ފާއިތުވެދިޔަ ހަފްތާއެއްގެ ތެރޭގައި ސޯޝަލް މީޑިއާގައި އެންމެން އަތުކުރި އޮޅާލާ ވީޑިއޯތަކެއް ދަނީ ފެންނަމުންނެވެ. ނަމަވެސް މިއީ ކޮންކަމަކާއި ގުޅޭ ވީޑިއޯއެއް ކަމެއް ނޭނގެއެވެ.

ވީޑިއޯއިން ފެންނަނީ އަންހެނުންނާއި ފިރިހެނުން ހިމެނޭ ގޮތައް އެންމެން ވެސް އަތުގެ މުލައްދަނޑިއާ ހަމައަށް އަތުކުރި އޮޅާތަނެވެ. މި ކެމްޕެއިން އިންތިޒާމްކުރާ ފަރާތްތަކުން ބުނެފައި ވަނީ މިއީ ގައުމީ ކެމްޕެއިނެއް ކަމަށެވެ.

މި ކެމްޕެއިންއާ ދެކޮޅުވާނެ އެކަކު ވެސް ނުހުންނާނެ. އެ ޔަގީންކަން އެބަ އޮތް. ކޮންމެ ފިކުރެއްގެ މީހަކު ވިޔަސް، މިކަމަށް އިޖާބަދޭނެ
ޝަފްރާޒު އަހުމަދު، ކެމްޕެއިންގައި އިސްކޮށް އުޅުއްވާ އެމްއެންޔޫ ދަރިވަރު

މި ވީޑިއޯތަކުގައި މަޤްބޫލު ބައެއް ޝަހްސިއްޔަތުތަކާއި، ޔުނީފޯމް އެޅި ބައެއް އިދާރާތަކުގެ މުވައްޒަފުން ވެސް އަތުކުރި އޮޅާތަން ފެނެއެވެ. އޭގެތެރޭގައި ސިއްހަތާއި ބެހޭ ވަޒީރު އަބްދުﷲ ނާޒިމް އާއި ކުޑަކުދިންގެ ހާއްސަ ޑޮކްޓަރު އަބްދުﷲ ނިޔާފާއި ޕީއެސްއެމްގެ ކުރީގެ މެނޭޖިންގ ޑިރެކްޓަރ ޒީނާ ޒާހިރު ވެސް ހިމެނިވަޑައިގަންނަވައެވެ.

https://web.facebook.com/reel/1172518001474207

މި ކެމްޕެއިންގައި އިސްކޮށް ހަރަކާތްތެރިވާ ގައުމީ ޔުނިވާސިޓީގެ ދަރިވަރެއް ކަމުގައިވާ ޝަފްރާޒް އަހުމަދު ވިދާޅުވީ މި ކެމްޕެއިނަކީ "މީޑިއާ އެންޑް ޕަބްލިކް ރިލޭޝަން" ކިޔަވަމުންދާ އެ ޔުނިވާސިޓީގައި ދަރިވަރުންތަކެއް އިސްވެ ހިންގާ ހަރަކާތެއް ކަމަށާއި ވަރަށް އަވަހަށް އެ ކެމްޕެއިންގެ މަގުސަދު ހާމަވެގެންދާނެ ކަމާށެވެ.