އީރާނުގެ އައު ލީޑަޝިޕުން އެމެރިކާއާއެކު މަޝްވަރާ ކުރަން ބޭނުންވާ ކަމަށާއި އެކަމަށް އެއްބަސްވެފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ބައިނަލްއަޤުވާމީ މީޑިއާތަކުން ރިޕޯޓްކުރާ ގޮތުގައި، މަޝްވަރާގެ ވާހަކަތައް ދެކެވޭ މި ދަނޑިވަޅުގައިވެސް އިސްރާއީލުން ވަނީ އީރާނުގެ 500 އަށްވުރެ ގިނަ އަމާޒުތަކަށް ވަރުގަދަ ހަމަލާތަކެއް ދީފައެވެ. މި ހަމަލާތަކުގައި އީރާނުގެ އަސްކަރީ މަރުކަޒުތަކާއި، ނިއުކްލިއަރ ފެސިލިޓީތަކަށް ބޮޑެތި ގެއްލުންތަކެއް ދީފައިވާ ކަމަށް އިސްރާއީލުގެ އަސްކަރިއްޔާއިން ބުނެއެވެ.

ރައީސް ޓްރަމްޕް ވިދާޅުވީ، އީރާނުގެ އައު ލީޑަރުން އެމެރިކާއާ ވާހަކަދައްކަން ބޭނުންވާކަމުގެ ސިގްނަލެއް ދީފައިވާ ކަމަށާއި، އޭނާވެސް ހުންނެވީ އެކަމަށް ތައްޔާރަށް ކަމަށެވެ.

"އަހަރެމެން ބޭނުމީ އީރާނަކީ ވަރުގަދަ ގައުމަކަށް ވާން. އެކަމަކު އެއީ ނިއުކްލިއާ ހަތިޔާރު ނެތް ގައުމަކަށް ވާންޖެހޭނެ،" ޓްރަމްޕް ވިދާޅުވިއެވެ.

މަޝްވަރާގެ މޭޒުދޮށަށް ދިއުމުގެ ކުރިން ދެ ފަރާތުންވެސް ހަނގުރާމައިގެ މައިދާނުގައި ބާރުގަދަ ކުރަން މަސައްކަތް ކުރަމުންދާއިރު، އީރާނުންވެސް ދަނީ ބަދަލުހިފުމުގެ ގޮތުން އެމެރިކާގެ އަސްކަރީ މަރުކަޒުތަކަށް މިސައިލް ހަމަލާތައް ފޮނުވަމުންނެވެ. މަސްރަޙު ދިރާސާކުރާ ފަރާތްތަކުން ބުނާ ގޮތުގައި، ރަސްމީކޮށް ހަނގުރާމަ ހުއްޓާލުމުގެ އެއްބަސްވުމަކަށް ނާދެވޭނީސް މި ހަމަލާތައް ހުއްޓުމަކަށް އައުމުގެ ފުރުސަތު ކުޑައެވެ.

މި ހަނގުރާމައިގައި މިހާތަނަށް އީރާނުން 200 އަށްވުރެ ގިނަ މީހުން މަރުވެފައިވާއިރު، މެދުއިރުމަތީގެ ވައިގެ ސަރަހައްދު ބަންދުކުރުމުގެ ސަބަބުން ދުނިޔޭގެ ދަތުރުފަތުރަށް ވަނީ ބޮޑެތި ބުރޫތަކެއް އަރާފައެވެ.