އިންޑިއާއިން ރަޝިޔާގެ ތެޔޮ ގަތުމާއި ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް އިންޑިއާގެ މުދަލަށް ޓެރިފް ބޮޑުކުރުމުގެ ސަބަބުން ދެ ގައުމުގެ ދެމެދު އުފެދިފައިވާ ނުތަނަވަސްކަން ހައްލުކުރުމަށް، އިންޑިއާ އާއި އެމެރިކާއިން މަޝްވަރާ ބައްދަލުވުމެއް ބާއްވައިފިއެވެ.

މި މަޝްވަރާ ބައްދަލުވުން ކުރިއަށް ގެންގޮސްފައިވަނީ ދެ ގައުމުގެ ވިޔަފާރީގެ ދާއިރާގެ އޮފިޝަލުންގެ މެދުގައި، މިއަދު ހެނދުނު އިންޑިއާގެ ވެރިރަށް ދިއްލީގައެވެ.

އިންޑިއާގެ ވިޔަފާރީގެ ދާއިރާގެ ހާއްސަ ސެކްރެޓަރީ އަދި އެމެރިކާއާއެކު ކުރިއަށްދާ ވިޔަފާރީގެ މަޝްވަރާތަކުގައި އިންޑިއާގެ އިސް މުރާސިލް ރާޖޭޝް އަގްރަވާލް ވިދާޅުވި ގޮތުގައި، އެމެރިކާގެ ވިޔަފާރީގެ އޮފިޝަލުންގެ ވަފުދެއް ދިއްލީއަށް ޒިޔާރަތްކޮށްފައިވެއެވެ. މި ވަފުދުގެ އިސްކޮށް ހުންނަވައިގެން ބައްދަލުވުމުގައި ބައިވެރިވެފައިވަނީ ދެކުނު އަދި މެދުތެރޭ އޭޝިޔާއަށް އެމެރިކާގެ ވިޔަފާރީގެ ނައިބު މަންދޫބު ބްރެންޑަން ލިންޗްއެވެ.

އަގްރަވާލް އިތުރަށް ވިދާޅުވީ، ދެ ގައުމުގެ މެދުގައި ވިޔަފާރީގެ މަޝްވަރާތައް ކުރިއަށް އޮތްތަނުގައިވެސް ބޭއްވުމަށް ހަމަޖެހިފައިވާ ކަމަށާއި، މިއީ ހުށަހަޅާފައިވާ ދެފަރާތުގެ ވިޔަފާރީގެ އެއްބަސްވުމާ (ބީ.ޓީ.އޭ) ގުޅޭ މަޝްވަރާތަކުގެ ދެވަނަ ބައްދަލުވުން ކަމަށެވެ. އަދި މި ބައްދަލުވުމަކީ ހަމައެކަނި ވިޔަފާރިއާ ގުޅުންހުރި މައްސަލަތަކުގައި ކުރިއަށް ދާނެ ގޮތްތަކާމެދު މަޝްވަރާކުރުމަށް ބާއްވާ ބައްދަލުވުމެއް ކަމަށް އޭނާ ވިދާޅުވިއެވެ.

މީގެ ހަފްތާއެއް ކުރިން، ޓްރަމްޕް ވަނީ އިންޑިއާއާ ދެމެދު ވިޔަފާރީގެ ގުޅުން ބަދަހިކޮށް، ހިތްހަމަނުޖެހުންތައް ނައްތާލާނެ ކަމަށް ބުނެފައެވެ. ޓްރަމްޕްގެ މި ބަސްތަކަށް އިޖާބަ ދެއްވައި، އިންޑިއާގެ ބޮޑުވަޒީރު ނަރެންދުރަ މޯދީވެސް ވަނީ ދެ ގައުމުގެ ގުޅުން ބަދަހިކަމަށާއި ދެ ގައުމަކީ އެކުވެރި ދެ ގައުމު ކަމަށް ފާހަގަކުރައްވައިފައެވެ. އެމެރިކާއިން އިންޑިއާއަށް ޓެރިފްތައް އިތުރުކުރަން ނިންމުމުގެ ސަބަބުން، ބީ.ޓީ.އޭއާ ގުޅޭ މަޝްވަރާތަކަށް އޮގަސްޓް 25-29 އަށް އެމެރިކާގެ ވިޔަފާރީގެ ޓީމެއް އިންޑިއާއަށް ޒިޔާރަތްކުރުމަށް ހަމަޖެހިފައި އޮތް ނަމަވެސް، އެ މަޝްވަރާތައް ފަސްކުރެވުނެވެ. އެއަށްފަހު، ދެފަރާތުންވެސް ހަފްތާއަކު އެއްފަހަރު އޮންލައިންކޮށް ބައްދަލުވުންތައް ބާއްވަމުން ގޮސްފައިވެއެވެ.

ވިޔަފާރި މިނިސްޓްރީގެ ތަފާސްހިސާބުތަކުން ދައްކާ ގޮތުގައި، އިންޑިއާއިން އެމެރިކާއަށް ކުރާ އެކްސްޕޯޓް ޖުލައި މަހު 8.01 ބިލިއަން ޑޮލަރަށް އަރާފައިވާއިރު، އޮގަސްޓް މަހު 6.86 ބިލިއަން ޑޮލަރަށް ދަށަށް ގޮސްފައިވެއެވެ.

އަގްރަވާލް ވިދާޅުވި ގޮތުގައި، ދެ ގައުމުގެ މެދުގައި ވާހަކަ ދައްކަމުން ދިޔަ ނަމަވެސް، މިހާރުގެ ހާލަތާއި ގުޅިގެން މަޝްވަރާތައް ކުރިއަށް ނުގޮސް ދިގުލާފައިވެއެވެ. އެމެރިކާއިން ވަނީ އިންޑިއާއަށް ފިއްތުންތަކެއް ކުރިމަތިކޮށް، ރަޝިޔާގެ ތެޔޮ ގަތުން ހުއްޓާލުމަށް ގޮވާލާފައެވެ. އެމެރިކާއިން ބުނަނީ، އިންޑިއާއިން ރަޝިޔާގެ ތެޔޮ ގަތުމަކީ ޔޫކްރެއިނާ ދެކޮޅަށް ރަޝިޔާއިން ކުރަމުންދާ ހަނގުރާމައަށް ފައިސާގެ އެހީތެރިކަން ފޯރުކޮށްދިނުމެއް ކަމަށެވެ. އަދި އެމެރިކާގައި އުފައްދާ ކާބޯތަކެތި އިންޑިއާއިން އިމްޕޯޓް ނުކުރަންޏާ ދަތިކުރުމުގެ ފިޔަވަޅު އަޅާނެ ކަމުގެ އިންޒާރުވެސް އިންޑިއާއަށް ވަނީ ދީފައެވެ.

އިންޑިއާއިން ރަޝިޔާއާ އޮންނަ ހާއްސަ ގުޅުމުގައި، އިންޑިއާއިން ރަޝިޔާގެ ތެޔޮ ގަންނަ މައްސަލައާ ގުޅިގެން އެމެރިކާއިން ވަނީ އިންޑިއާ މުދަލުން އެ ގައުމުން ނަގާ ޓެރިފް 50 ޕަސެންޓަށް ބޮޑުކޮށް، އެއަށް އަމަލުކުރަން ފަށާފައެވެ.

މި ބައްދަލުވުމަކީ، ކުރިއަށް އޮތް ރަސްމީ ވިޔަފާރީގެ މަޝްވަރާތަކަށް މަގުފަހިކޮށް، ދެ ގައުމުގެ ދެމެދުގައި ވިޔަފާރީގެ ގުޅުން ބަދަހިކުރުމަށް ބޭއްވުނު ބައްދަލުވުމެކެވެ.