އެ ދެ މީހުން ފެނިފައި ނުވާ ކަމަށް އެމްއެންޑީއެފް އިން ބުނެފިއެވެ.

‏ކ. ގާފަރު ކައިރިން ބަންޑުންޖަހާލި އެލްސީވީން ގެއްލިގެން ހޯދަމުންދާ ދެ މީހުން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ހުއްޓުމެއްނެތި ކުރިއަށް ދާއިރު، ކަނޑާއި ވައިގެމަގުން މިހާތަނަށް ވަނީ ބޮޑު ސަރަހައްދެއް ބަލައިފައިވާ ކަމަށް ރޭ އެމްއެންޑީއެފް އިން ބުނެފައިވެއެވެ.

‏އެ 2 މީހުން ހޯދުމުގެ މަސައްކަތުގައި ކަނޑުމަގުން ކޯސްޓްގާޑް ޝިޕް އިމާދުއްދީންއާއި ފާސްޓް އިންޓަރސެޕްޓަރ ކްރާފްޓުން މިހާރު ވެސް ހަރަކާތްތެރިވަމުން އަންނައިރު މިހާތަނަށް ކުރެވުނު މަސައްކަތުން އެ ދެ މީހުން އަދި ފެނިފައެއް ނުވާ ކަމަށް އެމްއެންޑީއެފް އިން ހާމަކުރެއެވެ.

އެ ހާދިސާ ހިނގި ވަގުތު އެ އުޅަނދުގައި ޖުމްލަ 10 މީހުން ތިއްބެވެ. އޭގެ ތެރެއިން 8 މީހަކު ފެނިފައިވާއިރު ގެއްލިގެން ހޯދަމުން ދަނީ ދެ ބިދޭސީންނެވެ.