ކުރީގެ ތިން ރައީސުން ކަމަށްވާ ރައީސް މުހައްމަދު ނަޝީދާއި ރައީސް އަބްދުﷲ ޔާމީންގެ އިތުރުން ރައީސް އިބްރާހީމް މުހައްމަދު ސޯލިހު އެކުގައި މަސައްކަތް ކުރައްވަން ނިންމަވާފައިވާ ނިންމުންތަކާއި ގުޅޭ ގޮތުން ސިޔާސީ ޕާޓީތަކާއެކު މަޝްވަރާ ކުރުމަށް އެ ތިން ރައީސުން ކަނޑައެޅުއްވި މަންދޫބުން ނިންމަވައިފިއެވެ.

ރައީސް ނަޝީދުގެ ފަރާތްޕުޅުން މި މަސައްކަތުގައި އިސްކޮށް އުޅުއްވާނީ ކުރީގެ މިނިސްޓަރު ފައްޔާޒް އިސްމާއީލާއި ކުރީގެ ނައިބު ރައީސް އީވާ އަބްދުﷲ އެވެ. ރައީސް ސޯލިހްގެ ފަރާތްޕުޅުން މަންދޫބުންގެ ގޮތުގައި ހަމަޖެއްސެވީ ކުރީގެ މެންބަރު އަހުމަދު ސަލީމާއި މުހައްމަދު ރަޝީދު ހުސައިން (ބިގޭ) އެވެ.

އެގޮތުން މިއަދު މި މަންދޫބުންގެ ބައްދަލުވުމެއް ވަނީ ބާއްވައިފައެވެ. މެންހަޓަން ބިޒްނަސް ހޮޓެލްގައި މިއަދު ބޭއްވި ބައްދަލުވުމަށްފަހު ފައްޔާޒު މީޑިއާތަކަށް ވިދާޅުވީ ބައްދަލުވުމުގައި ވާހަކަ ދެއްކެވީ ކުރީގެ ތިން ރައީސުންގެ ކަންބޮޑުވުމާ އެއްކޮށް ގޮވާލެެއްވި ގޮވާލުމާ ގުޅިގެން މަންދޫބުންގެ މަސައްކަތް ކުރިއަށް ގެންދިއުމަށް މިއަދު މަޝްވަރާ ކުރެވިފައިވާ ކަމަށެވެ. އެގޮތުން ޕާޓީތަކަށް އެ މައްސަލަަތައް ގެންގޮސްގެން ކުރިއަށް ދާނެ ގޮތްތަކެއް މަންދޫބބުންގެ ތެރޭގައި ވާހަކަދެކެވުނު ކަމަށް އޭނާ ވިދާޅުވިއެވެ.

ތިން ރައީސުންގެ ފުރަތަމަ މަޝްވަރާ ބައްދަލުވުން އޮތީ މިދިޔަ ހުކުރު ދުވަހުގެ ރޭގެ ވަގުތެއްގައެވެ. އެ ބައްދަލުވުމުގައި ތިން ރައީސުން ވަނީ އެއްބަސްވުމެއްގައި ސޮއި ކުރައްވާފައެވެ.

މީޑިއާތަކަށް ހާމަކޮށްފައިވާ މި އެއްބަސްވުމުގައި ފާހަގަކޮށްފައިވާ ގޮތުގައި، ރައީސް ޑރ. މުހައްމަދު މުއިއްޒުގެ ވެރިކަމުގައި ދިވެހި ރައްޔިތުންނަށް ގާނޫނުއަސާސީން ލިބިދޭ އަސާސީ ހައްގުތަކަށް އުނިކަން ލިބި، އަދުލު އިންސާފު ގާއިމުކުރާ ކޯޓުތަކަށް ސަރުކާރުން ނުފޫޒު ފޯރުވަމުންދާ ކަމަށް ބަޔާންކޮށްފައިވެއެވެ.

އަދި ރައްޔިތުންގެ މަޖިލީހާއި ދައުލަތުގެ އެކި މުއައްސަސާތަކުގެ ބާރުތައް ހަނިކޮށްފައިވާ ކަމަށްވެސް މި ބަޔާނުގައި ތުހުމަތުކޮށްފައިވެއެވެ.

މީގެއިތުރުން، ނޫސްވެރިކަމުގެ މިނިވަންކަމަށް ހުރަސްއަޅައި ނޫސްވެރިން ހައްޔަރުކުރުމާއި، ގައުމުގެ އިގުތިސޯދީ ހާލަތު ދަށަށްގޮސް ތަކެތީގެ އަގު ބޮޑުވުމުގެ ސަބަބުން އާންމުންގެ ދިރިއުޅުމަށް ދަތިތަކާ ކުރިމަތިވެފައިވާކަން ތިން ރައީސުން ސޮއިކުރެއްވި ލިޔުމުގައި ބަޔާންކޮށްފައިވެއެވެ.

ސަރުކާރަށް މި މައްސަލަތައް ހައްލުކުރުމަށް ނުކުޅެދިފައިވާ ކަމަށާއި، ދައުލަތުގެ މާލިއްޔަތާއި މުދާ ރައްކާތެރިކަމާއެކު ބެލެހެއްޓޭނެ ކަމުގެ ޔަގީންކަން މިހާރު ގެއްލިފައިވާ ކަމަށްވެސް އެ ލިޔުމުގައި ބުނެފައިވެއެވެ.

އެއްބަސްވުމުގައި ވާގޮތުން، ދިވެހިން އެތައް އަހަރެއްގެ މަސައްކަތުން ހޯދި ޑިމޮކްރަސީގެ އުސޫލުތައް ނެތިގެންދާތީ، ގައުމު އަލުން ހަމަ މަގަށް ރުޖޫއަކުރުމަށްޓަކައި ތިން ރައީސުން ގުޅިގެން މަސައްކަތް ކުރުމަށް ވަނީ ނިންމާފައެވެ.

މި އެއްބަސްވުމުގެ ދަށުން އެންމެ އިސްކަމެއްގެ ގޮތުގައި ތިން ރައީސުން އެދިވަޑައިގެންފައިވަނީ ކޯޓުގެ އަމުރަކާ ހިލާފުވި ކަމަށް ބުނެ ބަންދުކޮށްފައިވާ ދެ ނޫސްވެރިންނާއި، އެކަމާ ގުޅިގެން އިހުތިޖާޖުކޮށްގެން ހައްޔަރުކުރި މީހުން މިނިވަންކުރުމަށެވެ. އަދި 'އަދަދު' ނޫހުގެ ދެ ނޫސްވެރިންގެ މައްޗަށް ކުރިއަށްގެންދާ ޝަރީއަތްތައް ހުއްޓާލުމަށްވެސް ވަނީ ގޮވާލާފައެވެ.