މިހާރު މާލެ ސިޓީ ކައުންސިލްގެ ހުރިހާ ހިދުމަތްތަކެއް ލިބެމުން ދާނީ ބޮޑުތަކުރުފާނު މަގުގެ ދެކުނު ފަރާތުގައި ހުންނަ، މާލެ ސިޓީގެ ހޯލުންނެވެ.

މީގެ ކުރިން މާލޭގެ އެކި ސަރަހައްދުތަކުގައި ހުރި ނުވަ ޢިމާރާތަކުން ހިދުމަތް ހޯދަންޖެހުމުގެ ސަބަބުން ރައްޔިތުންނަށް ދިމާވި ދަތިތަކަށް، މި ބަދަލާއެކު ވަރަށް ބޮޑު ލުޔެއް ލިބިގެންދާނެ ކަމަށް ވެސް، މޭޔަރު ވިދާޅުވިއެވެ.

މާލެ ސިޓީގެ މޭޔަރުކަމާ ޢާޒިމް ހަވާލުވެވަޑައިގެންނެވުމަށް ފަހު، ''ކުރެވޭނެ ކުރާނަން'' މި ތީމުގެ ދަށުން ކުރައްވަމުން ގެންދަވާ މަސައްކަތްޕުޅުތަކުގެ ކާމިޔާބީގެ ހެއްކެއްގެ ގޮތުގައި މިކަން ފާހަގަކުރައްވައި މޭޔަރ އާޒިމް ވިދާޅުވީ، ނުވަ އިމާރާތަކުން ހިދުމަތް ހޯދަންޖެހުމުން ރައްޔިތުން އުފުލަންޖެހުނު ތަކުލީފަށް، މިހާރު މި ލިބިގެންދަނީ، ބޮޑު ލުޔެއް ކަމަށެވެ.

"ލޯތްބާއެކު، އުފަލުން ތިބެ، އަވަސް ހިދުމަތްތަކެއް ރައްޔިތުންނަށް ފޯރުކޮށްދިނުމަށް އަޅުގަނޑު ފަށައިފައިވާ މަސައްކަތަށް މީގެ ސަބަބުން ވަރަށް ބޮޑު ކުރިއެރުމެއް ލިބިގެންދާނެ. ނަތީޖާއަކަށް ވެގެންދާނީ، ރައްޔިތުން އެދޭ ފަދަ އަވަސް، އިހްލާސްތެރި ހިދުމަތްދޭ ތަނެއްގެ ގޮތުގައި ރައްޔިތުން، މާލެ ސިޓީ ކައުންސިލް ބަލައިގަތުން. އަދި ރައްޔިތުން އުފަލުން ތިބެ ހިދުމަތް ހޯދުމަށް އަންނަ ތަނަކަށް، މާލެ ސިޓީ ކައުންސިލް ބަދަލުވެގެން ދާނެ." މޭޔަރު އާޒިމް ވިދާޅުވިއެވެ.

ކާރޫބާރު ބޮޑު މާލޭގެ އެކި އަވަށްތަކުގައި ހުރި، ނުވަ ޢިމާރާތެއްގައި ހިނގަމުންދިޔަ މަސައްކަތްތައް، އެއް އޮފީހަކަށް ބަދަލުކުރުމުން، ހަރަދު ކުޑަވެ، ދެވޭ ހިދުމަތް އަވަސްވެ، ހިދުމަތުގެ ފެންވަރު ރަނގަޅުވުމުގެ އިތުރުން، ހިންގުމަށް ވެސް އިންގިލާބީ ހެޔޮ ބަދަލެއް އަންނާނެ ކަމަށް މާލެ ސިޓީ ކައުންސިލުން ފާހަގަ ކުރެއެވެ.

އެ ބަދަލާއެކު އެއްތަނަކުން ލިބެންފަށާ ހިދުމަތްތަކުގެ ތެރޭގައި، ލޭންޑް އެންޑް ބިލްޑިން، ވައިޓަލް ރަޖިސްޓްރޭޝަން، ޕްރޮކިއުމަންޓް، ހިއުމަން ރިސޯސަސް، އެޑްމިން، ކައުންސިލް ބިއުރޯ، ފައިނޭންސް އަދި ރޯޑް މެނޭޖްމަންޓްގެ މަސައްކަތްތައް ހިމެނެއެވެ.

ކައުންސިލްގެ އައު އިމާރާތުގެ މަސައްކަތް ވެސް މިހާރު ދަނީ ބާރު ސްޕީޑުގައި ކުރެވެމުންނެވެ. އެ ގޮތުން މިހާރު ކޮންކްރީޓް މަސައްކަތުގެ، 60 އިންސައްތަ ނިމިފައިވާ މި ޢިމާރާތުގެ މަސައްކަތް، 2026 ވަނަ އަހަރު އެއްކޮށް ނިމުމުން، ރާއްޖޭގައި އޮތް އެންމެ ބޮޑު ކައުންސިލަށް، އަމިއްލަ ވަޒަނެއް ނެތުމުންގެ އުނިކަން، އަބަދުގެ އަބަދަށް ނެތިގެންދާނެ ކަމަށް، މާލެ ސިޓީ ކައުންސިލުން ފާހަގަކުރެއެވެ. މި ކަމުގެ ސަބަބުން، ދެ ލައްކަ ފަންސާސް ހާހެއްހާ ރައްޔިތުން، ޚިދުމަތް ހޯދުމަށް ޓަކައި، ގަނެ ތެޅެމުން އައި އައުމަށް، ނިމުމެއް އަންނާނެކަމަށް، މާލެ ސިޓީ ކައުންސިލުން އުއްމީދުކުރެއެވެ.