ނޮވެމްބަރު، 3، 1988 ގެ އުދުވާނީ ހަމަލާގައި ޝަހީދުވި ސިފައިންގެ އާއިލާތަކާއި އެދުވަހު ދެއްކި ހިތްވަރަށްޓަކައި މެޑަލް ލިބިފައިވާ ސިފައިންނަށް ހާއްސަ އިނާޔަތެއް ދޭން ސަރުކާރުން ނިންމައިފި އެވެ.

ޑިފެންސް މިނިސްޓްރީން މިއަދު ނެރުނު އުސޫލުގައިވާ ގޮތުން ނޮވެމްބަރު 3 ގައި ޝަހީދުވި ސިފައިންގެ އާއިލާގެ މެމްބަރުންގެ ތެރެއިން މައިންބަފައިންނާއި ދަރިން އަދި ހުވަފަތް އަނބިން ކުރެ ކޮންމެ މީހަކަށް މަހަކު 9،000ރ. ގެ އިނާޔަތެއް ލިބޭނެ އެވެ.

އެ އުސޫލުގައިވާ ގޮތުން އެދުވަހުއަމިއްލަ ފުރާނަ އަށް ބެލުމެއް ނެތި ދެއްކި ހިތްވަރަށްޓަކައި ހުރަވީ ރަން މެޑަލް ލިބިފައިވާ ސިފައިންނަސް މަހަކު 9،000ރ. ގެ އިނާޔަތެއް ވެސް ލިބޭނެ އެވެ. އަދި ހުރަވީ ރިހި މެޑަލް ލިބިފައިވާ ސިފައިންނަށް މަހަކު 8،000ރ. ގެ އިނާޔަތެއް ވެސް ލިބޭނެ ކަމަށް އެ އުސޫލުގައިވެ އެވެ.

މީގެ އިތުރުން ހިތްވަރު ގަދަކަމުގެ ކުލަ ލިބިފައިވާ ސިފައިންނަށް މަހަކު 6،000ރ. ގެ އިނާޔަތެއް ދިނުމަށް ވެސް އުސޫލުގައި ވަނީ ކަނޑައަޅައިފަ އެވެ.