ތައުލީމު ދިނުމަށްޓަކައި ސަރުކާރުން، ހުރިހާ އެންމެން ގުޅިގެން ދޭ ފުރުސަތަކީ ކޮންމެ ކުއްޖަކުވެސް ރަނުގެ ފުރުސަތެއްގެ ގޮތުގައި ބަލައި، ދީނީގޮތުން ވަރުގަދަ ބިންގަލެއްގެ މަތީގައި ބިނާކުރާ، އެ ފުރުސަތުގެ ބޭނުންހިފާ ފުރުސަތަކަށް ހަދަންވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ހުޅުމާލެ ދެވަނަ ފިޔަވަހީގައި ސަރުކާރުން އިމާރާތް ކޮށްފައިވާ ޝަހީދު އަލީ ސްކޫލު ރަސްމީކޮށް ހުޅުވުމުގެ ގޮތުން މިއަދު ބޭއްވި ޖަލްސާގައި ވާހަކަދައްކަވަމުން ރައީސް މުއިއްޒު ވިދާޅުވީ ދީނުގައި އޮންނަގޮތަށް ކަންކަން ކުރުމަކީ، އެއީ ފަރުވާކުޑަކުރާ ކަމަކަށް ނަހަދައި، އަހްލާގީ ގޮތުން ރިވެތި އަހްލާގެއް ލިބިގެންވާ ކުއްޖަކަށް ކޮންމެ ކުއްޖަކުވެސް ވުމަށް އަޒުމް ކަނޑައަޅައި، ޓީޗަރުންނާއި، ސްކޫލްގެ ޕްރިންސިޕަލާއި، ހުރިހާ ބޭފުޅުން ވިދާޅުވާ ގޮތަށް ސްކޫލްތަކުގައި ހުރިހާ ކުދިންވެސް ކިޔެވުމުގެ ކަންކަން ގެންދިޔުމުން، މުސްތަގުބަލް އޮންނާނީ އުޖާލާކޮށް ކަމަށެވެ.

"އަޅުގަނޑުމެން މަސައްކަތް ކުރަމުންދާނީ، މާލެއާއި އަތޮޅުތެރޭގައި، އެއް ފެންވަރަކަށް ތައުލީމީ ނިޒާމުގެ ކަންތައްތައް ބައްޓަންކުރަން. ދެވޭ ތައުލީމީ ފެންވަރު އެއްވަރަކަށް ބަހައްޓަން. އެންމެ މަތީ ފެންވަރުގައި ތައުލީމީ ކަންތައްތައް ތަރުތީބުކުރަން. އެއީ، އެކި ސަބަބުތަކަށްޓަކައި މާލެއަށް އެބަ އަންނަންޖެހޭ،" ރައީސް ވިދާޅުވިއެވެ.

އެގޮތުން އެމަނިކުފާނު ވިދާޅުވީ މިފަހަރުވެސް 1500 އަށްވުރެ ގިނަ ކުދިން މާލެ ސްކޫލުތަކަށް ބަދަލުވެފައިވާ ކަމަށެވެ. އެއީ ގާތްގަނޑަކަށް 5000 އަށްވުރެ ގިނަ މީހުން ކަމަށް އެމަނިކުފާނު ވިދާޅުވިއެވެ.

"އޭގެ މާނައަކީ ރަށްރަށުގައި ނެތިއްޔޭ އަދިވެސް މާލޭގައި މި ހުންނަވަރަށް ތައުލީމީ ފެންވަރު ގާއިމުކުރެވިފައި. އަދިވެސް ނެތީއޭ. އޭގެ އިތުރު އެހެން ކަންކަންވެސް ހުންނާނެ. ވަޒީފާގެ ފުރުސަތުތަކާއި، ބޯހިޔާވަހިކަމާއި، މިހެންހުރި ކަންކަންވެސް އެބަހުރި،" ރައީސްގެ ވާހަކަފުޅުގައި ވިދާޅުވިއެވެ.

ދަރިވަރުންނަށް އަމާޒު ކުރައްވަވާ ވާހަކަދައްކަވަމުން ރައީސް ވިދާޅުވީ ހުރިހާ ކުދިންވެސް ނަމާދަށް ފަރުވާތެރިކަން އަދާކުރަންޖެހޭނެ ކަމަށެވެ. މައިންބަފައިންނަށް ކިޔަމަންތެރިވާންޖެހޭނެ ކަމަށެވެ.

"ޓީޗަރުން ބުނާބަސް އަހައި، ސްކޫލްގެ ވެރިން އަންގާ މަގުން ސްކޫލްތެރޭގައި އަދި ތައުލީމީ ހަޔާތުގައި ޖުމުލަކޮށް ކަންކަން ކުރަންވާނީ. އޭރުން އަޅުގަނޑުމެންގެ ތުއްތުކުދިންގެ މުސްތަގުބަލަށް އެ އެޅިގެންދަނީ ގުޑުވައިނުލެވޭވަރުގެ ވަރުގަދަ ބިންގަލެއް،" ރައީސް ވިދާޅުވިއެވެ.

ހުޅުމާލޭ ފޭސް 2 ގައި މިއަދު ހުޅުވި ޝަހީދު އަލީ ސްކޫލްގައި އިއްޔެގެ ނިޔަލަށް 2000 އަށް ވުރެ ގިނަ ދަރިވަރުން ވަނީ އެންރޯލްވެފައެވެ. ގްރޭޑް 1 އިން 10 އާއި ހަމައަށް ކިޔަވައިދޭން ނިންމާފައިވާ މި ސްކޫލުގައި 54 ކްލާސްރޫމް، ތިން ސައިންސް ލެބް، އެއް ލައިބްރަރީ އާއި ކޮމްޕިއުޓަރު ލެބްގެ އިތުރުން އިންޑޯ ހޯލަކާއި ބޭރުގައިވެސް ކުޅިވަރު ކުޅޭވޭނެ އިންތިޒާމް ވަނީ ހަމަޖެހިފައެވެ.