ސުޕްރީމް ކޯޓުގެ ފަނޑިޔާރުންތަކެއް ސަސްޕެންޑުކޮށް, ސުޕްރީމް ކޯޓުގެ ފަނޑިޔާރުންގެ ބެންޗް ބަދަލުކުރަން ކުރަމުންދާ ކަންކަން ގާތުން ބަލަމުން ގެންދާ ކަމަށް ޝަރުއީ ދާއިރާގެ މިނިވަންކަމާބެހޭ އދ. ގެ ހާއްސަ ރެޕަޓުއާ މާގަރެޓް ސެޓާތުވައިޓް ވިދާޅުވެއްޖެ އެވެ.

ސުޕްރީމް ކޯޓުގެ ތިން ފަނޑިޔާރަކު ސަސްޕެންޑް ކުރުމުން ސަސްޕެންޑްކުރި ފަނޑިޔާރުންގެ ތެރޭގައި ހިމެނޭ ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު ހުސްނުއްސުއޫދު ވަނީ އދ. އާއި ބައިނަލްއަގްވާމީ ޖަމްއިއްޔާތަކަށް އެ މައްސަލަ ހުށަހަޅައިފަ އެވެ.

އެކަމާ ގުޅިގެން ލިޔެފައިވާ ހަބަރެއް ރީ ޓްވީޓް ކުރެއްވުމަށްފަހު މާގަރެޓް އިއްޔެ ކުރެއްވި ޓްވީޓެއްގައި ވިދާޅުވީ ރާއްޖޭގެ ކަންކަން ވަރަށް ގާތުން ބަލަމުންދާ ކަމަށެވެ.

ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް މަދު ކުރަން މަޖިލީހުން ފާސްކުރީ، މަޖިލިސް މެންބަރުންގެ މެންބަރުކަން ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭ ގޮތަށް ގާނޫނުއަސާސީ ބަދަލުކުރި މައްސަލަ ސުޕްރީމް ކޯޓަށް ބަލައިގަތުމުންނެވެ.

ކެންދޫ ދާއިރާގެ ކުރީގެ މެންބަރު އަލީ ހުސެއިން ސުޕްރީމް ކޯޓަށް ހުށަހެޅުއްވި އެ މައްސަލާގެ އަޑުއެހުމެއް ތާވަލްކޮށްފައި ވަނިކޮށް އެ ކޯޓުގެ ތިން ފަނޑިޔާރުންގެ މައްސަލަތަކެއް ބަލާ ކަމަށް ބުނެ ފަނޑިޔާރު ޑރ. އަޒްމިރަލްދާ ޒާހިރު އަދި ފަނޑިޔާރު ހުސްނުއްސުއޫދު އަދި ފަނޑިޔާރު މަހާޒް އަލީ ޒާހިރު ސަސްޕެންޑު ކުރިއެވެ.