އީރާނުގެ އައު ލީޑަޝިޕާއެކު މަޝްވަރާ ކުރަން ތައްޔާރަށް ހުންނެވި ކަމަށް މީގެ ކުރިން ވިދާޅުވި ނަމަވެސް، އެމެރިކާގެ ރައީސް ޑޮނަލްޑް ޓްރަމްޕްގެ ރާގު ބަދަލުވެ، އީރާނަށް ދެމުންދާ ހަމަލާތައް ހުއްޓާލުމުގެ އެއްވެސް ވިސްނުމެއް ނެތް ކަމަށް އިއުލާން ކުރައްވައިފިއެވެ.

ރައީސް ޓްރަމްޕް މިއަދު ވިދާޅުވީ، އީރާނަށް އަމާޒުކޮށް ފަށާފައިވާ އަސްކަރީ އޮޕަރޭޝަންތައް ކުރިއަށްދާނީ އެމެރިކާއިން ކަނޑައަޅާފައިވާ "ހުރިހާ މަގްސަދުތަކެއް" ހާސިލްވަންދެން ކަމަށެވެ. މީގެ ތެރޭގައި އީރާނުގެ ނިއުކްލިއަރ ގާބިލުކަން ނައްތާލުމާއި މިސައިލް އުފައްދާ މަރުކަޒުތައް ސުންނާފަތިކުރުން ހިމެނޭ ކަމަށް ބެލެވެއެވެ.

މިއީ މީގެ ކުޑަ ވަގުތުކޮޅެއް ކުރިން ޓްރަމްޕް ދެއްކެވި ވާހަކަފުޅާ ދިމާ އިދިކޮޅު ނިންމުމެކެވެ. މީގެ ކުރިން ޓްރަމްޕް ވިދާޅުވެފައިވަނީ، އީރާނުގެ އެންމެ މަތީ ވެރިޔާ އާޔަތުﷲ އަލީ ޚާމަނައީ އަވަހާރަވުމާ ގުޅިގެން އުފެދުނު އީރާނުގެ "އައު ލީޑަޝިޕުން" އެމެރިކާއާއެކު ސީދާ މަޝްވަރާތަކެއް ކުރަން ބޭނުންވާ ކަމަށާއި، އެކަމަށް އޭނާވެސް ތައްޔާރަށް ހުންނެވި ކަމަށެވެ. ނަމަވެސް، މަސްރަޙު ދިރާސާކުރާ ފަރާތްތަކުން ބުނާ ގޮތުގައި، ޓްރަމްޕްގެ ރާގު މި ބަދަލުވީ މަޝްވަރާގެ މޭޒުދޮށަށް ދިއުމުގެ ކުރިން އީރާނު މުޅިން ބަލިކޮށްލުމުގެ ގޮތުންނެވެ.

ހަނގުރާމައިގެ އެންމެ ފަހުގެ މައުލޫމާތުތަކަށް ބަލާއިރު، މަސްރަޙު ވަނީ އިންތިހާއަށް ނުރައްކާވެފައެވެ. އީރާނުގެ ރިވެލޫޝަނަރީ ގާޑްސް އިން ވަނީ ޔޫއޭއީގެ އަލް-ރުވައިސް ސަރަހައްދުގައި ހުރި އިސްރާއީލުގެ މިސައިލް ދިފާއީ ނިޒާމު "ތާޑް" ގެ ރޭޑާ ސަރަހައްދަށް ސީދާ ހަމަލާދީ، އެ ނިޒާމު ސުންނާފަތިކޮށްލާފައެވެ. މިއީ އިސްރާއީލާއި އެމެރިކާގެ ދިފާއީ އައްޑަނައަށް ލިބުނު ބޮޑު ނާކާމިޔާބީއެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ސިފަކުރެވެއެވެ.

މީގެ އިތުރުން، އީރާނުން ދަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަވަހާރަކޮށްލުމަށް އަމާޒުކޮށް ޑްރޯން އަދި މިސައިލް ހަމަލާތައް ދެމުންނެވެ. މި ނުރައްކަލާ ގުޅިގެން ނަތަންޔާހޫ މިހާރު ހުންނެވީ ސިއްރު ބިންގަރާހެއްގައި ކަމަށް ރިޕޯޓްތައް ބުނެއެވެ. އިގްތިސާދީ މާހިރުން އިންޒާރު ދޭ ގޮތުގައި، ހަނގުރާމަ މިހާރު ހުރި މިސްރާބުން ކުރިއަށްދާނަމަ، ހޯރްމުޒް ކަނޑުއޮޅި ބަންދުވެ، ދުނިޔޭގެ ބާޒާރުގައި ތެޔޮ ފީފާއެއްގެ އަގު 100 ޑޮލަރަށްވުރެ މައްޗަށް އަރައިގެންދާނެއެވެ.