ރައީސް ޑރ. މުހައްމަދު މުއިއްޒުގެ ދަރިކަލަކަށް ނިސްބަތްކޮށް އެމްޑީޕީގެ އިސް އެކްޓިވިސްޓެއް ކަމަށްވާ މަރިޔަމް ޒުބެއިރު (މަންދީ) މުޒާހަރާއެއްގައި ދެއްކި ވާހަކަތަކާ ގުޅިގެން އޭނާއާ ދެކޮޅަށް ރައީސްގެ އަނބިކަނބަލުން ސާޖިދާ މުހައްމަދުގެ ފަރާތްޕުޅުން ސިވިލް ކޯޓުގައި ދައުވާކޮށްފި އެވެ.

ވޭޕް މަނާކުރަން ސަރުކާރުން ނިންމި ނިންމުމާއި ރައީސް މުއިއްޒުގެ ދަރިކަލަކާ ގުޅުވައިގެން އެމްޑީޕީގެ މުޒާހަރާގައި މަންދީ ދެއްކި ވާހަކަތަކާ ގުޅިގެން އޭނާ އާއި އެމްޑީޕީ އާއި އެ ޕާޓީގެ ޗެއާޕާސަން ފައްޔާޒް އިސްމާއިލަށް ދައުވާ ކުރާނެ ކަމަށް ރައީސްގެ އާއިލާގެ ވަކީލް އާޒިމާ ޝަކޫރު ކުރިން ވިދާޅުވެފައިވެ އެވެ.

ކުރިން ބަންޑާރަ ނައިބުކަން ކުރެއްވި އާޒިމާ ލޯ ފާމުން ނެރުނު މިއަދު ބަޔާނެއްގައި ބުނީ ރައީސްގެ ދަރިކަލުން އުމައިރު މުހައްމަދު މުއިއްޒަށް ނިސްބަތްކޮށް ދައްކާފައިވާ ވާހަކަތަކުގެ ސަބަބުން، އުމައިރުގެ ނަފްސަށާއި ފުރާނަ އަށް ނުރައްކާވާނެ ހާލަތެއް މެދުވެރިވެ, އުމައިރުގެ ކިޔެވުމަށާއި މުސްތަގުބަލަށް ބޮޑެތި ގެއްލުންތަކެއް ކުރިމަތިވާނެ ހާލަތެއް މެދުވެރިވެފައިވާ ކަމަށެވެ.

އެހެންކަމުން އުމައިރުގެ މަންމައަދި ފަސްޓްލޭޑީ ސާޖިދާ ފަރާތްޕުޅުން މަންދީގެ މައްޗަށް ދައުވާ ކޮށްދިނުމަށް އެދި ސިވިލް ކޯޓަށް މިއަދު މައްސަލަ ހުށަހަޅާފައި ކަމަށް އެ ބަޔާނުގައިވެ އެވެ.

ނަމަވެސް ފައްޔާޒާއި އެމްޑީޕީގެ މައްޗަށް ދައުވާ ކުރި ކަމަކަށް އެ ބަޔާނުގައި ބުނެފައެއް ނުވެއެވެ.

ނަމަވެސް އެމްޑީޕީން ވަނީ ކުއްޖާގެ ނަން ހާމަކޮށް ކަރާމާތް ނަގާލީ އާއިލާ އާއި ވަކީލް ކަމަށާއި މަންދީ ދެއްކި ވާހަކާގައި ކުއްޖެއްގެ ނަމެއް ހާމަކޮށްފައި ނެތްކަމަށް ބުނެ އެ މައްސަލަ އިދާރާތަކަށް ހުށަހަޅާނެ ކަމަށް ބުނެފަ އެވެ.