ޗިލްޑްރަންސް އޮމްބަޑްސްޕާސަންގެ މަގާމުގައި ހުންނެވި ނިއުމާތު ޝަފީގުގެ ދައުރު ދަންމާލަން ރައީސް ޑރ. މުހައްމަދު މުއިއްޒު ރައްޔިތުން މަޖިލީހުގައި އެދިވަޑައިގެންފިއެވެ.

ނިއުމާތުގެ ދައުރު މިމަހުގެ 23ވަނަ ދުވަހަށް ހަމަވާނެއެވެ. މަޖިލިސް ރައީސް އަބްދުއްރަހީމަށް ރައީސް މުއިއްޒު ފޮނުއްވި ސިޓީފުޅެއްގައި ވިދާޅުވީ ނިއުމާތުގެ ދައުރު އިތުރު ފަސް އަހަރަށް ދަންމާލަން ހުށަހަޅުއްވާ ކަމަށެވެ.

ޗިލްޑްރަންސް އޮމްބަޑްސްޕާސަންގެ މަގާމަކީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ބަޔާން ކޮށްފައިވާ މަގާމެކެވެ. އެ ގަނާނުގައި ބުނެފައި ވަނީ އެ ގާނޫނުގައި ބަޔާންކޮށްފައިވާ ކަންކަން ތަންފީޒުކުރާ މިންވަރު މޮނިޓާ ކުރުމަށްޓަކައި އައްޔަންކުރެވޭ މިނިވަން، މުސްތަގިއްލު ޗިލްޑްރަންސް އޮމްބަޑްސްޕާސަނެއް ހުންނަންވާނެ ކަމަށެވެ.

ޗިލްޑްރަންސް އޮމްބަޑްސްޕާސަންގެ މަގާމަށް މީހަކު އައްޔަންކުރާނީ، ރައީސުލްޖުމްހޫރިއްޔާއެވެ.

އެ މަގާމުގައި ހުންނަވާ ބޭފުޅެއްގެ ޒިންމާ އަކީ ދައުލަތުގެ އިދާރާތަކުން އެ ގާނޫނަށް އަމަލުކުރާ މިންވަރު ދެނެގަނެ އެ ގާނޫނު ތަންފީޒުކުރުމަށް ކުރަންޖެހޭ އެންމެހައި ކަންކަން ކުރުމަށް ބާރުއެޅުމެވެ.

އަދި ކުޑަކުދިންގެ ހައްގުތައް ރައްކާތެރިކުރުމާބެހޭ މުއާހަދާއާ އެއްގޮތަށް ދައުލަތުގެ އިދާރާތަކުން އަމަލުކުރާ މިންވަރު ދެނެގަނެ، އެ މުއާހަދާއާ އެއްގޮތަށް އަމަލުކުރާކަން ކަށަވަރުކުރުމުގެ ގޮތުން ކުރަންޖެހޭ އެންމެހައި ކަންކަން ކުރުމަކީ ވެސް ޗިލްޑްރަންސް އޮމްބަޑްސްޕާސަންގެ ޒިންމާއެކެވެ.