ސުޕްރީމް ކޯޓުން ޖުޑީޝަލް ސާވިސް ކޮމިޝަން (ޖޭއެސްސީ) އަށް އައްޔަންކުރާ މެމްބަރުގެ މަގާމަށް އެ ކޯޓުގެ ފަނޑިޔާރު ހުސައިން ޝަހީދު ހަމަޖައްސައިފި އެވެ.

ސުޕްރީމް ކޯޓުގެ ފަނޑިޔާރުންގެ ތެރެއިން ޖޭއެސްސީގައި ހުންނެވި ކުރީގެ ފަނޑިޔާރު ހުސްނުއްސުއޫދު މިމަހު ފަނޑިޔާރުކަމުން އިސްތިއުފާ ދެއްވުމުން ޖޭއެސްސީގެ މެމްބަރުކަމުގެ މަގާމު އޮތީ ހުސްވެފަ އެވެ.

ސުއޫދުގެ ބަދަލުގައި ސުޕްރީމް ކޯޓަށް ފަނޑިޔާރު ޝަހީދު އައްޔަން ކުރެއްވީ މިދިޔަ ހަފުތާގަ އެވެ.

ޖޭއެސްސީއަށް ފަނޑިޔާރު ޝަހީދު އައްޔަން ކުރަން ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމީ މިއަދެވެ.

ސުއޫދު މަގާމު އިސްތިއުފާ ދެއްވީ އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފެށި މައްސަލައަކާ ގުޅިގެންނެވެ. އޭނާގެ އިތުރުން ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ. އަޒްމިރަލްދާ ޒާހިރު ވެސް ވަނީ ސަސްޕެންޑްކޮށްފަ އެވެ.