ރާއްޖެ ޑިޖިޓަލައިޒް ކުރުމުގެ ގޮތުން ސަރުކާރުން ފެށި "ދިވެހިރާއްޖެ 2.0" ރޭ އިފްތިތާހް ކޮށްފިއެވެ.

ދާދިފަހުން މާލޭގައި ހުޅުވި ފަސް ތަރީގެ ބާސެލޯ ނަސެންދުރާގައި ރޭ ބޭއްވި ރަސްމިއްޔާތެއްގައި އެކަން އިފްތިތާހް ކޮށްދެއްވީ ރައީސް ޑރ. މުހައްމަދު މުއިއްޒެވެ.

"ދިވެހިރާއްޖެ 2.0" އަކީ ރައީސުލްޖުމްހޫރިއްޔާގެ ހާއްސަ އިސްނެންގެވުމުގެ މަތިން، މުޅި ދައުލަތުގެ ހުރިހާ މުއައްސަސާތައް ގުޅިގެން މަސައްކަތްކޮށް ޑިޖިޓަލް ދާއިރާއިން ރާއްޖެ އިންގިލާބީ އަދި އިސްލާހީ ބަދަލުތަކަކާ ދިމާލަށް ގެންދިއުމަށް އިފްތިތާހުކުރި ޕްރޮގްރާމެކެވެ.

އަދި މޯލްޑިވްސް 2.0 އަކީ ހަލުވި، ރައްކާތެރި އަދި ދެފުށްފެންނަ ހިދުމަތް ދިނުމުގެ އަމާޒު ހާސިލުވާގޮތަށް ދިވެހިރާއްޖެ ޑިޖިޓަލް އައު ޒަމާނަކަށް ވާސިލްކޮށްދިނުމަށް ހިންގަންފަށާ މަޝްރޫއެކެވެ. މި މަޝްރޫއަކީ ޑިޖިޓަލް ވަސީލަތްތަކުގެ އެހީގައި ރައްޔިތުންނަށް މުޅި ދައުލަތުން ފޯރުކޮށްދޭ ހިދުމަތްތަކާއި މުއައްސަސާތައް އިދާރީ ގޮތުން ހިންގާ ގޮތަށް އިންގިލާބީ ބޮޑެތި ބަދަލުތައް ގެނައުމަށް އަމާޒުކޮށް، ކުރިއަށް އޮތް 3 އަހަރުން ނަތީޖާ ނެރެދިނުމަށް ހިންގާ މަޝްރޫއެކެވެ.

މި ޕްރޮގްރާމު ސަރުކާރުން ފެށިއިރު މިއަހަރު ކުރީކޮޅު ރައީސް ޑރ. މުހައްމަދު މުއިއްޒު ވަނީ ދުނިޔޭގައި އެންމެ ބޮޑަށް ޑިޖިޓަލައިޒްގެ ދާއިރާ އިން ކުރިއަރާފައިވާ އެސްޓޯނިއާ އަށް ވަޑައިގެން އެގައުމުގެ ކަންކަން ތަޖުރިބާ ކުރައްވަވާފައެވެ.